Utshovঅধ্যায় 200
200.1
যুধিষ্ঠির উবাচ
পিতামহ মহাপ্রাজ্ঞ পুণ্ডরীকাক্ষমচ্যুতম্
কর্তারমকৃতং বিষ্ণুং ভূতানাং প্রভবাপ্যয়ম্
200.2
নারায়ণং হৃষীকেশং গোবিন্দমপরাজিতম্
তত্ত্বেন ভরতশ্রেষ্ঠ শ্রোতুমিচ্ছামি কেশবম্
200.3
ভীষ্ম উবাচ
শ্রুতোঽয়মর্থো রামস্য জামদগ্ন্যস্য জল্পতঃ
নারদস্য চ দেবর্ষেঃ কৃষ্ণদ্বৈপায়নস্য চ
200.4
অসিতো দেবলস্তাত বাল্মীকিশ্চ মহাতপাঃ
মার্কণ্ডেয়শ্চ গোবিন্দে কথয়ত্যদ্ভুতং মহৎ
200.5
কেশবো ভরতশ্রেষ্ঠ ভগবানীশ্বরঃ প্রভুঃ
পুরুষঃ সর্বমিত্যেব শ্রূয়তে বহুধা বিভুঃ
200.6
কিং তু যানি বিদুর্লোকে ব্রাহ্মণাঃ শার্ঙ্গধন্বনঃ
মাহাত্ম্যানি মহাবাহো শৃণু তানি যুধিষ্ঠির
200.7
যানি চাহুর্মনুষ্যেন্দ্র যে পুরাণবিদো জনাঃ
অশেষেণ হি গোবিন্দে কীর্তয়িষ্যামি তান্যহম্
200.8
মহাভূতানি ভূতাত্মা মহাত্মা পুরুষোত্তমঃ
বায়ুর্জ্যোতিস্তথা চাপঃ খং গাং চৈবান্বকল্পয়ৎ
200.9
স দৃষ্ট্বা পৃথিবীং চৈব সর্বভূতেশ্বরঃ প্রভুঃ
অপ্স্বেব শয়নং চক্রে মহাত্মা পুরুষোত্তমঃ
200.10
সর্বতেজোময়স্তস্মিঞ্শয়ানঃ শয়নে শুভে
সোঽগ্রজং সর্বভূতানাং সংকর্ষণমচিন্তয়ৎ
200.11
আশ্রয়ং সর্বভূতানাং মনসেতি বিশুশ্রুম
স ধারয়তি ভূতাত্মা উভে ভূতভবিষ্যতী
200.12
ততস্তস্মিন্মহাবাহো প্রাদুর্ভূতে মহাত্মনি
ভাস্করপ্রতিমং দিব্যং নাভ্যাং পদ্মমজায়ত
200.13
স তত্র ভগবান্দেবঃ পুষ্করে ভাসয়ন্দিশঃ
ব্রহ্মা সমভবত্তাত সর্বভূতপিতামহঃ
200.14
তস্মিন্নপি মহাবাহো প্রাদুর্ভূতে মহাত্মনি
তমসঃ পূর্বজো জজ্ঞে মধুর্নাম মহাসুরঃ
200.15
তমুগ্রমুগ্রকর্মাণমুগ্রাং বুদ্ধিং সমাস্থিতম্
ব্রহ্মণোপচিতিং কুর্বঞ্জঘান পুরুষোত্তমঃ
200.16
তস্য তাত বধাত্সর্বে দেবদানবমানবাঃ
মধুসূদনমিত্যাহুর্বৃষভং সর্বসাত্বতাম্
200.17
ব্রহ্মা তু সসৃজে পুত্রান্মানসান্দক্ষসপ্তমান্
মরীচিমত্র্যঙ্গিরসৌ পুলস্ত্যং পুলহং ক্রতুম্
200.18
মরীচিঃ কশ্যপং তাত পুত্রং চাসৃজদগ্রজম্
মানসং জনয়ামাস তৈজসং ব্রহ্মসত্তমম্
200.19
অঙ্গুষ্ঠাদসৃজদ্ব্রহ্মা মরীচেরপি পূর্বজম্
সোঽভবদ্ভরতশ্রেষ্ঠ দক্ষো নাম প্রজাপতিঃ
200.20
তস্য পূর্বমজায়ন্ত দশ তিস্রশ্চ ভারত
প্রজাপতের্দুহিতরস্তাসাং জ্যেষ্ঠাভবদ্দিতিঃ
200.21
সর্বধর্মবিশেষজ্ঞঃ পুণ্যকীর্তির্মহায়শাঃ
মারীচঃ কশ্যপস্তাত সর্বাসামভবত্পতিঃ
200.22
উত্পাদ্য তু মহাভাগস্তাসামবরজা দশ
দদৌ ধর্মায় ধর্মজ্ঞো দক্ষ এব প্রজাপতিঃ
200.23
ধর্মস্য বসবঃ পুত্রা রুদ্রাশ্চামিততেজসঃ
