Utshovঅধ্যায় 201
201.1
যুধিষ্ঠির উবাচ
কে পূর্বমাসন্পতয়ঃ প্রজানাং ভরতর্ষভ
কে চর্ষয়ো মহাভাগা দিক্ষু প্রত্যেকশঃ স্মৃতাঃ
201.2
ভীষ্ম উবাচ
শ্রূয়তাং ভরতশ্রেষ্ঠ যন্মা ত্বং পরিপৃচ্ছসি
প্রজানাং পতয়ো যে স্ম দিক্ষু প্রত্যেকশঃ স্মৃতাঃ
201.3
একঃ স্বয়ংভূর্ভগবানাদ্যো ব্রহ্মা সনাতনঃ
ব্রহ্মণঃ সপ্ত পুত্রা বৈ মহাত্মানঃ স্বয়ংভুবঃ
201.4
মরীচিরত্র্যঙ্গিরসৌ পুলস্ত্যঃ পুলহঃ ক্রতুঃ
বসিষ্ঠশ্চ মহাভাগঃ সদৃশা বৈ স্বয়ংভুবা
201.5
সপ্ত ব্রহ্মাণ ইত্যেষ পুরাণে নিশ্চয়ো গতঃ
অত ঊর্ধ্বং প্রবক্ষ্যামি সর্বানেব প্রজাপতীন্
201.6
অত্রিবংশসমুত্পন্নো ব্রহ্ময়োনিঃ সনাতনঃ
প্রাচীনবর্হির্ভগবাংস্তস্মাত্প্রাচেতসো দশ
201.7
দশানাং তনয়স্ত্বেকো দক্ষো নাম প্রজাপতিঃ
তস্য দ্বে নামনী লোকে দক্ষঃ ক ইতি চোচ্যতে
201.8
মরীচেঃ কশ্যপঃ পুত্রস্তস্য দ্বে নামনী শ্রুতে
অরিষ্টনেমিরিত্যেকং কশ্যপেত্যপরং বিদুঃ
201.9
অঙ্গশ্চৈবৌরসঃ শ্রীমান্রাজা ভৌমশ্চ বীর্যবান্
সহস্রং যশ্চ দিব্যানাং যুগানাং পর্যুপাসিতা
201.10
অর্যমা চৈব ভগবান্যে চান্যে তনয়া বিভো
এতে প্রদেশাঃ কথিতা ভুবনানাং প্রভাবনাঃ
201.11
শশবিন্দোশ্চ ভার্যাণাং সহস্রাণি দশাচ্যুত
একৈকস্যাং সহস্রং তু তনয়ানামভূত্তদা
201.12
এবং শতসহস্রাণাং শতং তস্য মহাত্মনঃ
পুত্রাণাং ন চ তে কংচিদিচ্ছন্ত্যন্যং প্রজাপতিম্
201.13
প্রজামাচক্ষতে বিপ্রাঃ পৌরাণীং শাশবিন্দবীম্
স বৃষ্ণিবংশপ্রভবো মহান্বংশঃ প্রজাপতেঃ
201.14
এতে প্রজানাং পতয়ঃ সমুদ্দিষ্টা যশস্বিনঃ
অতঃ পরং প্রবক্ষ্যামি দেবাংস্ত্রিভুবনেশ্বরান্
201.15
ভগোংঽশশ্চার্যমা চৈব মিত্রোঽথ বরুণস্তথা
সবিতা চৈব ধাতা চ বিবস্বাংশ্চ মহাবলঃ
201.16
পূষা ত্বষ্টা তথৈবেন্দ্রো দ্বাদশো বিষ্ণুরুচ্যতে
ত এতে দ্বাদশাদিত্যাঃ কশ্যপস্যাত্মসংভবাঃ
201.17
নাসত্যশ্চৈব দস্রশ্চ স্মৃতৌ দ্বাবশ্বিনাবপি
মার্তাণ্ডস্যাত্মজাবেতাবষ্টমস্য প্রজাপতেঃ
201.18
ত্বষ্টুশ্চৈবাত্মজঃ শ্রীমান্বিশ্বরূপো মহায়শাঃ
অজৈকপাদহির্বুধ্ন্যো বিরূপাক্ষোঽথ রৈবতঃ
