Utshovঅধ্যায় 205
205.1
গুরুরুবাচ
প্রবৃত্তিলক্ষণো ধর্মো যথায়মুপপদ্যতে
তেষাং বিজ্ঞাননিষ্ঠানামন্যত্তত্ত্বং ন রোচতে
205.2
দুর্লভা বেদবিদ্বাংসো বেদোক্তেষু ব্যবস্থিতাঃ
প্রয়োজনমতস্ত্বত্র মার্গমিচ্ছন্তি সংস্তুতম্
205.3
সদ্ভিরাচরিতত্বাত্তু বৃত্তমেতদগর্হিতম্
ইয়ং সা বুদ্ধিরন্যেয়ং যয়া যাতি পরাং গতিম্
205.4
শরীরবানুপাদত্তে মোহাত্সর্বপরিগ্রহান্
কামক্রোধাদিভির্ভাবৈর্যুক্তো রাজসতামসৈঃ
205.5
নাশুদ্ধমাচরেত্তস্মাদভীপ্সন্দেহয়াপনম্
কর্মণো বিবরং কুর্বন্ন লোকানাপ্নুয়াচ্ছুভান্
205.6
লোহয়ুক্তং যথা হেম বিপক্বং ন বিরাজতে
তথাপক্বকষায়াখ্যং বিজ্ঞানং ন প্রকাশতে
205.7
যশ্চাধর্মং চরেন্মোহাত্কামলোভাবনু প্লবন্
ধর্ম্যং পন্থানমাক্রম্য সানুবন্ধো বিনশ্যতি
205.8
শব্দাদীন্বিষয়াংস্তস্মাদসংরাগাদনুপ্লবেৎ
ক্রোধহর্ষৌ বিষাদশ্চ জায়ন্তে হি পরস্পরম্
205.9
পঞ্চভূতাত্মকে দেহে সত্ত্বরাজসতামসে
কমভিষ্টুবতে চায়ং কং বা ক্রোশতি কিং বদেৎ
205.10
স্পর্শরূপরসাদ্যেষু সঙ্গং গচ্ছন্তি বালিশাঃ
নাবগচ্ছন্ত্যবিজ্ঞানাদাত্মজং পার্থিবং গুণম্
205.11
মৃন্ময়ং শরণং যদ্বন্মৃদৈব পরিলিপ্যতে
পার্থিবোঽয়ং তথা দেহো মৃদ্বিকারৈর্বিলিপ্যতে
205.12
মধু তৈলং পয়ঃ সর্পির্মাংসানি লবণং গুডঃ
ধান্যানি ফলমূলানি মৃদ্বিকারাঃ সহাম্ভসা
205.13
যদ্বত্কান্তারমাতিষ্ঠন্নৌত্সুক্যং সমনুব্রজেৎ
শ্রমাদাহারমাদদ্যাদস্বাদ্বপি হি যাপনম্
205.14
তদ্বত্সংসারকান্তারমাতিষ্ঠঞ্শ্রমতত্পরঃ
যাত্রার্থমদ্যাদাহারং ব্যাধিতো ভেষজং যথা
205.15
সত্যশৌচার্জবত্যাগৈর্যশসা বিক্রমেণ চ
ক্ষান্ত্যা ধৃত্যা চ বুদ্ধ্যা চ মনসা তপসৈব চ
205.16
ভাবান্সর্বান্যথাবৃত্তান্সংবসেত যথাক্রমম্
শান্তিমিচ্ছন্নদীনাত্মা সংয়চ্ছেদিন্দ্রিয়াণি চ
205.17
সত্ত্বেন রজসা চৈব তমসা চৈব মোহিতাঃ
চক্রবত্পরিবর্তন্তে হ্যজ্ঞানাজ্জন্তবো ভৃশম্
205.18
তস্মাত্সম্যক্পরীক্ষেত দোষানজ্ঞানসংভবান্
অজ্ঞানপ্রভবং নিত্যমহংকারং পরিত্যজেৎ
205.19
মহাভূতানীন্দ্রিয়াণি গুণাঃ সত্ত্বং রজস্তমঃ
ত্রৈলোক্যং সেশ্বরং সর্বমহংকারে প্রতিষ্ঠিতম্
205.20
যথেহ নিয়তং কালো দর্শয়ত্যার্তবান্গুণান্
তদ্বদ্ভূতেষ্বহংকারং বিদ্যাদ্ভূতপ্রবর্তকম্
205.21
সংমোহকং তমো বিদ্যাত্কৃষ্ণমজ্ঞানসংভবম্
প্রীতিদুঃখনিবদ্ধাংশ্চ সমস্তাংস্ত্রীনথো গুণান্
সত্ত্বস্য রজসশ্চৈব তমসশ্চ নিবোধ তান্
205.22
প্রমোহো হর্ষজঃ প্রীতিরসংদেহো ধৃতিঃ স্মৃতিঃ
এতান্সত্ত্বগুণান্বিদ্যাদিমান্রাজসতামসান্
205.23
কামক্রোধৌ প্রমাদশ্চ লোভমোহৌ ভয়ং ক্লমঃ
বিষাদশোকাবরতির্মানদর্পাবনার্যতা
205.24
দোষাণামেবমাদীনাং পরীক্ষ্য গুরুলাঘবম্
বিমৃশেদাত্মসংস্থানামেকৈকমনুসংততম্
205.25
শিষ্য উবাচ
কে দোষা মনসা ত্যক্তাঃ কে বুদ্ধ্যা শিথিলীকৃতাঃ
কে পুনঃ পুনরায়ান্তি কে মোহাদফলা ইব
205.26
কেষাং বলাবলং বুদ্ধ্যা হেতুভির্বিমৃশেদ্বুধঃ
এতত্সর্বং সমাচক্ষ্ব যথা বিদ্যামহং প্রভো
205.27
গুরুরুবাচ
দোষৈর্মূলাদবচ্ছিন্নৈর্বিশুদ্ধাত্মা বিমুচ্যতে
বিনাশয়তি সংভূতময়স্ময়ময়ো যথা
তথাকৃতাত্মা সহজৈর্দোষৈর্নশ্যতি রাজসৈঃ
205.28
রাজসং তামসং চৈব শুদ্ধাত্মাকর্মসংভবম্
তত্সর্বং দেহিনাং বীজং সর্বমাত্মবতঃ সমম্
205.29
তস্মাদাত্মবতা বর্জ্যং রজশ্চ তম এব চ
রজস্তমোভ্যাং নির্মুক্তং সত্ত্বং নির্মলতামিয়াৎ
205.30
অথ বা মন্ত্রবদ্ব্রূয়ুর্মাংসাদানাং যজুষ্কৃতম্
হেতুঃ স এবানাদানে শুদ্ধধর্মানুপালনে
205.31
রজসা ধর্ময়ুক্তানি কার্যাণ্যপি সমাপ্নুয়াৎ
অর্থয়ুক্তানি চাত্যর্থং কামান্সর্বাংশ্চ সেবতে
205.32
তমসা লোভয়ুক্তানি ক্রোধজানি চ সেবতে
হিংসাবিহারাভিরতস্তন্দ্রীনিদ্রাসমন্বিতঃ
205.33
সত্ত্বস্থঃ সাত্ত্বিকান্ভাবাঞ্শুদ্ধান্পশ্যতি সংশ্রিতঃ
স দেহী বিমলঃ শ্রীমাঞ্শুদ্ধো বিদ্যাসমন্বিতঃ