অধ্যায় 198

198.1

মনুরুবাচ
জ্ঞানং জ্ঞেয়াভিনির্বৃত্তং বিদ্ধি জ্ঞানগুণং মনঃ
প্রজ্ঞাকরণসংয়ুক্তং ততো বুদ্ধিঃ প্রবর্ততে

যদা কর্মগুণোপেতা বুদ্ধির্মনসি বর্ততে
তদা প্রজ্ঞায়তে ব্রহ্ম ধ্যানয়োগসমাধিনা

সেয়ং গুণবতী বুদ্ধির্গুণেষ্বেবাভিবর্ততে
অবতারাভিনিঃস্রোতং গিরেঃ শৃঙ্গাদিবোদকম্

যদা নির্গুণমাপ্নোতি ধ্যানং মনসি পূর্বজম্
তদা প্রজ্ঞায়তে ব্রহ্ম নিকষ্যং নিকষে যথা

মনস্ত্বপহৃতং বুদ্ধিমিন্দ্রিয়ার্থনিদর্শনম্
ন সমক্ষং গুণাবেক্ষি নির্গুণস্য নিদর্শনম্

সর্বাণ্যেতানি সংবার্য দ্বারাণি মনসি স্থিতঃ
মনস্যেকাগ্রতাং কৃত্বা তত্পরং প্রতিপদ্যতে

যথা মহান্তি ভূতানি নিবর্তন্তে গুণক্ষয়ে
তথেন্দ্রিয়াণ্যুপাদায় বুদ্ধির্মনসি বর্ততে

যদা মনসি সা বুদ্ধির্বর্ততেঽন্তরচারিণী
ব্যবসায়গুণোপেতা তদা সংপদ্যতে মনঃ

গুণবদ্ভির্গুণোপেতং যদা ধ্যানগুণং মনঃ
তদা সর্বগুণান্হিত্বা নির্গুণং প্রতিপদ্যতে

অব্যক্তস্যেহ বিজ্ঞানে নাস্তি তুল্যং নিদর্শনম্
যত্র নাস্তি পদন্যাসঃ কস্তং বিষয়মাপ্নুয়াৎ

তপসা চানুমানেন গুণৈর্জাত্যা শ্রুতেন চ
নিনীষেত্তত্পরং ব্রহ্ম বিশুদ্ধেনান্তরাত্মনা

গুণহীনো হি তং মার্গং বহিঃ সমনুবর্ততে
গুণাভাবাত্প্রকৃত্যা চ নিস্তর্ক্যং জ্ঞেয়সংমিতম্

নৈর্গুণ্যাদ্ব্রহ্ম চাপ্নোতি সগুণত্বান্নিবর্ততে
গুণপ্রসারিণী বুদ্ধির্হুতাশন ইবেন্ধনে

যথা পঞ্চ বিমুক্তানি ইন্দ্রিয়াণি স্বকর্মভিঃ
তথা তত্পরমং ব্রহ্ম বিমুক্তং প্রকৃতেঃ পরম্

এবং প্রকৃতিতঃ সর্বে প্রভবন্তি শরীরিণঃ
নিবর্তন্তে নিবৃত্তৌ চ সর্গং নৈবোপয়ান্তি চ

পুরুষঃ প্রকৃতির্বুদ্ধির্বিশেষাশ্চেন্দ্রিয়াণি চ
অহংকারোঽভিমানশ্চ সংভূতো ভূতসংজ্ঞকঃ

একস্যাদ্যা প্রবৃত্তিস্তু প্রধানাত্সংপ্রবর্ততে
দ্বিতীয়া মিথুনব্যক্তিমবিশেষান্নিয়চ্ছতি

ধর্মাদুত্কৃষ্যতে শ্রেয়স্তথাশ্রেয়োঽপ্যধর্মতঃ
রাগবান্প্রকৃতিং হ্যেতি বিরক্তো জ্ঞানবান্ভবেৎ