Utshovঅধ্যায় 203
203.1
যুধিষ্ঠির উবাচ
যোগং মে পরমং তাত মোক্ষস্য বদ ভারত
তমহং তত্ত্বতো জ্ঞাতুমিচ্ছামি বদতাং বর
203.2
ভীষ্ম উবাচ
অত্রাপ্যুদাহরন্তীমমিতিহাসং পুরাতনম্
সংবাদং মোক্ষসংয়ুক্তং শিষ্যস্য গুরুণা সহ
203.3
কশ্চিদ্ব্রাহ্মণমাসীনমাচার্যমৃষিসত্তমম্
শিষ্যঃ পরমমেধাবী শ্রেয়োর্থী সুসমাহিতঃ
চরণাবুপসংগৃহ্য স্থিতঃ প্রাঞ্জলিরব্রবীৎ
203.4
উপাসনাত্প্রসন্নোঽসি যদি বৈ ভগবন্মম
সংশয়ো মে মহান্কশ্চিত্তন্মে ব্যাখ্যাতুমর্হসি
203.5
কুতশ্চাহং কুতশ্চ ত্বং তত্সম্যগ্ব্রূহি যত্পরম্
কথং চ সর্বভূতেষু সমেষু দ্বিজসত্তম
সম্যগ্বৃত্তা নিবর্তন্তে বিপরীতাঃ ক্ষয়োদয়াঃ
203.6
বেদেষু চাপি যদ্বাক্যং লৌকিকং ব্যাপকং চ যৎ
এতদ্বিদ্বন্যথাতত্ত্বং সর্বং ব্যাখ্যাতুমর্হসি
203.7
গুরুরুবাচ
শৃণু শিষ্য মহাপ্রাজ্ঞ ব্রহ্মগুহ্যমিদং পরম্
অধ্যাত্মং সর্বভূতানামাগমানাং চ যদ্বসু
203.8
বাসুদেবঃ সর্বমিদং বিশ্বস্য ব্রহ্মণো মুখম্
সত্যং দানমথো যজ্ঞস্তিতিক্ষা দম আর্জবম্
203.9
পুরুষং সনাতনং বিষ্ণুং যত্তদ্বেদবিদো বিদুঃ
সর্গপ্রলয়কর্তারমব্যক্তং ব্রহ্ম শাশ্বতম্
তদিদং ব্রহ্ম বার্ষ্ণেয়মিতিহাসং শৃণুষ্ব মে
203.10
ব্রাহ্মণো ব্রাহ্মণৈঃ শ্রাব্যো রাজন্যঃ ক্ষত্রিয়ৈস্তথা
মাহাত্ম্যং দেবদেবস্য বিষ্ণোরমিততেজসঃ
অর্হস্ত্বমসি কল্যাণ বার্ষ্ণেয়ং শৃণু যত্পরম্
203.11
কালচক্রমনাদ্যন্তং ভাবাভাবস্বলক্ষণম্
ত্রৈলোক্যং সর্বভূতেষু চক্রবত্পরিবর্ততে
203.12
যত্তদক্ষরমব্যক্তমমৃতং ব্রহ্ম শাশ্বতম্
বদন্তি পুরুষব্যাঘ্রং কেশবং পুরুষর্ষভম্
203.13
পিতৄন্দেবানৃষীংশ্চৈব তথা বৈ যক্ষদানবান্
নাগাসুরমনুষ্যাংশ্চ সৃজতে পরমোঽব্যয়ঃ
203.14
তথৈব বেদশাস্ত্রাণি লোকধর্মাংশ্চ শাশ্বতান্
প্রলয়ে প্রকৃতিং প্রাপ্য যুগাদৌ সৃজতে প্রভুঃ
203.15
যথর্তুষ্বৃতুলিঙ্গানি নানারূপাণি পর্যয়ে
দৃশ্যন্তে তানি তান্যেব তথা ব্রহ্মাহরাত্রিষু
203.16
অথ যদ্যদ্যদা ভাবি কালয়োগাদ্যুগাদিষু
তত্তদুত্পদ্যতে জ্ঞানং লোকয়াত্রাবিধানজম্
203.17
যুগান্তেঽন্তর্হিতান্বেদান্সেতিহাসান্মহর্ষয়ঃ
লেভিরে তপসা পূর্বমনুজ্ঞাতাঃ স্বয়ংভুবা
203.18
বেদবিদ্বেদ ভগবান্বেদাঙ্গানি বৃহস্পতিঃ
ভার্গবো নীতিশাস্ত্রং চ জগাদ জগতো হিতম্
203.19
গান্ধর্বং নারদো বেদং ভরদ্বাজো ধনুর্গ্রহম্
দেবর্ষিচরিতং গার্গ্যঃ কৃষ্ণাত্রেয়শ্চিকিত্সিতম্
203.20
ন্যায়তন্ত্রাণ্যনেকানি তৈস্তৈরুক্তানি বাদিভিঃ
হেত্বাগমসদাচারৈর্যদুক্তং তদুপাস্যতে
203.21
অনাদ্যং যত্পরং ব্রহ্ম ন দেবা নর্ষয়ো বিদুঃ
