Utshovঅধ্যায় 192
192.1
যুধিষ্ঠির উবাচ
কালমৃত্যুয়মানাং চ ব্রাহ্মণস্য চ সত্তম
বিবাদো ব্যাহৃতঃ পূর্বং তদ্ভবান্বক্তুমর্হতি
192.2
ভীষ্ম উবাচ
অত্রাপ্যুদাহরন্তীমমিতিহাসং পুরাতনম্
ইক্ষ্বাকোঃ সূর্যপুত্রস্য যদ্বৃত্তং ব্রাহ্মণস্য চ
192.3
কালস্য মৃত্যোশ্চ তথা যদ্বৃত্তং তন্নিবোধ মে
যথা স তেষাং সংবাদো যস্মিন্স্থানেঽপি চাভবৎ
192.4
ব্রাহ্মণো জাপকঃ কশ্চিদ্ধর্মবৃত্তো মহায়শাঃ
ষডঙ্গবিন্মহাপ্রাজ্ঞঃ পৈপ্পলাদিঃ স কৌশিকঃ
192.5
তস্যাপরোক্ষং বিজ্ঞানং ষডঙ্গেষু তথৈব চ
বেদেষু চৈব নিষ্ণাতো হিমবত্পাদসংশ্রয়ঃ
192.6
সোঽন্ত্যং ব্রাহ্মং তপস্তেপে সংহিতাং সংয়তো জপন্
তস্য বর্ষসহস্রং তু নিয়মেন তথা গতম্
192.7
স দেব্যা দর্শিতঃ সাক্ষাত্প্রীতাস্মীতি তদা কিল
জপ্যমাবর্তয়ংস্তূষ্ণীং ন চ তাং কিংচিদব্রবীৎ
192.8
তস্যানুকম্পয়া দেবী প্রীতা সমভবত্তদা
বেদমাতা ততস্তস্য তজ্জপ্যং সমপূজয়ৎ
192.9
সমাপ্তজপ্যস্তূত্থায় শিরসা পাদয়োস্তথা
পপাত দেব্যা ধর্মাত্মা বচনং চেদমব্রবীৎ
192.10
দিষ্ট্যা দেবি প্রসন্না ত্বং দর্শনং চাগতা মম
যদি বাপি প্রসন্নাসি জপ্যে মে রমতাং মনঃ
192.11
সাবিত্র্যুবাচ
কিং প্রার্থয়সি বিপ্রর্ষে কিং চেষ্টং করবাণি তে
প্রব্রূহি জপতাং শ্রেষ্ঠ সর্বং তত্তে ভবিষ্যতি
192.12
ভীষ্ম উবাচ
ইত্যুক্তঃ স তদা দেব্যা বিপ্রঃ প্রোবাচ ধর্মবিৎ
জপ্যং প্রতি মমেচ্ছেয়ং বর্ধত্বিতি পুনঃ পুনঃ
192.13
মনসশ্চ সমাধির্মে বর্ধেতাহরহঃ শুভে
তত্তথেতি ততো দেবী মধুরং প্রত্যভাষত
192.14
ইদং চৈবাপরং প্রাহ দেবী তত্প্রিয়কাম্যয়া
নিরয়ং নৈব যাতাসি যত্র যাতা দ্বিজর্ষভাঃ
192.15
যাস্যসি ব্রহ্মণঃ স্থানমনিমিত্তমনিন্দিতম্
সাধয়ে ভবিতা চৈতদ্যত্ত্বয়াহমিহার্থিতা
192.16
নিয়তো জপ চৈকাগ্রো ধর্মস্ত্বাং সমুপৈষ্যতি
কালো মৃত্যুর্যমশ্চৈব সমায়াস্যন্তি তেঽন্তিকম্
ভবিতা চ বিবাদোঽত্র তব তেষাং চ ধর্মতঃ
192.17
এবমুক্ত্বা ভগবতী জগাম ভবনং স্বকম্
ব্রাহ্মণোঽপি জপন্নাস্তে দিব্যং বর্ষশতং তদা
192.18
সমাপ্তে নিয়মে তস্মিন্নথ বিপ্রস্য ধীমতঃ
সাক্ষাত্প্রীতস্তদা ধর্মো দর্শয়ামাস তং দ্বিজম্
192.19
ধর্ম উবাচ
