অধ্যায় 197

197.1

মনুরুবাচ
যথা ব্যক্তমিদং শেতে স্বপ্নে চরতি চেতনম্
জ্ঞানমিন্দ্রিয়সংয়ুক্তং তদ্বত্প্রেত্য ভবাভবৌ

যথাম্ভসি প্রসন্নে তু রূপং পশ্যতি চক্ষুষা
তদ্বত্প্রসন্নেন্দ্রিয়বাঞ্জ্ঞেয়ং জ্ঞানেন পশ্যতি

স এব লুলিতে তস্মিন্যথা রূপং ন পশ্যতি
তথেন্দ্রিয়াকুলীভাবে জ্ঞেয়ং জ্ঞানে ন পশ্যতি

অবুদ্ধিরজ্ঞানকৃতা অবুদ্ধ্যা দুষ্যতে মনঃ
দুষ্টস্য মনসঃ পঞ্চ সংপ্রদুষ্যন্তি মানসাঃ

অজ্ঞানতৃপ্তো বিষয়েষ্ববগাঢো ন দৃশ্যতে
অদৃষ্ট্বৈব তু পূতাত্মা বিষয়েভ্যো নিবর্ততে

তর্ষচ্ছেদো ন ভবতি পুরুষস্যেহ কল্মষাৎ
নিবর্ততে তথা তর্ষঃ পাপমন্তং গতং যথা

বিষয়েষু চ সংসর্গাচ্ছাশ্বতস্য নসংশ্রয়াৎ
মনসা চান্যদাকাঙ্ক্ষন্পরং ন প্রতিপদ্যতে

জ্ঞানমুত্পদ্যতে পুংসাং ক্ষয়াত্পাপস্য কর্মণঃ
অথাদর্শতলপ্রখ্যে পশ্যত্যাত্মানমাত্মনি

প্রসৃতৈরিন্দ্রিয়ৈর্দুঃখী তৈরেব নিয়তৈঃ সুখী
তস্মাদিন্দ্রিয়রূপেভ্যো যচ্ছেদাত্মানমাত্মনা

ইন্দ্রিয়েভ্যো মনঃ পূর্বং বুদ্ধিঃ পরতরা ততঃ
বুদ্ধেঃ পরতরং জ্ঞানং জ্ঞানাত্পরতরং পরম্

অব্যক্তাত্প্রসৃতং জ্ঞানং ততো বুদ্ধিস্ততো মনঃ
মনঃ শ্রোত্রাদিভির্যুক্তং শব্দাদীন্সাধু পশ্যতি

যস্তাংস্ত্যজতি শব্দাদীন্সর্বাশ্চ ব্যক্তয়স্তথা
বিমুঞ্চত্যাকৃতিগ্রামাংস্তান্মুক্ত্বামৃতমশ্নুতে

উদ্যন্হি সবিতা যদ্বত্সৃজতে রশ্মিমণ্ডলম্
স এবাস্তমুপাগচ্ছংস্তদেবাত্মনি যচ্ছতি

অন্তরাত্মা তথা দেহমাবিশ্যেন্দ্রিয়রশ্মিভিঃ
প্রাপ্যেন্দ্রিয়গুণান্পঞ্চ সোঽস্তমাবৃত্য গচ্ছতি

প্রণীতং কর্মণা মার্গং নীয়মানঃ পুনঃ পুনঃ
প্রাপ্নোত্যয়ং কর্মফলং প্রবৃদ্ধং ধর্মমাত্মবান্

বিষয়া বিনিবর্তন্তে নিরাহারস্য দেহিনঃ
রসবর্জং রসোঽপ্যস্য পরং দৃষ্ট্বা নিবর্ততে

বুদ্ধিঃ কর্মগুণৈর্হীনা যদা মনসি বর্ততে
তদা সংপদ্যতে ব্রহ্ম তত্রৈব প্রলয়ং গতম্

অস্পর্শনমশৃণ্বানমনাস্বাদমদর্শনম্
অঘ্রাণমবিতর্কং চ সত্ত্বং প্রবিশতে পরম্

মনস্যাকৃতয়ো মগ্না মনস্ত্বতিগতং মতিম্
মতিস্ত্বতিগতা জ্ঞানং জ্ঞানং ত্বভিগতং পরম্

ইন্দ্রিয়ৈর্মনসঃ সিদ্ধির্ন বুদ্ধিং বুধ্যতে মনঃ
ন বুদ্ধির্বুধ্যতেঽব্যক্তং সূক্ষ্মস্ত্বেতানি পশ্যতি