বিশ্বেদেবাশ্চ সাধ্যাশ্চ মরুত্বন্তশ্চ ভারত
200.24
অপরাস্তু যবীয়স্যস্তাভ্যোঽন্যাঃ সপ্তবিংশতিঃ
সোমস্তাসাং মহাভাগঃ সর্বাসামভবত্পতিঃ
200.25
ইতরাস্তু ব্যজায়ন্ত গন্ধর্বাংস্তুরগান্দ্বিজান্
গাশ্চ কিংপুরুষান্মত্স্যানৌদ্ভিদাংশ্চ বনস্পতীন্
200.26
আদিত্যানদিতির্জজ্ঞে দেবশ্রেষ্ঠান্মহাবলান্
তেষাং বিষ্ণুর্বামনোঽভূদ্গোবিন্দশ্চাভবত্প্রভুঃ
200.27
তস্য বিক্রমণাদেব দেবানাং শ্রীর্ব্যবর্ধত
দানবাশ্চ পরাভূতা দৈতেয়ী চাসুরী প্রজা
200.28
বিপ্রচিত্তিপ্রধানাংশ্চ দানবানসৃজদ্দনুঃ
দিতিস্তু সর্বানসুরান্মহাসত্ত্বান্ব্যজায়ত
200.29
অহোরাত্রং চ কালং চ যথর্তু মধুসূদনঃ
পূর্বাহ্ণং চাপরাহ্ণং চ সর্বমেবান্বকল্পয়ৎ
200.30
বুদ্ধ্যাপঃ সোঽসৃজন্মেঘাংস্তথা স্থাবরজঙ্গমান্
পৃথিবীং সোঽসৃজদ্বিশ্বাং সহিতাং ভূরিতেজসা
200.31
ততঃ কৃষ্ণো মহাবাহুঃ পুনরেব যুধিষ্ঠির
ব্রাহ্মণানাং শতং শ্রেষ্ঠং মুখাদসৃজত প্রভুঃ
200.32
বাহুভ্যাং ক্ষত্রিয়শতং বৈশ্যানামূরুতঃ শতম্
পদ্ভ্যাং শূদ্রশতং চৈব কেশবো ভরতর্ষভ
200.33
স এবং চতুরো বর্ণান্সমুত্পাদ্য মহায়শাঃ
অধ্যক্ষং সর্বভূতানাং ধাতারমকরোত্প্রভুঃ
200.34
যাবদ্যাবদভূচ্ছ্রদ্ধা দেহং ধারয়িতুং নৃণাম্
তাবত্তাবদজীবংস্তে নাসীদ্যমকৃতং ভয়ম্
200.35
ন চৈষাং মৈথুনো ধর্মো বভূব ভরতর্ষভ
সংকল্পাদেব চৈতেষামপত্যমুদপদ্যত
200.36
তত্র ত্রেতায়ুগে কালে সংকল্পাজ্জায়তে প্রজা
ন হ্যভূন্মৈথুনো ধর্মস্তেষামপি জনাধিপ
200.37
দ্বাপরে মৈথুনো ধর্মঃ প্রজানামভবন্নৃপ
তথা কলিয়ুগে রাজন্দ্বংদ্বমাপেদিরে জনাঃ
200.38
এষ ভূতপতিস্তাত স্বধ্যক্ষশ্চ প্রকীর্তিতঃ
নিরধ্যক্ষাংস্তু কৌন্তেয় কীর্তয়িষ্যামি তানপি
200.39
দক্ষিণাপথজন্মানঃ সর্বে তলবরান্ধ্রকাঃ
উত্সাঃ পুলিন্দাঃ শবরাশ্চূচুপা মণ্ডপৈঃ সহ
200.40
উত্তরাপথজন্মানঃ কীর্তয়িষ্যামি তানপি
যৌনকাম্বোজগান্ধারাঃ কিরাতা বর্বরৈঃ সহ
200.41
এতে পাপকৃতস্তাত চরন্তি পৃথিবীমিমাম্
শ্বকাকবলগৃধ্রাণাং সধর্মাণো নরাধিপ
200.42
নৈতে কৃতয়ুগে তাত চরন্তি পৃথিবীমিমাম্
ত্রেতাপ্রভৃতি বর্তন্তে তে জনা ভরতর্ষভ
200.43
ততস্তস্মিন্মহাঘোরে সংধ্যাকালে যুগান্তিকে
রাজানঃ সমসজ্জন্ত সমাসাদ্যেতরেতরম্
200.44
এবমেষ কুরুশ্রেষ্ঠ প্রাদুর্ভাবো মহাত্মনঃ
দেবদেবর্ষিরাচষ্ট নারদঃ সর্বলোকদৃক্
200.45
নারদোঽপ্যথ কৃষ্ণস্য পরং মেনে নরাধিপ
শাশ্বতত্বং মহাবাহো যথাবদ্ভরতর্ষভ
200.46
এবমেষ মহাবাহুঃ কেশবঃ সত্যবিক্রমঃ
অচিন্ত্যঃ পুণ্ডরীকাক্ষো নৈষ কেবলমানুষঃ