অধ্যায় 190

190.1

যুধিষ্ঠির উবাচ
গতীনামুত্তমা প্রাপ্তিঃ কথিতা জাপকেষ্বিহ
একৈবৈষা গতিস্তেষামুত যান্ত্যপরামপি

ভীষ্ম উবাচ
শৃণুষ্বাবহিতো রাজঞ্জাপকানাং গতিং বিভো
যথা গচ্ছন্তি নিরয়মনেকং পুরুষর্ষভ

যথোক্তমেতত্পূর্বং যো নানুতিষ্ঠতি জাপকঃ
একদেশক্রিয়শ্চাত্র নিরয়ং স নিগচ্ছতি

অবজ্ঞানেন কুরুতে ন তুষ্যতি ন শোচতি
ঈদৃশো জাপকো যাতি নিরয়ং নাত্র সংশয়ঃ

অহংকারকৃতশ্চৈব সর্বে নিরয়গামিনঃ
পরাবমানী পুরুষো ভবিতা নিরয়োপগঃ

অভিধ্যাপূর্বকং জপ্যং কুরুতে যশ্চ মোহিতঃ
যত্রাভিধ্যাং স কুরুতে তং বৈ নিরয়মৃচ্ছতি

অথৈশ্বর্যপ্রবৃত্তঃ সঞ্জাপকস্তত্র রজ্যতে
স এব নিরয়স্তস্য নাসৌ তস্মাত্প্রমুচ্যতে

রাগেণ জাপকো জপ্যং কুরুতে তত্র মোহিতঃ
যত্রাস্য রাগঃ পততি তত্র তত্রোপজায়তে

দুর্বুদ্ধিরকৃতপ্রজ্ঞশ্চলে মনসি তিষ্ঠতি
চলামেব গতিং যাতি নিরয়ং বাধিগচ্ছতি

অকৃতপ্রজ্ঞকো বালো মোহং গচ্ছতি জাপকঃ
স মোহান্নিরয়ং যাতি তত্র গত্বানুশোচতি

দৃঢগ্রাহী করোমীতি জপ্যং জপতি জাপকঃ
ন সংপূর্ণো ন বা যুক্তো নিরয়ং সোঽধিগচ্ছতি

যুধিষ্ঠির উবাচ
অনিমিত্তং পরং যত্তদব্যক্তং ব্রহ্মণি স্থিতম্
সদ্ভূতো জাপকঃ কস্মাত্স শরীরমথাবিশেৎ

ভীষ্ম উবাচ
দুষ্প্রজ্ঞানেন নিরয়া বহবঃ সমুদাহৃতাঃ
প্রশস্তং জাপকত্বং চ দোষাশ্চৈতে তদাত্মকাঃ