একস্তদ্বেদ ভগবান্ধাতা নারায়ণঃ প্রভুঃ
203.22
নারায়ণাদৃষিগণাস্তথা মুখ্যাঃ সুরাসুরাঃ
রাজর্ষয়ঃ পুরাণাশ্চ পরমং দুঃখভেষজম্
203.23
পুরুষাধিষ্ঠিতং ভাবং প্রকৃতিঃ সূয়তে সদা
হেতুয়ুক্তমতঃ সর্বং জগত্সংপরিবর্ততে
203.24
দীপাদন্যে যথা দীপাঃ প্রবর্তন্তে সহস্রশঃ
প্রকৃতিঃ সৃজতে তদ্বদানন্ত্যান্নাপচীয়তে
203.25
অব্যক্তকর্মজা বুদ্ধিরহংকারং প্রসূয়তে
আকাশং চাপ্যহংকারাদ্বায়ুরাকাশসংভবঃ
203.26
বায়োস্তেজস্ততশ্চাপস্ত্বদ্ভ্যো হি বসুধোদ্গতা
মূলপ্রকৃতয়োঽষ্টৌ তা জগদেতাস্ববস্থিতম্
203.27
জ্ঞানেন্দ্রিয়াণ্যতঃ পঞ্চ পঞ্চ কর্মেন্দ্রিয়াণ্যপি
বিষয়াঃ পঞ্চ চৈকং চ বিকারে ষোডশং মনঃ
203.28
শ্রোত্রং ত্বক্চক্ষুষী জিহ্বা ঘ্রাণং পঞ্চেন্দ্রিয়াণ্যপি
পাদৌ পায়ুরুপস্থশ্চ হস্তৌ বাক্কর্মণামপি
203.29
শব্দঃ স্পর্শোঽথ রূপং চ রসো গন্ধস্তথৈব চ
বিজ্ঞেয়ং ব্যাপকং চিত্তং তেষু সর্বগতং মনঃ
203.30
রসজ্ঞানে তু জিহ্বেয়ং ব্যাহৃতে বাক্তথৈব চ
ইন্দ্রিয়ৈর্বিবিধৈর্যুক্তং সর্বং ব্যস্তং মনস্তথা
203.31
বিদ্যাত্তু ষোডশৈতানি দৈবতানি বিভাগশঃ
দেহেষু জ্ঞানকর্তারমুপাসীনমুপাসতে
203.32
তদ্বত্সোমগুণা জিহ্বা গন্ধস্তু পৃথিবীগুণঃ
শ্রোত্রং শব্দগুণং চৈব চক্ষুরগ্নের্গুণস্তথা
স্পর্শং বায়ুগুণং বিদ্যাত্সর্বভূতেষু সর্বদা
203.33
মনঃ সত্ত্বগুণং প্রাহুঃ সত্ত্বমব্যক্তজং তথা
সর্বভূতাত্মভূতস্থং তস্মাদ্বুধ্যেত বুদ্ধিমান্
203.34
এতে ভাবা জগত্সর্বং বহন্তি সচরাচরম্
শ্রিতা বিরজসং দেবং যমাহুঃ পরমং পদম্
203.35
নবদ্বারং পুরং পুণ্যমেতৈর্ভাবৈঃ সমন্বিতম্
ব্যাপ্য শেতে মহানাত্মা তস্মাত্পুরুষ উচ্যতে
203.36
অজরঃ সোঽমরশ্চৈব ব্যক্তাব্যক্তোপদেশবান্
ব্যাপকঃ সগুণঃ সূক্ষ্মঃ সর্বভূতগুণাশ্রয়ঃ
203.37
যথা দীপঃ প্রকাশাত্মা হ্রস্বো বা যদি বা মহান্
জ্ঞানাত্মানং তথা বিদ্যাত্পুরুষং সর্বজন্তুষু
203.38
সোঽত্র বেদয়তে বেদ্যং স শৃণোতি স পশ্যতি
কারণং তস্য দেহোঽয়ং স কর্তা সর্বকর্মণাম্
203.39
অগ্নির্দারুগতো যদ্বদ্ভিন্নে দারৌ ন দৃশ্যতে
তথৈবাত্মা শরীরস্থো যোগেনৈবাত্র দৃশ্যতে
203.40
নদীষ্বাপো যথা যুক্তা যথা সূর্যে মরীচয়ঃ
সংতন্বানা যথা যান্তি তথা দেহাঃ শরীরিণাম্
203.41
স্বপ্নয়োগে যথৈবাত্মা পঞ্চেন্দ্রিয়সমাগতঃ
দেহমুত্সৃজ্য বৈ যাতি তথৈবাত্রোপলভ্যতে
203.42
কর্মণা ব্যাপ্যতে পূর্বং কর্মণা চোপপদ্যতে
কর্মণা নীয়তেঽন্যত্র স্বকৃতেন বলীয়সা
203.43
স তু দেহাদ্যথা দেহং ত্যক্ত্বান্যং প্রতিপদ্যতে
তথা তং সংপ্রবক্ষ্যামি ভূতগ্রামং স্বকর্মজম্