দ্বিজাতে পশ্য মাং ধর্মমহং ত্বাং দ্রষ্টুমাগতঃ
জপ্যস্য চ ফলং যত্তে সংপ্রাপ্তং তচ্চ মে শৃণু
192.20
জিতা লোকাস্ত্বয়া সর্বে যে দিব্যা যে চ মানুষাঃ
দেবানাং নিরয়ান্সাধো সর্বানুত্ক্রম্য যাস্যসি
192.21
প্রাণত্যাগং কুরু মুনে গচ্ছ লোকান্যথেপ্সিতান্
ত্যক্ত্বাত্মনঃ শরীরং চ ততো লোকানবাপ্স্যসি
192.22
ব্রাহ্মণ উবাচ
কৃতং লোকৈর্হি মে ধর্ম গচ্ছ চ ত্বং যথাসুখম্
বহুদুঃখসুখং দেহং নোত্সৃজেয়মহং বিভো
192.23
ধর্ম উবাচ
অবশ্যং ভোঃ শরীরং তে ত্যক্তব্যং মুনিপুংগব
স্বর্গ আরোহ্যতাং বিপ্র কিং বা তে রোচতেঽনঘ
192.24
ব্রাহ্মণ উবাচ
ন রোচয়ে স্বর্গবাসং বিনা দেহাদহং বিভো
গচ্ছ ধর্ম ন মে শ্রদ্ধা স্বর্গং গন্তুং বিনাত্মনা
192.25
ধর্ম উবাচ
অলং দেহে মনঃ কৃত্বা ত্যক্ত্বা দেহং সুখী ভব
গচ্ছ লোকানরজসো যত্র গত্বা ন শোচসি
192.26
ব্রাহ্মণ উবাচ
রমে জপন্মহাভাগ কৃতং লোকৈঃ সনাতনৈঃ
সশরীরেণ গন্তব্যো ময়া স্বর্গো ন বা বিভো
192.27
ধর্ম উবাচ
যদি ত্বং নেচ্ছসি ত্যক্তুং শরীরং পশ্য বৈ দ্বিজ
এষ কালস্তথা মৃত্যুর্যমশ্চ ত্বামুপাগতাঃ
192.28
ভীষ্ম উবাচ
অথ বৈবস্বতঃ কালো মৃত্যুশ্চ ত্রিতয়ং বিভো
ব্রাহ্মণং তং মহাভাগমুপাগম্যেদমব্রুবন্
192.29
তপসোঽস্য সুতপ্তস্য তথা সুচরিতস্য চ
ফলপ্রাপ্তিস্তব শ্রেষ্ঠা যমোঽহং ত্বামুপব্রুবে
192.30
যথাবদস্য জপ্যস্য ফলং প্রাপ্তস্ত্বমুত্তমম্
কালস্তে স্বর্গমারোঢুং কালোঽহং ত্বামুপাগতঃ
192.31
মৃত্যুং মা বিদ্ধি ধর্মজ্ঞ রূপিণং স্বয়মাগতম্
কালেন চোদিতং বিপ্র ত্বামিতো নেতুমদ্য বৈ
192.32
ব্রাহ্মণ উবাচ
স্বাগতং সূর্যপুত্রায় কালায় চ মহাত্মনে
মৃত্যবে চাথ ধর্মায় কিং কার্যং করবাণি বঃ
192.33
ভীষ্ম উবাচ
অর্ঘ্যং পাদ্যং চ দত্ত্বা স তেভ্যস্তত্র সমাগমে
অব্রবীত্পরমপ্রীতঃ স্বশক্ত্যা কিং করোমি বঃ
192.34
তস্মিন্নেবাথ কালে তু তীর্থয়াত্রামুপাগতঃ
ইক্ষ্বাকুরগমত্তত্র সমেতা যত্র তে বিভো
192.35
সর্বানেব তু রাজর্ষিঃ সংপূজ্যাভিপ্রণম্য চ
কুশলপ্রশ্নমকরোত্সর্বেষাং রাজসত্তমঃ
192.36
তস্মৈ সোঽথাসনং দত্ত্বা পাদ্যমর্ঘ্যং তথৈব চ
অব্রবীদ্ব্রাহ্মণো বাক্যং কৃত্বা কুশলসংবিদম্
192.37
