Utshovঅধ্যায় 193
193.1
যুধিষ্ঠির উবাচ
কিমুত্তরং তদা তৌ স্ম চক্রতুস্তেন ভাষিতে
ব্রাহ্মণো বাথ বা রাজা তন্মে ব্রূহি পিতামহ
193.2
অথ বা তৌ গতৌ তত্র যদেতত্কীর্তিতং ত্বয়া
সংবাদো বা তয়োঃ কোঽভূত্কিং বা তৌ তত্র চক্রতুঃ
193.3
ভীষ্ম উবাচ
তথেত্যেবং প্রতিশ্রুত্য ধর্মং সংপূজ্য চাভিভো
যমং কালং চ মৃত্যুং চ স্বর্গং সংপূজ্য চার্হতঃ
193.4
পূর্বং যে চাপরে তত্র সমেতা ব্রাহ্মণর্ষভাঃ
সর্বান্সংপূজ্য শিরসা রাজানং সোঽব্রবীদ্বচঃ
193.5
ফলেনানেন সংয়ুক্তো রাজর্ষে গচ্ছ পুণ্যতাম্
ভবতা চাভ্যনুজ্ঞাতো জপেয়ং ভূয় এব হি
193.6
বরশ্চ মম পূর্বং হি দেব্যা দত্তো মহাবল
শ্রদ্ধা তে জপতো নিত্যং ভবিতেতি বিশাং পতে
193.7
রাজোবাচ
যদ্যেবমফলা সিদ্ধিঃ শ্রদ্ধা চ জপিতুং তব
গচ্ছ বিপ্র ময়া সার্ধং জাপকং ফলমাপ্নুহি
193.8
ব্রাহ্মণ উবাচ
কৃতঃ প্রয়ত্নঃ সুমহান্সর্বেষাং সংনিধাবিহ
সহ তুল্যফলৌ চাবাং গচ্ছাবো যত্র নৌ গতিঃ
193.9
ভীষ্ম উবাচ
ব্যবসায়ং তয়োস্তত্র বিদিত্বা ত্রিদশেশ্বরঃ
সহ দেবৈরুপয়য়ৌ লোকপালৈস্তথৈব চ
193.10
সাধ্যা বিশ্বেঽথ মরুতো জ্যোতীংষি সুমহান্তি চ
নদ্যঃ শৈলাঃ সমুদ্রাশ্চ তীর্থানি বিবিধানি চ
193.11
তপাংসি সংয়োগবিধির্বেদাঃ স্তোভাঃ সরস্বতী
নারদঃ পর্বতশ্চৈব বিশ্বাবসুর্হহা হুহূঃ
193.12
গন্ধর্বশ্চিত্রসেনশ্চ পরিবারগণৈর্যুতঃ
নাগাঃ সিদ্ধাশ্চ মুনয়ো দেবদেবঃ প্রজাপতিঃ
বিষ্ণুঃ সহস্রশীর্ষশ্চ দেবোঽচিন্ত্যঃ সমাগমৎ
193.13
অবাদ্যন্তান্তরিক্ষে চ ভের্যস্তূর্যাণি চাভিভো
পুষ্পবর্ষাণি দিব্যানি তত্র তেষাং মহাত্মনাম্
ননৃতুশ্চাপ্সরঃসংঘাস্তত্র তত্র সমন্ততঃ
193.14
অথ স্বর্গস্তথা রূপী ব্রাহ্মণং বাক্যমব্রবীৎ
সংসিদ্ধস্ত্বং মহাভাগ ত্বং চ সিদ্ধস্তথা নৃপ
193.15
অথ তৌ সহিতৌ রাজন্নন্যোন্যেন বিধানতঃ
বিষয়প্রতিসংহারমুভাবেব প্রচক্রতুঃ
193.16
প্রাণাপানৌ তথোদানং সমানং ব্যানমেব চ
