Utshovঅধ্যায় 199
199.1
মনুরুবাচ
যদা তে পঞ্চভিঃ পঞ্চ বিমুক্তা মনসা সহ
অথ তদ্দ্রক্ষ্যসে ব্রহ্ম মণৌ সূত্রমিবার্পিতম্
199.2
তদেব চ যথা সূত্রং সুবর্ণে বর্ততে পুনঃ
মুক্তাস্বথ প্রবালেষু মৃন্ময়ে রাজতে তথা
199.3
তদ্বদ্গোষু মনুষ্যেষু তদ্বদ্ধস্তিমৃগাদিষু
তদ্বত্কীটপতংগেষু প্রসক্তাত্মা স্বকর্মভিঃ
199.4
যেন যেন শরীরেণ যদ্যত্কর্ম করোত্যয়ম্
তেন তেন শরীরেণ তত্তত্ফলমুপাশ্নুতে
199.5
যথা হ্যেকরসা ভূমিরোষধ্যাত্মানুসারিণী
তথা কর্মানুগা বুদ্ধিরন্তরাত্মানুদর্শিনী
199.6
জ্ঞানপূর্বোদ্ভবা লিপ্সা লিপ্সাপূর্বাভিসংধিতা
অভিসংধিপূর্বকং কর্ম কর্মমূলং ততঃ ফলম্
199.7
ফলং কর্মাত্মকং বিদ্যাত্কর্ম জ্ঞেয়াত্মকং তথা
জ্ঞেয়ং জ্ঞানাত্মকং বিদ্যাজ্জ্ঞানং সদসদাত্মকম্
199.8
জ্ঞানানাং চ ফলানাং চ জ্ঞেয়ানাং কর্মণাং তথা
ক্ষয়ান্তে তত্ফলং দিব্যং জ্ঞানং জ্ঞেয়প্রতিষ্ঠিতম্
199.9
মহদ্ধি পরমং ভূতং যুক্তাঃ পশ্যন্তি যোগিনঃ
অবুধাস্তং ন পশ্যন্তি হ্যাত্মস্থা গুণবুদ্ধয়ঃ
199.10
পৃথিবীরূপতো রূপমপামিহ মহত্তরম্
অদ্ভ্যো মহত্তরং তেজস্তেজসঃ পবনো মহান্
199.11
পবনাচ্চ মহদ্ব্যোম তস্মাত্পরতরং মনঃ
মনসো মহতী বুদ্ধির্বুদ্ধেঃ কালো মহান্স্মৃতঃ
199.12
কালাত্স ভগবান্বিষ্ণুর্যস্য সর্বমিদং জগৎ
নাদির্ন মধ্যং নৈবান্তস্তস্য দেবস্য বিদ্যতে
199.13
অনাদিত্বাদমধ্যত্বাদনন্তত্বাচ্চ সোঽব্যয়ঃ
অত্যেতি সর্বদুঃখানি দুঃখং হ্যন্তবদুচ্যতে
199.14
তদ্ব্রহ্ম পরমং প্রোক্তং তদ্ধাম পরমং স্মৃতম্
তদ্গত্বা কালবিষয়াদ্বিমুক্তা মোক্ষমাশ্রিতাঃ
199.15
গুণৈস্ত্বেতৈঃ প্রকাশন্তে নির্গুণত্বাত্ততঃ পরম্
নিবৃত্তিলক্ষণো ধর্মস্তথানন্ত্যায় কল্পতে
199.16
ঋচো যজূংষি সামানি শরীরাণি ব্যপাশ্রিতাঃ
জিহ্বাগ্রেষু প্রবর্তন্তে যত্নসাধ্যা বিনাশিনঃ
199.17
ন চৈবমিষ্যতে ব্রহ্ম শরীরাশ্রয়সংভবম্
ন যত্নসাধ্যং তদ্ব্রহ্ম নাদিমধ্যং ন চান্তবৎ
199.18
ঋচামাদিস্তথা সাম্নাং যজুষামাদিরুচ্যতে
