অধ্যায় 208

208.1

গুরুরুবাচ
দুরন্তেষ্বিন্দ্রিয়ার্থেষু সক্তাঃ সীদন্তি জন্তবঃ
যে ত্বসক্তা মহাত্মানস্তে যান্তি পরমাং গতিম্

208.2

জন্মমৃত্যুজরাদুঃখৈর্ব্যাধিভির্মনসঃ ক্লমৈঃ
দৃষ্ট্বেমং সংততং লোকং ঘটেন্মোক্ষায় বুদ্ধিমান্

208.3

বাঙ্মনোভ্যাং শরীরেণ শুচিঃ স্যাদনহংকৃতঃ
প্রশান্তো জ্ঞানবান্ভিক্ষুর্নিরপেক্ষশ্চরেত্সুখম্

208.4

অথ বা মনসঃ সঙ্গং পশ্যেদ্ভূতানুকম্পয়া
অত্রাপ্যুপেক্ষাং কুর্বীত জ্ঞাত্বা কর্মফলং জগৎ

208.5

যত্কৃতং প্রাক্শুভং কর্ম পাপং বা তদুপাশ্নুতে
তস্মাচ্ছুভানি কর্মাণি কুর্যাদ্বাগ্বুদ্ধিকর্মভিঃ

208.6

অহিংসা সত্যবচনং সর্বভূতেষু চার্জবম্
ক্ষমা চৈবাপ্রমাদশ্চ যস্যৈতে স সুখী ভবেৎ

208.7

যশ্চৈনং পরমং ধর্মং সর্বভূতসুখাবহম্
দুঃখান্নিঃসরণং বেদ স তত্ত্বজ্ঞঃ সুখী ভবেৎ

208.8

তস্মাত্সমাহিতং বুদ্ধ্যা মনো ভূতেষু ধারয়েৎ
নাপধ্যায়েন্ন স্পৃহয়েন্নাবদ্ধং চিন্তয়েদসৎ

208.9

অবাগ্যোগপ্রয়োগেণ মনোজ্ঞং সংপ্রবর্ততে
বিবক্ষতা বা সদ্বাক্যং ধর্মং সূক্ষ্মমবেক্ষতা
সত্যাং বাচমহিংস্রাং চ বদেদনপবাদিনীম্

208.10

কল্কাপেতামপরুষামনৃশংসামপৈশুনাম্
ঈদৃগল্পং চ বক্তব্যমবিক্ষিপ্তেন চেতসা

208.11

বাক্প্রবুদ্ধো হি সংরাগাদ্বিরাগাদ্ব্যাহরেদ্যদি
বুদ্ধ্যা হ্যনিগৃহীতেন মনসা কর্ম তামসম্
রজোভূতৈর্হি করণৈঃ কর্মণা প্রতিপদ্যতে

208.12

স দুঃখং প্রাপ্য লোকেঽস্মিন্নরকায়োপপদ্যতে
তস্মান্মনোবাক্শরীরৈরাচরেদ্ধৈর্যমাত্মনঃ

208.13

প্রকীর্ণমেষভারো হি যদ্বদ্ধার্যেত দস্যুভিঃ
প্রতিলোমাং দিশং বুদ্ধ্বা সংসারমবুধাস্তথা

208.14

তানেব চ যথা দস্যূন্ক্ষিপ্ত্বা গচ্ছেচ্ছিবাং দিশম্
তথা রজস্তমঃকর্মাণ্যুত্সৃজ্য প্রাপ্নুয়াত্সুখম্

208.15

নিঃসংদিগ্ধমনীহো বৈ মুক্তঃ সর্বপরিগ্রহৈঃ
বিবিক্তচারী লঘ্বাশী তপস্বী নিয়তেন্দ্রিয়ঃ

208.16

জ্ঞানদগ্ধপরিক্লেশঃ প্রয়োগরতিরাত্মবান্
নিষ্প্রচারেণ মনসা পরং তদধিগচ্ছতি

208.17

ধৃতিমানাত্মবান্বুদ্ধিং নিগৃহ্ণীয়াদসংশয়ম্
মনো বুদ্ধ্যা নিগৃহ্ণীয়াদ্বিষয়ান্মনসাত্মনঃ

208.18

নিগৃহীতেন্দ্রিয়স্যাস্য কুর্বাণস্য মনো বশে
দেবতাস্তাঃ প্রকাশন্তে হৃষ্টা যান্তি তমীশ্বরম্

208.19

তাভিঃ সংসক্তমনসো ব্রহ্মবত্সংপ্রকাশতে
এতৈশ্চাপগতৈঃ সর্বৈর্ব্রহ্মভূয়ায় কল্পতে

208.20

অথ বা ন প্রবর্তেত যোগতন্ত্রৈরুপক্রমেৎ
যেন তন্ত্রময়ং তন্ত্রং বৃত্তিঃ স্যাত্তত্তদাচরেৎ

208.21

কণপিণ্যাককুল্মাষশাকয়াবকসক্তবঃ
তথা মূলফলং ভৈক্ষং পর্যায়েণোপয়োজয়েৎ

208.22

আহারং নিয়তং চৈব দেশে কালে চ সাত্ত্বিকম্
তত্পরীক্ষ্যানুবর্তেত যত্প্রবৃত্ত্যনুবর্তকম্

208.23

প্রবৃত্তং নোপরুন্ধেত শনৈরগ্নিমিবেন্ধয়েৎ
জ্ঞানেন্ধিতং ততো জ্ঞানমর্কবত্সংপ্রকাশতে

208.24

জ্ঞানাধিষ্ঠানমজ্ঞানং ত্রীঁল্লোকানধিতিষ্ঠতি
বিজ্ঞানানুগতং জ্ঞানমজ্ঞানাদপকৃষ্যতে

208.25

পৃথক্ত্বাত্সংপ্রয়োগাচ্চ নাসূয়ুর্বেদ শাশ্বতম্
স তয়োরপবর্গজ্ঞো বীতরাগো বিমুচ্যতে

208.26

বয়োতীতো জরামৃত্যূ জিত্বা ব্রহ্ম সনাতনম্
অমৃতং তদবাপ্নোতি যত্তদক্ষরমব্যয়ম্

Contains text from DharmicData, made available under the Open Database License (ODbL). Simple meanings are written by AI and can contain mistakes.