এবং তান্মনসি স্থাপ্য দধতুঃ প্রাণয়োর্মনঃ
193.17
উপস্থিতকৃতৌ তত্র নাসিকাগ্রমধো ভ্রুবৌ
কুঙ্কুণ্যাং চৈব মনসা শনৈর্ধারয়তঃ স্ম তৌ
193.18
নিশ্চেষ্টাভ্যাং শরীরাভ্যাং স্থিরদৃষ্টী সমাহিতৌ
জিতাসনৌ তথাধায় মূর্ধন্যাত্মানমেব চ
193.19
তালুদেশমথোদ্দাল্য ব্রাহ্মণস্য মহাত্মনঃ
জ্যোতির্জ্বালা সুমহতী জগাম ত্রিদিবং তদা
193.20
হাহাকারস্ততো দিক্ষু সর্বাসু সুমহানভূৎ
তজ্জ্যোতিঃ স্তূয়মানং স্ম ব্রহ্মাণং প্রাবিশত্তদা
193.21
ততঃ স্বাগতমিত্যাহ তত্তেজঃ স পিতামহঃ
প্রাদেশমাত্রং পুরুষং প্রত্যুদ্গম্য বিশাং পতে
193.22
ভূয়শ্চৈবাপরং প্রাহ বচনং মধুরং স্ম সঃ
জাপকৈস্তুল্যফলতা যোগানাং নাত্র সংশয়ঃ
193.23
যোগস্য তাবদেতেভ্যঃ ফলং প্রত্যক্ষদর্শনম্
জাপকানাং বিশিষ্টং তু প্রত্যুত্থানং সমাধিকম্
193.24
উষ্যতাং ময়ি চেত্যুক্ত্বাচেতয়ত্স ততঃ পুনঃ
অথাস্য প্রবিবেশাস্যং ব্রাহ্মণো বিগতজ্বরঃ
193.25
রাজাপ্যেতেন বিধিনা ভগবন্তং পিতামহম্
যথৈব দ্বিজশার্দূলস্তথৈব প্রাবিশত্তদা
193.26
স্বয়ংভুবমথো দেবা অভিবাদ্য ততোঽব্রুবন্
জাপকার্থময়ং যত্নস্তদর্থং বয়মাগতাঃ
193.27
কৃতপূজাবিমৌ তুল্যং ত্বয়া তুল্যফলাবিমৌ
যোগজাপকয়োর্দৃষ্টং ফলং সুমহদদ্য বৈ
সর্বাঁল্লোকানতীত্যৈতৌ গচ্ছেতাং যত্র বাঞ্ছিতম্
193.28
ব্রহ্মোবাচ
মহাস্মৃতিং পঠেদ্যস্তু তথৈবানুস্মৃতিং শুভাম্
তাবপ্যেতেন বিধিনা গচ্ছেতাং মত্সলোকতাম্
193.29
যশ্চ যোগে ভবেদ্ভক্তঃ সোঽপি নাস্ত্যত্র সংশয়ঃ
বিধিনানেন দেহান্তে মম লোকানবাপ্নুয়াৎ
গম্যতাং সাধয়িষ্যামি যথাস্থানানি সিদ্ধয়ে
193.30
ভীষ্ম উবাচ
ইত্যুক্ত্বা স তদা দেবস্তত্রৈবান্তরধীয়ত
আমন্ত্র্য তং ততো দেবা যয়ুঃ স্বং স্বং নিবেশনম্
193.31
তে চ সর্বে মহাত্মানো ধর্মং সত্কৃত্য তত্র বৈ
পৃষ্ঠতোঽনুয়য়ূ রাজন্সর্বে সুপ্রীতমানসাঃ
193.32
এতত্ফলং জাপকানাং গতিশ্চৈব প্রকীর্তিতা
যথাশ্রুতং মহারাজ কিং ভূয়ঃ শ্রোতুমিচ্ছসি