Utshovঅধ্যায় 207
207.1
গুরুরুবাচ
অত্রোপায়ং প্রবক্ষ্যামি যথাবচ্ছাস্ত্রচক্ষুষা
তদ্বিজ্ঞানাচ্চরন্প্রাজ্ঞঃ প্রাপ্নুয়াত্পরমাং গতিম্
207.2
সর্বেষামেব ভূতানাং পুরুষঃ শ্রেষ্ঠ উচ্যতে
পুরুষেভ্যো দ্বিজানাহুর্দ্বিজেভ্যো মন্ত্রবাদিনঃ
207.3
সর্বভূতবিশিষ্টাস্তে সর্বজ্ঞাঃ সর্বদর্শিনঃ
ব্রাহ্মণা বেদতত্ত্বজ্ঞাস্তত্ত্বার্থগতিনিশ্চয়াঃ
207.4
নেত্রহীনো যথা হ্যেকঃ কৃচ্ছ্রাণি লভতেঽধ্বনি
জ্ঞানহীনস্তথা লোকে তস্মাজ্জ্ঞানবিদোঽধিকাঃ
207.5
তাংস্তানুপাসতে ধর্মান্ধর্মকামা যথাগমম্
ন ত্বেষামর্থসামান্যমন্তরেণ গুণানিমান্
207.6
বাগ্দেহমনসাং শৌচং ক্ষমা সত্যং ধৃতিঃ স্মৃতিঃ
সর্বধর্মেষু ধর্মজ্ঞা জ্ঞাপয়ন্তি গুণানিমান্
207.7
যদিদং ব্রহ্মণো রূপং ব্রহ্মচর্যমিতি স্মৃতম্
পরং তত্সর্বভূতেভ্যস্তেন যান্তি পরাং গতিম্
207.8
লিঙ্গসংয়োগহীনং যচ্ছরীরস্পর্শবর্জিতম্
শ্রোত্রেণ শ্রবণং চৈব চক্ষুষা চৈব দর্শনম্
207.9
জিহ্বয়া রসনং যচ্চ তদেব পরিবর্জিতম্
বুদ্ধ্যা চ ব্যবসায়েন ব্রহ্মচর্যমকল্মষম্
207.10
সম্যগ্বৃত্তির্ব্রহ্মলোকং প্রাপ্নুয়ান্মধ্যমঃ সুরান্
দ্বিজাগ্র্যো জায়তে বিদ্বান্কন্যসীং বৃত্তিমাস্থিতঃ
207.11
সুদুষ্করং ব্রহ্মচর্যমুপায়ং তত্র মে শৃণু
সংপ্রবৃত্তমুদীর্ণং চ নিগৃহ্ণীয়াদ্দ্বিজো মনঃ
207.12
যোষিতাং ন কথাঃ শ্রাব্যা ন নিরীক্ষ্যা নিরম্বরাঃ
কদাচিদ্দর্শনাদাসাং দুর্বলানাবিশেদ্রজঃ
207.13
রাগোত্পত্তৌ চরেত্কৃচ্ছ্রমহ্নস্ত্রিঃ প্রবিশেদপঃ
মগ্নঃ স্বপ্নে চ মনসা ত্রির্জপেদঘমর্ষণম্
207.14
পাপ্মানং নির্দহেদেবমন্তর্ভূতং রজোময়ম্
জ্ঞানয়ুক্তেন মনসা সংততেন বিচক্ষণঃ
207.15
কুণপামেধ্যসংয়ুক্তং যদ্বদচ্ছিদ্রবন্ধনম্
তদ্বদ্দেহগতং বিদ্যাদাত্মানং দেহবন্ধনম্
207.16
বাতপিত্তকফান্রক্তং ত্বঙ্মাংসং স্নায়ুমস্থি চ
মজ্জাং চৈব সিরাজালৈস্তর্পয়ন্তি রসা নৃণাম্
207.17
দশ বিদ্যাদ্ধমন্যোঽত্র পঞ্চেন্দ্রিয়গুণাবহাঃ
যাভিঃ সূক্ষ্মাঃ প্রতায়ন্তে ধমন্যোঽন্যাঃ সহস্রশঃ
207.18
এবমেতাঃ সিরানদ্যো রসোদা দেহসাগরম্
তর্পয়ন্তি যথাকালমাপগা ইব সাগরম্
207.19
মধ্যে চ হৃদয়স্যৈকা সিরা ত্বত্র মনোবহা
শুক্রং সংকল্পজং নৄণাং সর্বগাত্রৈর্বিমুঞ্চতি
207.20
সর্বগাত্রপ্রতায়িন্যস্তস্যা হ্যনুগতাঃ সিরাঃ
নেত্রয়োঃ প্রতিপদ্যন্তে বহন্ত্যস্তৈজসং গুণম্
207.21
পয়স্যন্তর্হিতং সর্পির্যদ্বন্নির্মথ্যতে খজৈঃ
শুক্রং নির্মথ্যতে তদ্বদ্দেহসংকল্পজৈঃ খজৈঃ
207.22
স্বপ্নেঽপ্যেবং যথাভ্যেতি মনঃসংকল্পজং রজঃ
শুক্রমস্পর্শজং দেহাত্সৃজন্ত্যস্য মনোবহা
207.23
মহর্ষির্ভগবানত্রির্বেদ তচ্ছুক্রসংভবম্
ত্রিবীজমিন্দ্রদৈবত্যং তস্মাদিন্দ্রিয়মুচ্যতে
207.24
যে বৈ শুক্রগতিং বিদ্যুর্ভূতসংকরকারিকাম্
বিরাগা দগ্ধদোষাস্তে নাপ্নুয়ুর্দেহসংভবম্
207.25
গুণানাং সাম্যমাগম্য মনসৈব মনোবহম্
দেহকর্ম নুদন্প্রাণানন্তকালে বিমুচ্যতে
207.26
ভবিতা মনসো জ্ঞানং মন এব প্রতায়তে
জ্যোতিষ্মদ্বিরজো দিব্যমত্র সিদ্ধং মহাত্মনাম্
207.27
তস্মাত্তদবিঘাতায় কর্ম কুর্যাদকল্মষম্
রজস্তমশ্চ হিত্বেহ ন তির্যগ্গতিমাপ্নুয়াৎ
207.28
তরুণাধিগতং জ্ঞানং জরাদুর্বলতাং গতম্
পরিপক্ববুদ্ধিঃ কালেন আদত্তে মানসং বলম্
207.29
সুদুর্গমিব পন্থানমতীত্য গুণবন্ধনম্
যদা পশ্যেত্তদা দোষানতীত্যামৃতমশ্নুতে