অধ্যায় 206

206.1

গুরুরুবাচ
রজসা সাধ্যতে মোহস্তমসা চ নরর্ষভ
ক্রোধলোভৌ ভয়ং দর্প এতেষাং সাধনাচ্ছুচিঃ

পরমং পরমাত্মানং দেবমক্ষয়মব্যয়ম্
বিষ্ণুমব্যক্তসংস্থানং বিশন্তে দেবসত্তমম্

তস্য মায়াবিদগ্ধাঙ্গা জ্ঞানভ্রষ্টা নিরাশিষঃ
মানবা জ্ঞানসংমোহাত্ততঃ কামং প্রয়ান্তি বৈ

কামাত্ক্রোধমবাপ্যাথ লোভমোহৌ চ মানবাঃ
মানদর্পাদহংকারমহংকারাত্ততঃ ক্রিয়াঃ

ক্রিয়াভিঃ স্নেহসংবন্ধঃ স্নেহাচ্ছোকমনন্তরম্
সুখদুঃখসমারম্ভাজ্জন্মাজন্মকৃতক্ষণাঃ

জন্মতো গর্ভবাসং তু শুক্রশোণিতসংভবম্
পুরীষমূত্রবিক্লেদশোণিতপ্রভবাবিলম্

তৃষ্ণাভিভূতস্তৈর্বদ্ধস্তানেবাভিপরিপ্লবন্
সংসারতন্ত্রবাহিন্যস্তত্র বুধ্যেত যোষিতঃ

প্রকৃত্যা ক্ষেত্রভূতাস্তা নরাঃ ক্ষেত্রজ্ঞলক্ষণাঃ
তস্মাদেতা বিশেষেণ নরোঽতীয়ুর্বিপশ্চিতঃ

কৃত্যা হ্যেতা ঘোররূপা মোহয়ন্ত্যবিচক্ষণান্
রজস্যন্তর্হিতা মূর্তিরিন্দ্রিয়াণাং সনাতনী

তস্মাত্তর্ষাত্মকাদ্রাগাদ্বীজাজ্জায়ন্তি জন্তবঃ
স্বদেহজানস্বসংজ্ঞান্যদ্বদঙ্গাত্কৃমীংস্ত্যজেৎ
স্বসংজ্ঞানস্বজাংস্তদ্বত্সুতসংজ্ঞান্কৃমীংস্ত্যজেৎ

শুক্রতো রসতশ্চৈব স্নেহাজ্জায়ন্তি জন্তবঃ
স্বভাবাত্কর্ময়োগাদ্বা তানুপেক্ষেত বুদ্ধিমান্

রজস্তমসি পর্যস্তং সত্ত্বং তমসি সংস্থিতম্
জ্ঞানাধিষ্ঠানমজ্ঞানং বুদ্ধ্যহংকারলক্ষণম্

তদ্বীজং দেহিনামাহুস্তদ্বীজং জীবসংজ্ঞিতম্
কর্মণা কালয়ুক্তেন সংসারপরিবর্তকম্

রমত্যয়ং যথা স্বপ্নে মনসা দেহবানিব
কর্মগর্ভৈর্গুণৈর্দেহী গর্ভে তদুপপদ্যতে

কর্মণা বীজভূতেন চোদ্যতে যদ্যদিন্দ্রিয়ম্
জায়তে তদহংকারাদ্রাগয়ুক্তেন চেতসা

শব্দরাগাচ্ছ্রোত্রমস্য জায়তে ভাবিতাত্মনঃ
রূপরাগাত্তথা চক্ষুর্ঘ্রাণং গন্ধচিকীর্ষয়া

স্পর্শনেভ্যস্তথা বায়ুঃ প্রাণাপানব্যপাশ্রয়ঃ
ব্যানোদানৌ সমানশ্চ পঞ্চধা দেহয়াপনা

সংজাতৈর্জায়তে গাত্রৈঃ কর্মজৈর্ব্রহ্মণা বৃতঃ
দুঃখাদ্যন্তৈর্দুঃখমধ্যৈর্নরঃ শারীরমানসৈঃ

দুঃখং বিদ্যাদুপাদানাদভিমানাচ্চ বর্ধতে
ত্যাগাত্তেভ্যো নিরোধঃ স্যান্নিরোধজ্ঞো বিমুচ্যতে

ইন্দ্রিয়াণাং রজস্যেব প্রভবপ্রলয়াবুভৌ
পরীক্ষ্য সংচরেদ্বিদ্বান্যথাবচ্ছাস্ত্রচক্ষুষা

জ্ঞানেন্দ্রিয়াণীন্দ্রিয়ার্থান্নোপসর্পন্ত্যতর্ষুলম্
জ্ঞাতৈশ্চ কারণৈর্দেহী ন দেহং পুনরর্হতি