অধ্যায় 191

191.1

যুধিষ্ঠির উবাচ
কীদৃশো জাপকো যাতি নিরয়ং বর্ণয়স্ব মে
কৌতূহলং হি মে জাতং তদ্ভবান্বক্তুমর্হতি

ভীষ্ম উবাচ
ধর্মস্যাংশঃ প্রসূতোঽসি ধর্মিষ্ঠোঽসি স্বভাবতঃ
ধর্মমূলাশ্রয়ং বাক্যং শৃণুষ্বাবহিতোঽনঘ

অমূনি যানি স্থানানি দেবানাং পরমাত্মনাম্
নানাসংস্থানবর্ণানি নানারূপফলানি চ

দিব্যানি কামচারীণি বিমানানি সভাস্তথা
আক্রীডা বিবিধা রাজন্পদ্মিন্যশ্চামলোদকাঃ

চতুর্ণাং লোকপালানাং শুক্রস্যাথ বৃহস্পতেঃ
মরুতাং বিশ্বদেবানাং সাধ্যানামশ্বিনোরপি

রুদ্রাদিত্যবসূনাং চ তথান্যেষাং দিবৌকসাম্
এতে বৈ নিরয়াস্তাত স্থানস্য পরমাত্মনঃ

অভয়ং চানিমিত্তং চ ন চ ক্লেশভয়াবৃতম্
দ্বাভ্যাং মুক্তং ত্রিভির্মুক্তমষ্টাভিস্ত্রিভিরেব চ

চতুর্লক্ষণবর্জং তু চতুষ্কারণবর্জিতম্
অপ্রহর্ষমনানন্দমশোকং বিগতক্লমম্

কালঃ সংপচ্যতে তত্র ন কালস্তত্র বৈ প্রভুঃ
স কালস্য প্রভূ রাজন্স্বর্গস্যাপি তথেশ্বরঃ

আত্মকেবলতাং প্রাপ্তস্তত্র গত্বা ন শোচতি
ঈদৃশং পরমং স্থানং নিরয়াস্তে চ তাদৃশাঃ

এতে তে নিরয়াঃ প্রোক্তাঃ সর্ব এব যথাতথম্
তস্য স্থানবরস্যেহ সর্বে নিরয়সংজ্ঞিতাঃ