Utshovঅধ্যায় 194
194.1
যুধিষ্ঠির উবাচ
কিং ফলং জ্ঞানয়োগস্য বেদানাং নিয়মস্য চ
ভূতাত্মা বা কথং জ্ঞেয়স্তন্মে ব্রূহি পিতামহ
194.2
ভীষ্ম উবাচ
অত্রাপ্যুদাহরন্তীমমিতিহাসং পুরাতনম্
মনোঃ প্রজাপতের্বাদং মহর্ষেশ্চ বৃহস্পতেঃ
194.3
প্রজাপতিং শ্রেষ্ঠতমং পৃথিব্যাং; দেবর্ষিসংঘপ্রবরো মহর্ষিঃ
বৃহস্পতিঃ প্রশ্নমিমং পুরাণং; পপ্রচ্ছ শিষ্যোঽথ গুরুং প্রণম্য
194.4
যত্কারণং মন্ত্রবিধিঃ প্রবৃত্তো; জ্ঞানে ফলং যত্প্রবদন্তি বিপ্রাঃ
যন্মন্ত্রশব্দৈরকৃতপ্রকাশং; তদুচ্যতাং মে ভগবন্যথাবৎ
194.5
যদর্থশাস্ত্রাগমমন্ত্রবিদ্ভি;র্যজ্ঞৈরনেকৈর্বরগোপ্রদানৈঃ
ফলং মহদ্ভির্যদুপাস্যতে চ; তত্কিং কথং বা ভবিতা ক্ব বা তৎ
194.6
মহী মহীজাঃ পবনোঽন্তরিক্ষং; জলৌকসশ্চৈব জলং দিবং চ
দিবৌকসশ্চৈব যতঃ প্রসূতা;স্তদুচ্যতাং মে ভগবন্পুরাণম্
194.7
জ্ঞানং যতঃ প্রার্থয়তে নরো বৈ; ততস্তদর্থা ভবতি প্রবৃত্তিঃ
ন চাপ্যহং বেদ পরং পুরাণং; মিথ্যাপ্রবৃত্তিং চ কথং নু কুর্যাম্
194.8
ঋক্সামসংঘাংশ্চ যজূংষি চাহং; ছন্দাংসি নক্ষত্রগতিং নিরুক্তম্
অধীত্য চ ব্যাকরণং সকল্পং; শিক্ষাং চ ভূতপ্রকৃতিং ন বেদ্মি
194.9
স মে ভবাঞ্শংসতু সর্বমেত;জ্জ্ঞানে ফলং কর্মণি বা যদস্তি
যথা চ দেহাচ্চ্যবতে শরীরী; পুনঃ শরীরং চ যথাভ্যুপৈতি
194.10
মনুরুবাচ
যদ্যত্প্রিয়ং যস্য সুখং তদাহু;স্তদেব দুঃখং প্রবদন্ত্যনিষ্টম্
ইষ্টং চ মে স্যাদিতরচ্চ ন স্যা;দেতত্কৃতে কর্মবিধিঃ প্রবৃত্তঃ
ইষ্টং ত্বনিষ্টং চ ন মাং ভজেতে;ত্যেতত্কৃতে জ্ঞানবিধিঃ প্রবৃত্তঃ
194.11
কামাত্মকাশ্ছন্দসি কর্ময়োগা; এভির্বিমুক্তঃ পরমশ্নুবীত
নানাবিধে কর্মপথে সুখার্থী; নরঃ প্রবৃত্তো ন পরং প্রয়াতি
পরং হি তত্কর্মপথাদপেতং; নিরাশিষং ব্রহ্মপরং হ্যবশ্যম্
194.12
প্রজাঃ সৃষ্টা মনসা কর্মণা চ; দ্বাবপ্যেতৌ সত্পথৌ লোকজুষ্টৌ
দৃষ্ট্বা কর্ম শাশ্বতং চান্তবচ্চ; মনস্ত্যাগঃ কারণং নান্যদস্তি
194.13
স্বেনাত্মনা চক্ষুরিব প্রণেতা; নিশাত্যয়ে তমসা সংবৃতাত্মা
জ্ঞানং তু বিজ্ঞানগুণেন যুক্তং; কর্মাশুভং পশ্যতি বর্জনীয়ম্
194.14
সর্পান্কুশাগ্রাণি তথোদপানং; জ্ঞাত্বা মনুষ্যাঃ পরিবর্জয়ন্তি
অজ্ঞানতস্তত্র পতন্তি মূঢা; জ্ঞানে ফলং পশ্য যথা বিশিষ্টম্
194.15
কৃত্স্নস্তু মন্ত্রো বিধিবত্প্রয়ুক্তো; যজ্ঞা যথোক্তাস্ত্বথ দক্ষিণাশ্চ
অন্নপ্রদানং মনসঃ সমাধিঃ; পঞ্চাত্মকং কর্মফলং বদন্তি
194.16
গুণাত্মকং কর্ম বদন্তি বেদা;স্তস্মান্মন্ত্রা মন্ত্রমূলং হি কর্ম
বিধির্বিধেয়ং মনসোপপত্তিঃ; ফলস্য ভোক্তা তু যথা শরীরী
194.17
শব্দাশ্চ রূপাণি রসাশ্চ পুণ্যাঃ; স্পর্শাশ্চ গন্ধাশ্চ শুভাস্তথৈব
নরো নসংস্থানগতঃ প্রভুঃ স্যা;দেতত্ফলং সিধ্যতি কর্মলোকে
194.18
যদ্যচ্ছরীরেণ করোতি কর্ম; শরীরয়ুক্তঃ সমুপাশ্নুতে তৎ
শরীরমেবায়তনং সুখস্য; দুঃখস্য চাপ্যায়তনং শরীরম্
194.19
বাচা তু যত্কর্ম করোতি কিংচি;দ্বাচৈব সর্বং সমুপাশ্নুতে তৎ
মনস্তু যত্কর্ম করোতি কিংচি;ন্মনঃস্থ এবায়মুপাশ্নুতে তৎ
194.20
যথাগুণং কর্মগণং ফলার্থী; করোত্যয়ং কর্মফলে নিবিষ্টঃ
তথা তথায়ং গুণসংপ্রয়ুক্তঃ; শুভাশুভং কর্মফলং ভুনক্তি
194.21
মত্স্যো যথা স্রোত ইবাভিপাতী; তথা কৃতং পূর্বমুপৈতি কর্ম
শুভে ত্বসৌ তুষ্যতি দুষ্কৃতে তু; ন তুষ্যতে বৈ পরমঃ শরীরী
194.22
যতো জগত্সর্বমিদং প্রসূতং; জ্ঞাত্বাত্মবন্তো ব্যতিয়ান্তি যত্তৎ
যন্মন্ত্রশব্দৈরকৃতপ্রকাশং; তদুচ্যমানং শৃণু মে পরং যৎ
194.23
রসৈর্বিয়ুক্তং বিবিধৈশ্চ গন্ধৈ;রশব্দমস্পর্শমরূপবচ্চ
অগ্রাহ্যমব্যক্তমবর্ণমেকং; পঞ্চপ্রকারং সসৃজে প্রজানাম্
194.24
ন স্ত্রী পুমান্বাপি নপুংসকং চ; ন সন্ন চাসত্সদসচ্চ তন্ন
পশ্যন্তি যদ্ব্রহ্মবিদো মনুষ্যা;স্তদক্ষরং ন ক্ষরতীতি বিদ্ধি