অধ্যায় 204

204.1

গুরুরুবাচ
চতুর্বিধানি ভূতানি স্থাবরাণি চরাণি চ
অব্যক্তপ্রভবান্যাহুরব্যক্তনিধনানি চ
অব্যক্তনিধনং বিদ্যাদব্যক্তাত্মাত্মকং মনঃ

যথাশ্বত্থকণীকায়ামন্তর্ভূতো মহাদ্রুমঃ
নিষ্পন্নো দৃশ্যতে ব্যক্তমব্যক্তাত্সংভবস্তথা

অভিদ্রবত্যয়স্কান্তময়ো নিশ্চেতনাবুভৌ
স্বভাবহেতুজা ভাবা যদ্বদন্যদপীদৃশম্

তদ্বদব্যক্তজা ভাবাঃ কর্তুঃ কারণলক্ষণাঃ
অচেতনাশ্চেতয়িতুঃ কারণাদভিসংহিতাঃ

ন ভূঃ খং দ্যৌর্ন ভূতানি নর্ষয়ো ন সুরাসুরাঃ
নান্যদাসীদৃতে জীবমাসেদুর্ন তু সংহিতম্

সর্বনীত্যা সর্বগতং মনোহেতু সলক্ষণম্
অজ্ঞানকর্ম নির্দিষ্টমেতত্কারণলক্ষণম্

তত্কারণৈর্হি সংয়ুক্তং কার্যসংগ্রহকারকম্
যেনৈতদ্বর্ততে চক্রমনাদিনিধনং মহৎ

অব্যক্তনাভং ব্যক্তারং বিকারপরিমণ্ডলম্
ক্ষেত্রজ্ঞাধিষ্ঠিতং চক্রং স্নিগ্ধাক্ষং বর্ততে ধ্রুবম্

স্নিগ্ধত্বাত্তিলবত্সর্বং চক্রেঽস্মিন্পীড্যতে জগৎ
তিলপীডৈরিবাক্রম্য ভোগৈরজ্ঞানসংভবৈঃ

কর্ম তত্কুরুতে তর্ষাদহংকারপরিগ্রহম্
কার্যকারণসংয়োগে স হেতুরুপপাদিতঃ

নাত্যেতি কারণং কার্যং ন কার্যং কারণং তথা
কার্যাণাং তূপকরণে কালো ভবতি হেতুমান্

হেতুয়ুক্তাঃ প্রকৃতয়ো বিকারাশ্চ পরস্পরম্
অন্যোন্যমভিবর্তন্তে পুরুষাধিষ্ঠিতাঃ সদা

সরজস্তামসৈর্ভাবৈশ্চ্যুতো হেতুবলান্বিতঃ
ক্ষেত্রজ্ঞমেবানুয়াতি পাংসুর্বাতেরিতো যথা
ন চ তৈঃ স্পৃশ্যতে ভাবো ন তে তেন মহাত্মনা

সরজস্কোঽরজস্কশ্চ স বৈ বায়ুর্যথা ভবেৎ
তথৈতদন্তরং বিদ্যাত্ক্ষেত্রক্ষেত্রজ্ঞয়োর্বুধঃ
অভ্যাসাত্স তথা যুক্তো ন গচ্ছেত্প্রকৃতিং পুনঃ

সংদেহমেতমুত্পন্নমচ্ছিনদ্ভগবানৃষিঃ
তথা বার্তাং সমীক্ষেত কৃতলক্ষণসংমিতাম্

বীজান্যগ্ন্যুপদগ্ধানি ন রোহন্তি যথা পুনঃ
জ্ঞানদগ্ধৈস্তথা ক্লেশৈর্নাত্মা সংবধ্যতে পুনঃ