অধ্যায় 195

195.1

মনুরুবাচ
অক্ষরাত্খং ততো বায়ুর্বায়োর্জ্যোতিস্ততো জলম্
জলাত্প্রসূতা জগতী জগত্যাং জায়তে জগৎ

ইমে শরীরৈর্জলমেব গত্বা; জলাচ্চ তেজঃ পবনোঽন্তরিক্ষম্
খাদ্বৈ নিবর্তন্তি নভাবিনস্তে; যে ভাবিনস্তে পরমাপ্নুবন্তি

নোষ্ণং ন শীতং মৃদু নাপি তীক্ষ্ণং; নাম্লং কষায়ং মধুরং ন তিক্তম্
ন শব্দবন্নাপি চ গন্ধবত্ত;ন্ন রূপবত্তত্পরমস্বভাবম্

স্পর্শং তনুর্বেদ রসং তু জিহ্বা; ঘ্রাণং চ গন্ধাঞ্শ্রবণে চ শব্দান্
রূপাণি চক্ষুর্ন চ তত্পরং য;দ্গৃহ্ণন্ত্যনধ্যাত্মবিদো মনুষ্যাঃ

নিবর্তয়িত্বা রসনং রসেভ্যো; ঘ্রাণং চ গন্ধাচ্ছ্রবণে চ শব্দাৎ
স্পর্শাত্তনুং রূপগুণাত্তু চক্ষু;স্ততঃ পরং পশ্যতি স্বং স্বভাবম্

যতো গৃহীত্বা হি করোতি যচ্চ; যস্মিংশ্চ তামারভতে প্রবৃত্তিম্
যস্মিংশ্চ যদ্যেন চ যশ্চ কর্তা; তত্কারণং তং সমুপায়মাহুঃ

যচ্চাভিভূঃ সাধকং ব্যাপকং চ; যন্মন্ত্রবচ্ছংস্যতে চৈব লোকে
যঃ সর্বহেতুঃ পরমার্থকারী; তত্কারণং কার্যমতো যদন্যৎ

যথা চ কশ্চিত্সুকৃতৈর্মনুষ্যঃ; শুভাশুভং প্রাপ্নুতেঽথাবিরোধাৎ
এবং শরীরেষু শুভাশুভেষু; স্বকর্মজৈর্জ্ঞানমিদং নিবদ্ধম্

যথা প্রদীপঃ পুরতঃ প্রদীপ্তঃ; প্রকাশমন্যস্য করোতি দীপ্যন্
তথেহ পঞ্চেন্দ্রিয়দীপবৃক্ষা; জ্ঞানপ্রদীপ্তাঃ পরবন্ত এব

যথা হি রাজ্ঞো বহবো হ্যমাত্যাঃ; পৃথক্প্রমানং প্রবদন্তি যুক্তাঃ
তদ্বচ্ছরীরেষু ভবন্তি পঞ্চ; জ্ঞানৈকদেশঃ পরমঃ স তেভ্যঃ

যথার্চিষোঽগ্নেঃ পবনস্য বেগা; মরীচয়োঽর্কস্য নদীষু চাপঃ
গচ্ছন্তি চায়ান্তি চ তন্যমানা;স্তদ্বচ্ছরীরাণি শরীরিণাং তু

যথা চ কশ্চিত্পরশুং গৃহীত্বা; ধূমং ন পশ্যেজ্জ্বলনং চ কাষ্ঠে
তদ্বচ্ছরীরোদরপাণিপাদং; ছিত্ত্বা ন পশ্যন্তি ততো যদন্যৎ

তান্যেব কাষ্ঠানি যথা বিমথ্য; ধূমং চ পশ্যেজ্জ্বলনং চ যোগাৎ
তদ্বত্সুবুদ্ধিঃ সমমিন্দ্রিয়ত্বা;দ্বুধঃ পরং পশ্যতি স্বং স্বভাবম্

যথাত্মনোঽঙ্গং পতিতং পৃথিব্যাং; স্বপ্নান্তরে পশ্যতি চাত্মনোঽন্যৎ
শ্রোত্রাদিয়ুক্তঃ সুমনাঃ সুবুদ্ধি;র্লিঙ্গাত্তথা গচ্ছতি লিঙ্গমন্যৎ

উত্পত্তিবৃদ্ধিক্ষয়সংনিপাতৈ;র্ন যুজ্যতেঽসৌ পরমঃ শরীরী
অনেন লিঙ্গেন তু লিঙ্গমন্য;দ্গচ্ছত্যদৃষ্টঃ প্রতিসংধিয়োগাৎ

ন চক্ষুষা পশ্যতি রূপমাত্মনো; ন চাপি সংস্পর্শমুপৈতি কিংচিৎ
ন চাপি তৈঃ সাধয়তেঽথ কার্যং; তে তং ন পশ্যন্তি স পশ্যতে তান্

যথা প্রদীপে জ্বলতোঽনলস্য; সংতাপজং রূপমুপৈতি কিংচিৎ
ন চান্তরং রূপগুণং বিভর্তি; তথৈব তদ্দৃশ্যতে রূপমস্য

যথা মনুষ্যঃ পরিমুচ্য কায়;মদৃশ্যমন্যদ্বিশতে শরীরম্
বিসৃজ্য ভূতেষু মহত্সু দেহং; তদাশ্রয়ং চৈব বিভর্তি রূপম্

খং বায়ুমগ্নিং সলিলং তথোর্বীং; সমন্ততোঽভ্যাবিশতে শরীরী
নানাশ্রয়াঃ কর্মসু বর্তমানাঃ; শ্রোত্রাদয়ঃ পঞ্চ গুণাঞ্শ্রয়ন্তে

শ্রোত্রং খতো ঘ্রাণমথো পৃথিব্যা;স্তেজোময়ং রূপমথো বিপাকঃ
জলাশ্রয়ঃ স্বেদ উক্তো রসশ্চ; বায্বাত্মকঃ স্পর্শকৃতো গুণশ্চ

মহত্সু ভূতেষু বসন্তি পঞ্চ; পঞ্চেন্দ্রিয়ার্থাশ্চ তথেন্দ্রিয়েষু
সর্বাণি চৈতানি মনোনুগানি; বুদ্ধিং মনোঽন্বেতি মনঃ স্বভাবম্

শুভাশুভং কর্ম কৃতং যদস্য; তদেব প্রত্যাদদতে স্বদেহে
মনোঽনুবর্তন্তি পরাবরাণি; জলৌকসঃ স্রোত ইবানুকূলম্

চলং যথা দৃষ্টিপথং পরৈতি; সূক্ষ্মং মহদ্রূপমিবাভিপাতি
স্বরূপমালোচয়তে চ রূপং; পরং তথা বুদ্ধিপথং পরৈতি