201.19
হরশ্চ বহুরূপশ্চ ত্র্যম্বকশ্চ সুরেশ্বরঃ
সাবিত্রশ্চ জয়ন্তশ্চ পিনাকী চাপরাজিতঃ
পূর্বমেব মহাভাগা বসবোঽষ্টৌ প্রকীর্তিতাঃ
201.20
এত এবংবিধা দেবা মনোরেব প্রজাপতেঃ
তে চ পূর্বে সুরাশ্চেতি দ্বিবিধাঃ পিতরঃ স্মৃতাঃ
201.21
শীলরূপরতাস্ত্বন্যে তথান্যে সিদ্ধসাধ্যয়োঃ
ঋভবো মরুতশ্চৈব দেবানাং চোদিতা গণাঃ
201.22
এবমেতে সমাম্নাতা বিশ্বেদেবাস্তথাশ্বিনৌ
আদিত্যাঃ ক্ষত্রিয়াস্তেষাং বিশস্তু মরুতস্তথা
201.23
অশ্বিনৌ তু মতৌ শূদ্রৌ তপস্যুগ্রে সমাহিতৌ
স্মৃতাস্ত্বঙ্গিরসো দেবা ব্রাহ্মণা ইতি নিশ্চয়ঃ
ইত্যেতত্সর্বদেবানাং চাতুর্বর্ণ্যং প্রকীর্তিতম্
201.24
এতান্বৈ প্রাতরুত্থায় দেবান্যস্তু প্রকীর্তয়েৎ
স্বজাদন্যকৃতাচ্চৈব সর্বপাপাত্প্রমুচ্যতে
201.25
যবক্রীতোঽথ রৈভ্যশ্চ অর্বাবসুপরাবসূ
ঔশিজশ্চৈব কক্ষীবান্নলশ্চাঙ্গিরসঃ সুতাঃ
201.26
ঋষের্মেধাতিথেঃ পুত্রঃ কণ্বো বর্হিষদস্তথা
ত্রৈলোক্যভাবনাস্তাত প্রাচ্যাং সপ্তর্ষয়স্তথা
201.27
উন্মুচো বিমুচশ্চৈব স্বস্ত্যাত্রেয়শ্চ বীর্যবান্
প্রমুচশ্চেধ্মবাহশ্চ ভগবাংশ্চ দৃঢব্রতঃ
201.28
মিত্রাবরুণয়োঃ পুত্রস্তথাগস্ত্যঃ প্রতাপবান্
এতে ব্রহ্মর্ষয়ো নিত্যমাশ্রিতা দক্ষিণাং দিশম্
201.29
রুষদ্গুঃ কবষো ধৌম্যঃ পরিব্যাধশ্চ বীর্যবান্
একতশ্চ দ্বিতশ্চৈব ত্রিতশ্চৈব মহর্ষয়ঃ
201.30
অত্রেঃ পুত্রশ্চ ভগবাংস্তথা সারস্বতঃ প্রভুঃ
এতে নব মহাত্মানঃ পশ্চিমামাশ্রিতা দিশম্
201.31
আত্রেয়শ্চ বসিষ্ঠশ্চ কশ্যপশ্চ মহানৃষিঃ
গৌতমঃ সভরদ্বাজো বিশ্বামিত্রোঽথ কৌশিকঃ
201.32
তথৈব পুত্রো ভগবানৃচীকস্য মহাত্মনঃ
জমদগ্নিশ্চ সপ্তৈতে উদীচীং দিশমাশ্রিতাঃ
201.33
এতে প্রতিদিশং সর্বে কীর্তিতাস্তিগ্মতেজসঃ
সাক্ষিভূতা মহাত্মানো ভুবনানাং প্রভাবনাঃ
201.34
এবমেতে মহাত্মানঃ স্থিতাঃ প্রত্যেকশো দিশঃ
এতেষাং কীর্তনং কৃত্বা সর্বপাপৈঃ প্রমুচ্যতে
201.35
যস্যাং যস্যাং দিশি হ্যেতে তাং দিশং শরণং গতঃ
মুচ্যতে সর্বপাপেভ্যঃ স্বস্তিমাংশ্চ গৃহান্ব্রজেৎ