Utshovঅধ্যায় 202
202.1
যুধিষ্ঠির উবাচ
পিতামহ মহাপ্রাজ্ঞ যুধি সত্যপরাক্রম
শ্রোতুমিচ্ছামি কার্ত্স্ন্যেন কৃষ্ণমব্যয়মীশ্বরম্
202.2
যচ্চাস্য তেজঃ সুমহদ্যচ্চ কর্ম পুরাতনম্
তন্মে সর্বং যথাতত্ত্বং প্রব্রূহি ভরতর্ষভ
202.3
তির্যগ্যোনিগতং রূপং কথং ধারিতবান্হরিঃ
কেন কার্যবিসর্গেণ তন্মে ব্রূহি পিতামহ
202.4
ভীষ্ম উবাচ
পুরাহং মৃগয়াং যাতো মার্কণ্ডেয়াশ্রমে স্থিতঃ
তত্রাপশ্যং মুনিগণান্সমাসীনান্সহস্রশঃ
202.5
ততস্তে মধুপর্কেণ পূজাং চক্রুরথো ময়ি
প্রতিগৃহ্য চ তাং পূজাং প্রত্যনন্দমৃষীনহম্
202.6
কথৈষা কথিতা তত্র কশ্যপেন মহর্ষিণা
মনঃপ্রহ্লাদিনীং দিব্যাং তামিহৈকমনাঃ শৃণু
202.7
পুরা দানবমুখ্যা হি ক্রোধলোভসমন্বিতাঃ
বলেন মত্তাঃ শতশো নরকাদ্যা মহাসুরাঃ
202.8
তথৈব চান্যে বহবো দানবা যুদ্ধদুর্মদাঃ
ন সহন্তে স্ম দেবানাং সমৃদ্ধিং তামনুত্তমাম্
202.9
দানবৈরর্দ্যমানাস্তু দেবা দেবর্ষয়স্তথা
ন শর্ম লেভিরে রাজন্বিশমানাস্ততস্ততঃ
202.10
পৃথিবীং চার্তরূপাং তে সমপশ্যন্দিবৌকসঃ
দানবৈরভিসংকীর্ণাং ঘোররূপৈর্মহাবলৈঃ
ভারার্তামপকৃষ্টাং চ দুঃখিতাং সংনিমজ্জতীম্
202.11
অথাদিতেয়াঃ সংত্রস্তা ব্রহ্মাণমিদমব্রুবন্
কথং শক্যামহে ব্রহ্মন্দানবৈরুপমর্দনম্
202.12
স্বয়ংভূস্তানুবাচেদং নিসৃষ্টোঽত্র বিধির্ময়া
তে বরেণাভিসংমত্তা বলেন চ মদেন চ
202.13
নাবভোত্স্যন্তি সংমূঢা বিষ্ণুমব্যক্তদর্শনম্
বরাহরূপিণং দেবমধৃষ্যমমরৈরপি
202.14
এষ বেগেন গত্বা হি যত্র তে দানবাধমাঃ
অন্তর্ভূমিগতা ঘোরা নিবসন্তি সহস্রশঃ
শময়িষ্যতি শ্রুত্বা তে জহৃষুঃ সুরসত্তমাঃ
202.15
ততো বিষ্ণুর্মহাতেজা বারাহং রূপমাশ্রিতঃ
অন্তর্ভূমিং সংপ্রবিশ্য জগাম দিতিজান্প্রতি
202.16
দৃষ্ট্বা চ সহিতাঃ সর্বে দৈত্যাঃ সত্ত্বমমানুষম্
প্রসহ্য সহসা সর্বে সংতস্থুঃ কালমোহিতাঃ
202.17
সর্বে চ সমভিদ্রুত্য বরাহং জগৃহুঃ সমম্
সংক্রুদ্ধাশ্চ বরাহং তং ব্যকর্ষন্ত সমন্ততঃ
202.18
দানবেন্দ্রা মহাকায়া মহাবীর্যা বলোচ্ছ্রিতাঃ
নাশক্নুবংশ্চ কিংচিত্তে তস্য কর্তুং তদা বিভো
202.19
ততোঽগমন্বিস্ময়ং তে দানবেন্দ্রা ভয়াত্তদা
সংশয়ং গতমাত্মানং মেনিরে চ সহস্রশঃ
202.20
ততো দেবাদিদেবঃ স যোগাত্মা যোগসারথিঃ
যোগমাস্থায় ভগবাংস্তদা ভরতসত্তম
202.21
বিননাদ মহানাদং ক্ষোভয়ন্দৈত্যদানবান্
সংনাদিতা যেন লোকাঃ সর্বাশ্চৈব দিশো দশ
202.22
তেন সংনাদশব্দেন লোকাঃ সংক্ষোভমাগমন্
সংভ্রান্তাশ্চ দিশঃ সর্বা দেবাঃ শক্রপুরোগমাঃ
202.23
নির্বিচেষ্টং জগচ্চাপি বভূবাতিভৃশং তদা
স্থাবরং জঙ্গমং চৈব তেন নাদেন মোহিতম্
202.24
ততস্তে দানবাঃ সর্বে তেন শব্দেন ভীষিতাঃ
পেতুর্গতাসবশ্চৈব বিষ্ণুতেজোবিমোহিতাঃ
202.25
রসাতলগতাংশ্চৈব বরাহস্ত্রিদশদ্বিষঃ
খুরৈঃ সংদারয়ামাস মাংসমেদোস্থিসংচয়ম্
202.26
নাদেন তেন মহতা সনাতন ইতি স্মৃতঃ
পদ্মনাভো মহায়োগী ভূতাচার্যঃ স ভূতরাট্
202.27
ততো দেবগণাঃ সর্বে পিতামহমুপাব্রুবন্
নাদোঽয়ং কীদৃশো দেব নৈনং বিদ্ম বয়ং বিভো
কোঽসৌ হি কস্য বা নাদো যেন বিহ্বলিতং জগৎ
202.28
এতস্মিন্নন্তরে বিষ্ণুর্বারাহং রূপমাস্থিতঃ
উদতিষ্ঠন্মহাদেবঃ স্তূয়মানো মহর্ষিভিঃ
202.29
পিতামহ উবাচ
নিহত্য দানবপতীন্মহাবর্ষ্মা মহাবলঃ
এষ দেবো মহায়োগী ভূতাত্মা ভূতভাবনঃ
202.30
সর্বভূতেশ্বরো যোগী যোনিরাত্মা তথাত্মনঃ
স্থিরীভবত কৃষ্ণোঽয়ং সর্বপাপপ্রণাশনঃ
202.31
কৃত্বা কর্মাতিসাধ্বেতদশক্যমমিতপ্রভঃ
সমায়াতঃ স্বমাত্মানং মহাভাগো মহাদ্যুতিঃ
পদ্মনাভো মহায়োগী ভূতাত্মা ভূতভাবনঃ
202.32
ন সংতাপো ন ভীঃ কার্যা শোকো বা সুরসত্তমাঃ
বিধিরেষ প্রভাবশ্চ কালঃ সংক্ষয়কারকঃ
লোকান্ধারয়তানেন নাদো মুক্তো মহাত্মনা
202.33
স এব হি মহাভাগঃ সর্বলোকনমস্কৃতঃ
অচ্যুতঃ পুণ্ডরীকাক্ষঃ সর্বভূতসমুদ্ভবঃ