স্বাগতং তে মহারাজ ব্রূহি যদ্যদিহেচ্ছসি
স্বশক্ত্যা কিং করোমীহ তদ্ভবান্প্রব্রবীতু মে
192.38
রাজোবাচ
রাজাহং ব্রাহ্মণশ্চ ত্বং যদি ষট্কর্মসংস্থিতঃ
দদামি বসু কিংচিত্তে প্রার্থিতং তদ্বদস্ব মে
192.39
ব্রাহ্মণ উবাচ
দ্বিবিধা ব্রাহ্মণা রাজন্ধর্মশ্চ দ্বিবিধঃ স্মৃতঃ
প্রবৃত্তশ্চ নিবৃত্তশ্চ নিবৃত্তোঽস্মি প্রতিগ্রহাৎ
192.40
তেভ্যঃ প্রয়চ্ছ দানানি যে প্রবৃত্তা নরাধিপ
অহং ন প্রতিগৃহ্ণামি কিমিষ্টং কিং দদানি তে
ব্রূহি ত্বং নৃপতিশ্রেষ্ঠ তপসা সাধয়ামি কিম্
192.41
রাজোবাচ
ক্ষত্রিয়োঽহং ন জানামি দেহীতি বচনং ক্বচিৎ
প্রয়চ্ছ যুদ্ধমিত্যেবং বাদিনঃ স্মো দ্বিজোত্তম
192.42
ব্রাহ্মণ উবাচ
তুষ্যসি ত্বং স্বধর্মেণ তথা তুষ্টা বয়ং নৃপ
অন্যোন্যস্যোত্তরং নাস্তি যদিষ্টং তত্সমাচর
192.43
রাজোবাচ
স্বশক্ত্যাহং দদানীতি ত্বয়া পূর্বং প্রভাষিতম্
যাচে ত্বাং দীয়তাং মহ্যং জপ্যস্যাস্য ফলং দ্বিজ
192.44
ব্রাহ্মণ উবাচ
যুদ্ধং মম সদা বাণী যাচতীতি বিকত্থসে
ন চ যুদ্ধং ময়া সার্ধং কিমর্থং যাচসে পুনঃ
192.45
রাজোবাচ
বাগ্বজ্রা ব্রাহ্মণাঃ প্রোক্তাঃ ক্ষত্রিয়া বাহুজীবিনঃ
বাগ্যুদ্ধং তদিদং তীব্রং মম বিপ্র ত্বয়া সহ
192.46
ব্রাহ্মণ উবাচ
সৈবাদ্যাপি প্রতিজ্ঞা মে স্বশক্ত্যা কিং প্রদীয়তাম্
ব্রূহি দাস্যামি রাজেন্দ্র বিভবে সতি মাচিরম্
192.47
রাজোবাচ
যত্তদ্বর্ষশতং পূর্ণং জপ্যং বৈ জপতা ত্বয়া
ফলং প্রাপ্তং তত্প্রয়চ্ছ মম দিত্সুর্ভবান্যদি
192.48
ব্রাহ্মণ উবাচ
পরমং গৃহ্যতাং তস্য ফলং যজ্জপিতং ময়া
অর্ধং ত্বমবিচারেণ ফলং তস্য সমাপ্নুহি
192.49
অথ বা সর্বমেবেহ জপ্যকং মামকং ফলম্
রাজন্প্রাপ্নুহি কামং ত্বং যদি সর্বমিহেচ্ছসি
192.50
রাজোবাচ
কৃতং সর্বেণ ভদ্রং তে জপ্যং যদ্যাচিতং ময়া
স্বস্তি তেঽস্তু গমিষ্যামি কিং চ তস্য ফলং বদ
192.51
ব্রাহ্মণ উবাচ
ফলপ্রাপ্তিং ন জানামি দত্তং যজ্জপিতং ময়া
অয়ং ধর্মশ্চ কালশ্চ যমো মৃত্যুশ্চ সাক্ষিণঃ
192.52
রাজোবাচ
অজ্ঞাতমস্য ধর্মস্য ফলং মে কিং করিষ্যতি
প্রাপ্নোতু তত্ফলং বিপ্রো নাহমিচ্ছে সসংশয়ম্
192.53
ব্রাহ্মণ উবাচ
নাদদেঽপরবক্তব্যং দত্তং বাচা ফলং ময়া
