অধ্যায় 189

189.1

যুধিষ্ঠির উবাচ
চাতুরাশ্রম্যমুক্তং তে রাজধর্মাস্তথৈব চ
নানাশ্রয়াশ্চ বহব ইতিহাসাঃ পৃথগ্বিধাঃ

শ্রুতাস্ত্বত্তঃ কথাশ্চৈব ধর্ময়ুক্তা মহামতে
সংদেহোঽস্তি তু কশ্চিন্মে তদ্ভবান্বক্তুমর্হতি

জাপকানাং ফলাবাপ্তিং শ্রোতুমিচ্ছামি ভারত
কিং ফলং জপতামুক্তং ক্ব বা তিষ্ঠন্তি জাপকাঃ

জপস্য চ বিধিং কৃত্স্নং বক্তুমর্হসি মেঽনঘ
জাপকা ইতি কিং চৈতত্সাংখ্যয়োগক্রিয়াবিধিঃ

কিং যজ্ঞবিধিরেবৈষ কিমেতজ্জপ্যমুচ্যতে
এতন্মে সর্বমাচক্ষ্ব সর্বজ্ঞো হ্যসি মে মতঃ

ভীষ্ম উবাচ
অত্রাপ্যুদাহরন্তীমমিতিহাসং পুরাতনম্
যমস্য যত্পুরা বৃত্তং কালস্য ব্রাহ্মণস্য চ

সংন্যাস এব বেদান্তে বর্ততে জপনং প্রতি
বেদবাদাভিনির্বৃত্তা শান্তির্ব্রহ্মণ্যবস্থিতৌ
মার্গৌ তাবপ্যুভাবেতৌ সংশ্রিতৌ ন চ সংশ্রিতৌ

যথা সংশ্রূয়তে রাজন্কারণং চাত্র বক্ষ্যতে
মনঃসমাধিরত্রাপি তথেন্দ্রিয়জয়ঃ স্মৃতঃ

সত্যমগ্নিপরীচারো বিবিক্তানাং চ সেবনম্
ধ্যানং তপো দমঃ ক্ষান্তিরনসূয়া মিতাশনম্

বিষয়প্রতিসংহারো মিতজল্পস্তথা শমঃ
এষ প্রবৃত্তকো ধর্মো নিবৃত্তকমথো শৃণু

যথা নিবর্ততে কর্ম জপতো ব্রহ্মচারিণঃ
এতত্সর্বমশেষেণ যথোক্তং পরিবর্জয়েৎ
ত্রিবিধং মার্গমাসাদ্য ব্যক্তাব্যক্তমনাশ্রয়ম্

কুশোচ্চয়নিষণ্ণঃ সন্কুশহস্তঃ কুশৈঃ শিখী
চীরৈঃ পরিবৃতস্তস্মিন্মধ্যে ছন্নঃ কুশৈস্তথা

বিষয়েভ্যো নমস্কুর্যাদ্বিষয়ান্ন চ ভাবয়েৎ
সাম্যমুত্পাদ্য মনসো মনস্যেব মনো দধৎ

তদ্ধিয়া ধ্যায়তি ব্রহ্ম জপন্বৈ সংহিতাং হিতাম্
সংন্যস্যত্যথ বা তাং বৈ সমাধৌ পর্যবস্থিতঃ

ধ্যানমুত্পাদয়ত্যত্র সংহিতাবলসংশ্রয়াৎ
শুদ্ধাত্মা তপসা দান্তো নিবৃত্তদ্বেষকামবান্

অরাগমোহো নির্দ্বংদ্বো ন শোচতি ন সজ্জতে
ন কর্তাকরণীয়ানাং ন কার্যাণামিতি স্থিতিঃ

ন চাহংকারয়োগেন মনঃ প্রস্থাপয়েত্ক্বচিৎ
ন চাত্মগ্রহণে যুক্তো নাবমানী ন চাক্রিয়ঃ

ধ্যানক্রিয়াপরো যুক্তো ধ্যানবান্ধ্যাননিশ্চয়ঃ
ধ্যানে সমাধিমুত্পাদ্য তদপি ত্যজতি ক্রমাৎ

স বৈ তস্যামবস্থায়াং সর্বত্যাগকৃতঃ সুখী
নিরীহস্ত্যজতি প্রাণান্ব্রাহ্মীং সংশ্রয়তে তনুম্

অথ বা নেচ্ছতে তত্র ব্রহ্মকায়নিষেবণম্
উত্ক্রামতি চ মার্গস্থো নৈব ক্বচন জায়তে

আত্মবুদ্ধিং সমাস্থায় শান্তীভূতো নিরাময়ঃ
অমৃতং বিরজঃশুদ্ধমাত্মানং প্রতিপদ্যতে