অধ্যায় 196

196.1

মনুরুবাচ
যদিন্দ্রিয়ৈস্তূপকৃতান্পুরস্তা;ত্প্রাপ্তান্গুণান্সংস্মরতে চিরায়
তেষ্বিন্দ্রিয়েষূপহতেষু পশ্চা;ত্স বুদ্ধিরূপঃ পরমঃ স্বভাবঃ

যথেন্দ্রিয়ার্থান্যুগপত্সমস্তা;ন্নাবেক্ষতে কৃত্স্নমতুল্যকালম্
যথাবলং সংচরতে স বিদ্বাং;স্তস্মাত্স একঃ পরমঃ শরীরী

রজস্তমঃ সত্ত্বমথো তৃতীয়ং; গচ্ছত্যসৌ জ্ঞানগুণান্বিরূপান্
তথেন্দ্রিয়াণ্যাবিশতে শরীরী; হুতাশনং বায়ুরিবেন্ধনস্থম্

ন চক্ষুষা পশ্যতি রূপমাত্মনো; ন পশ্যতি স্পর্শনমিন্দ্রিয়েন্দ্রিয়ম্
ন শ্রোত্রলিঙ্গং শ্রবণে নিদর্শনং; তথাগতং পশ্যতি তদ্বিনশ্যতি

শ্রোত্রাদীনি ন পশ্যন্তি স্বং স্বমাত্মানমাত্মনা
সর্বজ্ঞঃ সর্বদর্শী চ ক্ষেত্রজ্ঞস্তানি পশ্যতি

যথা হিমবতঃ পার্শ্বং পৃষ্ঠং চন্দ্রমসো যথা
ন দৃষ্টপূর্বং মনুজৈর্ন চ তন্নাস্তি তাবতা

তদ্বদ্ভূতেষু ভূতাত্মা সূক্ষ্মো জ্ঞানাত্মবানসৌ
অদৃষ্টপূর্বশ্চক্ষুর্ভ্যাং ন চাসৌ নাস্তি তাবতা

পশ্যন্নপি যথা লক্ষ্ম জগত্সোমে ন বিন্দতি
এবমস্তি ন বেত্যেতন্ন চ তন্ন পরায়ণম্

রূপবন্তমরূপত্বাদুদয়াস্তময়ে বুধাঃ
ধিয়া সমনুপশ্যন্তি তদ্গতাঃ সবিতুর্গতিম্

তথা বুদ্ধিপ্রদীপেন দূরস্থং সুবিপশ্চিতঃ
প্রত্যাসন্নং নিনীষন্তি জ্ঞেয়ং জ্ঞানাভিসংহিতম্

ন হি খল্বনুপায়েন কশ্চিদর্থোঽভিসিধ্যতি
সূত্রজালৈর্যথা মত্স্যান্বধ্নন্তি জলজীবিনঃ

মৃগৈর্মৃগাণাং গ্রহণং পক্ষিণাং পক্ষিভির্যথা
গজানাং চ গজৈরেবং জ্ঞেয়ং জ্ঞানেন গৃহ্যতে

অহিরেব হ্যহেঃ পাদান্পশ্যতীতি নিদর্শনম্
তদ্বন্মূর্তিষু মূর্তিষ্ঠং জ্ঞেয়ং জ্ঞানেন পশ্যতি

নোত্সহন্তে যথা বেত্তুমিন্দ্রিয়ৈরিন্দ্রিয়াণ্যপি
তথৈবেহ পরা বুদ্ধিঃ পরং বুদ্ধ্যা ন পশ্যতি

যথা চন্দ্রো হ্যমাবাস্যামলিঙ্গত্বান্ন দৃশ্যতে
ন চ নাশোঽস্য ভবতি তথা বিদ্ধি শরীরিণম্

ক্ষীণকোশো হ্যমাবাস্যাং চন্দ্রমা ন প্রকাশতে
তদ্বন্মূর্তিবিয়ুক্তঃ সঞ্শরীরী নোপলভ্যতে

যথা কোশান্তরং প্রাপ্য চন্দ্রমা ভ্রাজতে পুনঃ
তদ্বল্লিঙ্গান্তরং প্রাপ্য শরীরী ভ্রাজতে পুনঃ

জন্মবৃদ্ধিক্ষয়শ্চাস্য প্রত্যক্ষেণোপলভ্যতে
সা তু চন্দ্রমসো ব্যক্তির্ন তু তস্য শরীরিণঃ

উত্পত্তিবৃদ্ধিব্যয়তো যথা স ইতি গৃহ্যতে
চন্দ্র এব ত্বমাবাস্যাং তথা ভবতি মূর্তিমান্

নাভিসর্পদ্বিমুঞ্চদ্বা শশিনং দৃশ্যতে তমঃ
বিসৃজংশ্চোপসর্পংশ্চ তদ্বত্পশ্য শরীরিণম্

যথা চন্দ্রার্কসংয়ুক্তং তমস্তদুপলভ্যতে
তদ্বচ্ছরীরসংয়ুক্তঃ শরীরীত্যুপলভ্যতে

যথা চন্দ্রার্কনির্মুক্তঃ স রাহুর্নোপলভ্যতে
তদ্বচ্ছরীরনির্মুক্তঃ শরীরী নোপলভ্যতে

যথা চন্দ্রো হ্যমাবাস্যাং নক্ষত্রৈর্যুজ্যতে গতঃ
তদ্বচ্ছরীরনির্মুক্তঃ ফলৈর্যুজ্যতি কর্মণঃ