বাক্যং প্রমাণং রাজর্ষে মমাপি তব চৈব হি
192.54
নাভিসংধির্ময়া জপ্যে কৃতপূর্বঃ কথংচন
জপ্যস্য রাজশার্দূল কথং জ্ঞাস্যাম্যহং ফলম্
192.55
দদস্বেতি ত্বয়া চোক্তং দদামীতি তথা ময়া
ন বাচং দূষয়িষ্যামি সত্যং রক্ষ স্থিরো ভব
192.56
অথৈবং বদতো মেঽদ্য বচনং ন করিষ্যসি
মহানধর্মো ভবিতা তব রাজন্মৃষাকৃতঃ
192.57
ন যুক্তং তু মৃষা বাণী ত্বয়া বক্তুমরিংদম
তথা ময়াপ্যভ্যধিকং মৃষা বক্তুং ন শক্যতে
192.58
সংশ্রুতং চ ময়া পূর্বং দদানীত্যবিচারিতম্
তদ্গৃহ্ণীষ্বাবিচারেণ যদি সত্যে স্থিতো ভবান্
192.59
ইহাগম্য হি মাং রাজঞ্জাপ্যং ফলময়াচিথাঃ
তন্মন্নিসৃষ্টং গৃহ্ণীষ্ব ভব সত্যে স্থিরোঽপি চ
192.60
নায়ং লোকোঽস্তি ন পরো ন চ পূর্বান্স তারয়েৎ
কুত এবাবরান্রাজন্মৃষাবাদপরায়ণঃ
192.61
ন যজ্ঞাধ্যয়নে দানং নিয়মাস্তারয়ন্তি হি
তথা সত্যং পরে লোকে যথা বৈ পুরুষর্ষভ
192.62
তপাংসি যানি চীর্ণানি চরিষ্যসি চ যত্তপঃ
সমাঃ শতৈঃ সহস্রৈশ্চ তত্সত্যান্ন বিশিষ্যতে
192.63
সত্যমেকাক্ষরং ব্রহ্ম সত্যমেকাক্ষরং তপঃ
সত্যমেকাক্ষরো যজ্ঞঃ সত্যমেকাক্ষরং শ্রুতম্
192.64
সত্যং বেদেষু জাগর্তি ফলং সত্যে পরং স্মৃতম্
সত্যাদ্ধর্মো দমশ্চৈব সর্বং সত্যে প্রতিষ্ঠিতম্
192.65
সত্যং বেদাস্তথাঙ্গানি সত্যং যজ্ঞস্তথা বিধিঃ
ব্রতচর্যাস্তথা সত্যমোংকারঃ সত্যমেব চ
192.66
প্রাণিনাং জননং সত্যং সত্যং সংততিরেব চ
সত্যেন বায়ুরভ্যেতি সত্যেন তপতে রবিঃ
192.67
সত্যেন চাগ্নির্দহতি স্বর্গঃ সত্যে প্রতিষ্ঠিতঃ
সত্যং যজ্ঞস্তপো বেদাঃ স্তোভা মন্ত্রাঃ সরস্বতী
192.68
তুলামারোপিতো ধর্মঃ সত্যং চৈবেতি নঃ শ্রুতম্
সমাং কক্ষাং ধারয়তো যতঃ সত্যং ততোঽধিকম্
192.69
যতো ধর্মস্ততঃ সত্যং সর্বং সত্যেন বর্ধতে
কিমর্থমনৃতং কর্ম কর্তুং রাজংস্ত্বমিচ্ছসি
192.70
সত্যে কুরু স্থিরং ভাবং মা রাজন্ননৃতং কৃথাঃ
কস্মাত্ত্বমনৃতং বাক্যং দেহীতি কুরুষেঽশুভম্
192.71
যদি জপ্যফলং দত্তং ময়া নেষিষ্যসে নৃপ
স্বধর্মেভ্যঃ পরিভ্রষ্টো লোকাননুচরিষ্যসি
192.72
সংশ্রুত্য যো ন দিত্সেত যাচিত্বা যশ্চ নেচ্ছতি
উভাবানৃতিকাবেতৌ ন মৃষা কর্তুমর্হসি
192.73