অন্তশ্চাদিমতাং দৃষ্টো ন চাদির্ব্রহ্মণঃ স্মৃতঃ
199.19
অনাদিত্বাদনন্তত্বাত্তদনন্তমথাব্যয়ম্
অব্যয়ত্বাচ্চ নির্দ্বংদ্বং দ্বংদ্বাভাবাত্ততঃ পরম্
199.20
অদৃষ্টতোঽনুপায়াচ্চাপ্যভিসংধেশ্চ কর্মণঃ
ন তেন মর্ত্যাঃ পশ্যন্তি যেন গচ্ছন্তি তত্পরম্
199.21
বিষয়েষু চ সংসর্গাচ্ছাশ্বতস্য চ দর্শনাৎ
মনসা চান্যদাকাঙ্ক্ষন্পরং ন প্রতিপদ্যতে
199.22
গুণান্যদিহ পশ্যন্তি তদিচ্ছন্ত্যপরে জনাঃ
পরং নৈবাভিকাঙ্ক্ষন্তি নির্গুণত্বাদ্গুণার্থিনঃ
199.23
গুণৈর্যস্ত্ববরৈর্যুক্তঃ কথং বিদ্যাদ্গুণানিমান্
অনুমানাদ্ধি গন্তব্যং গুণৈরবয়বৈঃ সহ
199.24
সূক্ষ্মেণ মনসা বিদ্মো বাচা বক্তুং ন শক্নুমঃ
মনো হি মনসা গ্রাহ্যং দর্শনেন চ দর্শনম্
199.25
জ্ঞানেন নির্মলীকৃত্য বুদ্ধিং বুদ্ধ্যা তথা মনঃ
মনসা চেন্দ্রিয়গ্রামমনন্তং প্রতিপদ্যতে
199.26
বুদ্ধিপ্রহীণো মনসাসমৃদ্ধ;স্তথা নিরাশীর্গুণতামুপৈতি
পরং ত্যজন্তীহ বিলোভ্যমানা; হুতাশনং বায়ুরিবেন্ধনস্থম্
199.27
গুণাদানে বিপ্রয়োগে চ তেষাং; মনঃ সদা বুদ্ধিপরাবরাভ্যাম্
অনেনৈব বিধিনা সংপ্রবৃত্তো; গুণাদানে ব্রহ্মশরীরমেতি
199.28
অব্যক্তাত্মা পুরুষোঽব্যক্তকর্মা; সোঽব্যক্তত্বং গচ্ছতি হ্যন্তকালে
তৈরেবায়ং চেন্দ্রিয়ৈর্বর্ধমানৈ;র্গ্লায়দ্ভির্বা বর্ততে কর্মরূপঃ
199.29
সর্বৈরয়ং চেন্দ্রিয়ৈঃ সংপ্রয়ুক্তো; দেহঃ প্রাপ্তঃ পঞ্চভূতাশ্রয়ঃ স্যাৎ
নাসামর্থ্যাদ্গচ্ছতি কর্মণেহ; হীনস্তেন পরমেণাব্যয়েন
199.30
পৃথ্ব্যা নরঃ পশ্যতি নান্তমস্যা; হ্যন্তশ্চাস্যা ভবিতা চেতি বিদ্ধি
পরং নয়ন্তীহ বিলোভ্যমানং; যথা প্লবং বায়ুরিবার্ণবস্থম্
199.31
দিবাকরো গুণমুপলভ্য নির্গুণো; যথা ভবেদ্ব্যপগতরশ্মিমণ্ডলঃ
তথা হ্যসৌ মুনিরিহ নির্বিশেষবা;ন্স নির্গুণং প্রবিশতি ব্রহ্ম চাব্যয়ম্
199.32
অনাগতিং সুকৃতিমতাং পরাং গতিং; স্বয়ংভুবং প্রভবনিধানমব্যয়ম্
সনাতনং যদমৃতমব্যয়ং পদং; বিচার্য তং শমমমৃতত্বমশ্নুতে