রাজোবাচ
যোদ্ধব্যং রক্ষিতব্যং চ ক্ষত্রধর্মঃ কিল দ্বিজ
দাতারঃ ক্ষত্রিয়াঃ প্রোক্তা গৃহ্ণীয়াং ভবতঃ কথম্
192.74
ব্রাহ্মণ উবাচ
ন ছন্দয়ামি তে রাজন্নাপি তে গৃহমাব্রজম্
ইহাগম্য তু যাচিত্বা ন গৃহ্ণীষে পুনঃ কথম্
192.75
ধর্ম উবাচ
অবিবাদোঽস্তু যুবয়োর্বিত্তং মাং ধর্মমাগতম্
দ্বিজো দানফলৈর্যুক্তো রাজা সত্যফলেন চ
192.76
স্বর্গ উবাচ
স্বর্গং মাং বিদ্ধি রাজেন্দ্র রূপিণং স্বয়মাগতম্
অবিবাদোঽস্তু যুবয়োরুভৌ তুল্যফলৌ যুবাম্
192.77
রাজোবাচ
কৃতং স্বর্গেণ মে কার্যং গচ্ছ স্বর্গ যথাসুখম্
বিপ্রো যদীচ্ছতে দাতুং প্রতীচ্ছতু চ মে ধনম্
192.78
ব্রাহ্মণ উবাচ
বাল্যে যদি স্যাদজ্ঞানান্ময়া হস্তঃ প্রসারিতঃ
নিবৃত্তিলক্ষণং ধর্মমুপাসে সংহিতাং জপন্
192.79
নিবৃত্তং মাং চিরং রাজন্বিপ্রং লোভয়সে কথম্
স্বেন কার্যং করিষ্যামি ত্বত্তো নেচ্ছে ফলং নৃপ
তপঃস্বাধ্যায়শীলোঽহং নিবৃত্তশ্চ প্রতিগ্রহাৎ
192.80
রাজোবাচ
যদি বিপ্র নিসৃষ্টং তে জপ্যস্য ফলমুত্তমম্
আবয়োর্যত্ফলং কিংচিত্সহিতং নৌ তদস্ত্বিহ
192.81
দ্বিজাঃ প্রতিগ্রহে যুক্তা দাতারো রাজবংশজাঃ
যদি ধর্মঃ শ্রুতো বিপ্র সহৈব ফলমস্তু নৌ
192.82
মা বা ভূত্সহভোজ্যং নৌ মদীয়ং ফলমাপ্নুহি
প্রতীচ্ছ মত্কৃতং ধর্মং যদি তে ময্যনুগ্রহঃ
192.83
ভীষ্ম উবাচ
ততো বিকৃতচেষ্টৌ দ্বৌ পুরুষৌ সমুপস্থিতৌ
গৃহীত্বান্যোন্যমাবেষ্ট্য কুচেলাবূচতুর্বচঃ
192.84
ন মে ধারয়সীত্যেকো ধারয়ামীতি চাপরঃ
ইহাস্তি নৌ বিবাদোঽয়ময়ং রাজানুশাসকঃ
192.85
সত্যং ব্রবীম্যহমিদং ন মে ধারয়তে ভবান্
অনৃতং বদসীহ ত্বমৃণং তে ধারয়াম্যহম্
192.86
তাবুভৌ ভৃশসংতপ্তৌ রাজানমিদমূচতুঃ
পরীক্ষ্যতাং যথা স্যাব নাবামিহ বিগর্হিতৌ
192.87
বিরূপ উবাচ
ধারয়ামি নরব্যাঘ্র বিকৃতস্যেহ গোঃ ফলম্
দদতশ্চ ন গৃহ্ণাতি বিকৃতো মে মহীপতে
192.88
বিকৃত উবাচ
ন মে ধারয়তে কিংচিদ্বিরূপোঽয়ং নরাধিপ
মিথ্যা ব্রবীত্যয়ং হি ত্বা মিথ্যাভাসং নরাধিপ
192.89
রাজোবাচ
বিরূপ কিং ধারয়তে ভবানস্য বদস্ব মে
শ্রুত্বা তথা করিষ্যামীত্যেবং মে ধীয়তে মতিঃ
192.90
বিরূপ উবাচ
শৃণুষ্বাবহিতো রাজন্যথৈতদ্ধারয়াম্যহম্
বিকৃতস্যাস্য রাজর্ষে নিখিলেন নরর্ষভ
192.91
অনেন ধর্মপ্রাপ্ত্যর্থং শুভা দত্তা পুরানঘ
ধেনুর্বিপ্রায় রাজর্ষে তপঃস্বাধ্যায়শীলিনে
192.92
তস্যাশ্চায়ং ময়া রাজন্ফলমভ্যেত্য যাচিতঃ
বিকৃতেন চ মে দত্তং বিশূদ্ধেনান্তরাত্মনা
192.93
ততো মে সুকৃতং কর্ম কৃতমাত্মবিশুদ্ধয়ে
গাবৌ হি কপিলে ক্রীত্বা বত্সলে বহুদোহনে
192.94
তে চোঞ্ছবৃত্তয়ে রাজন্ময়া সমপবর্জিতে
যথাবিধি যথাশ্রদ্ধং তদস্যাহং পুনঃ প্রভো
192.95
ইহাদ্য বৈ গৃহীত্বা তত্প্রয়চ্ছে দ্বিগুণং ফলম্
একস্যাঃ পুরুষব্যাঘ্র কঃ শুদ্ধঃ কোঽত্র দোষবান্
192.96
এবং বিবদমানৌ স্বস্ত্বামিহাভ্যাগতৌ নৃপ
কুরু ধর্মমধর্মং বা বিনয়ে নৌ সমাধয়
192.97
যদি নেচ্ছতি মে দানং যথা দত্তমনেন বৈ
ভবানত্র স্থিরো ভূত্বা মার্গে স্থাপয়তু প্রভুঃ
192.98
রাজোবাচ
দীয়মানং ন গৃহ্ণাসি ঋণং কস্মাত্ত্বমদ্য বৈ
যথৈব তেঽভ্যনুজ্ঞাতং তথা গৃহ্ণীষ্ব মাচিরম্
192.99
বিকৃত উবাচ
দীয়তামিত্যনেনোক্তং দদানীতি তথা ময়া
নায়ং মে ধারয়ত্যত্র গম্যতাং যত্র বাঞ্ছতি
192.100
রাজোবাচ
দদতোঽস্য ন গৃহ্ণাসি বিষমং প্রতিভাতি মে
দণ্ড্যো হি ত্বং মম মতো নাস্ত্যত্র খলু সংশয়ঃ
192.101
বিকৃত উবাচ
ময়াস্য দত্তং রাজর্ষে গৃহ্ণীয়াং তত্কথং পুনঃ
কামমত্রাপরাধো মে দণ্ড্যমাজ্ঞাপয় প্রভো
192.102
বিরূপ উবাচ
দীয়মানং যদি ময়া নেষিষ্যসি কথংচন
নিয়ংস্যতি ত্বা নৃপতিরয়ং ধর্মানুশাসকঃ
192.103
বিকৃত উবাচ
স্বং ময়া যাচিতেনেহ দত্তং কথমিহাদ্য তৎ
গৃহ্ণীয়াং গচ্ছতু ভবানভ্যনুজ্ঞাং দদানি তে
192.104
ব্রাহ্মণ উবাচ
শ্রুতমেতত্ত্বয়া রাজন্ননয়োঃ কথিতং দ্বয়োঃ
প্রতিজ্ঞাতং ময়া যত্তে তদ্গৃহাণাবিচারিতম্
192.105
রাজোবাচ
প্রস্তুতং সুমহত্কার্যমাবয়োর্গহ্বরং যথা
জাপকস্য দৃঢীকারঃ কথমেতদ্ভবিষ্যতি
192.106
যদি তাবন্ন গৃহ্ণামি ব্রাহ্মণেনাপবর্জিতম্
কথং ন লিপ্যেয়মহং দোষেণ মহতাদ্য বৈ
192.107
ভীষ্ম উবাচ
তৌ চোবাচ স রাজর্ষিঃ কৃতকার্যৌ গমিষ্যথঃ
নেদানীং মামিহাসাদ্য রাজধর্মো ভবেন্মৃষা
192.108
স্বধর্মঃ পরিপাল্যশ্চ রাজ্ঞামেষ বিনিশ্চয়ঃ
বিপ্রধর্মশ্চ সুগুরুর্মামনাত্মানমাবিশৎ
192.109
ব্রাহ্মণ উবাচ
গৃহাণ ধারয়েঽহং তে যাচিতং তে শ্রুতং ময়া
ন চেদ্গ্রহীষ্যসে রাজঞ্শপিষ্যে ত্বাং ন সংশয়ঃ
192.110
রাজোবাচ
ধিগ্রাজধর্মং যস্যায়ং কার্যস্যেহ বিনিশ্চয়ঃ
ইত্যর্থং মে গ্রহীতব্যং কথং তুল্যং ভবেদিতি
192.111
এষ পাণিরপূর্বং ভো নিক্ষেপার্থং প্রসারিতঃ
যন্মে ধারয়সে বিপ্র তদিদানীং প্রদীয়তাম্
192.112
ব্রাহ্মণ উবাচ
সংহিতাং জপতা যাবান্ময়া কশ্চিদ্গুণঃ কৃতঃ
তত্সর্বং প্রতিগৃহ্ণীষ্ব যদি কিংচিদিহাস্তি মে
192.113
রাজোবাচ
জলমেতন্নিপতিতং মম পাণৌ দ্বিজোত্তম
সমমস্তু সহৈবাস্তু প্রতিগৃহ্ণাতু বৈ ভবান্
192.114
বিরূপ উবাচ
কামক্রোধৌ বিদ্ধি নৌ ত্বমাবাভ্যাং কারিতো ভবান্
সমেতি চ যদুক্তং তে সমা লোকাস্তবাস্য চ
192.115
নায়ং ধারয়তে কিংচিজ্জিজ্ঞাসা ত্বত্কৃতে কৃতা
কালো ধর্মস্তথা মৃত্যুঃ কামক্রোধৌ তথা যুবাম্
192.116
সর্বমন্যোন্যনিকষে নিঘৃষ্টং পশ্যতস্তব
গচ্ছ লোকাঞ্জিতান্স্বেন কর্মণা যত্র বাঞ্ছসি
192.117
ভীষ্ম উবাচ
জাপকানাং ফলাবাপ্তির্ময়া তে সংপ্রকীর্তিতা
গতিঃ স্থানং চ লোকাশ্চ জাপকেন যথা জিতাঃ
192.118
প্রয়াতি সংহিতাধ্যায়ী ব্রহ্মাণং পরমেষ্ঠিনম্
অথ বাগ্নিং সমায়াতি সূর্যমাবিশতেঽপি বা
192.119
স তৈজসেন ভাবেন যদি তত্রাশ্নুতে রতিম্
গুণাংস্তেষাং সমাদত্তে রাগেণ প্রতিমোহিতঃ
192.120
এবং সোমে তথা বায়ৌ ভূম্যাকাশশরীরগঃ
সরাগস্তত্র বসতি গুণাংস্তেষাং সমাচরন্
192.121
অথ তত্র বিরাগী স গচ্ছতি ত্বথ সংশয়ম্
পরমব্যয়মিচ্ছন্স তমেবাবিশতে পুনঃ
192.122
অমৃতাচ্চামৃতং প্রাপ্তঃ শীতীভূতো নিরাত্মবান্
ব্রহ্মভূতঃ স নির্দ্বংদ্বঃ সুখী শান্তো নিরাময়ঃ
192.123
ব্রহ্মস্থানমনাবর্তমেকমক্ষরসংজ্ঞকম্
অদুঃখমজরং শান্তং স্থানং তত্প্রতিপদ্যতে
192.124
চতুর্ভির্লক্ষণৈর্হীনং তথা ষড্ভিঃ সষোডশৈঃ
পুরুষং সমতিক্রম্য আকাশং প্রতিপদ্যতে
192.125
অথ বেচ্ছতি রাগাত্মা সর্বং তদধিতিষ্ঠতি
যচ্চ প্রার্থয়তে তচ্চ মনসা প্রতিপদ্যতে
192.126
অথ বা বীক্ষতে লোকান্সর্বান্নিরয়সংস্থিতান্
নিঃস্পৃহঃ সর্বতো মুক্তস্তত্রৈব রমতে সুখী
192.127
এবমেষা মহারাজ জাপকস্য গতির্যথা
এতত্তে সর্বমাখ্যাতং কিং ভূয়ঃ শ্রোতুমিচ্ছসি