অধ্যায় 209

209.1

গুরুরুবাচ
নিষ্কল্মষং ব্রহ্মচর্যমিচ্ছতা চরিতুং সদা
নিদ্রা সর্বাত্মনা ত্যাজ্যা স্বপ্নদোষানবেক্ষতা

স্বপ্নে হি রজসা দেহী তমসা চাভিভূয়তে
দেহান্তরমিবাপন্নশ্চরত্যপগতস্মৃতিঃ

জ্ঞানাভ্যাসাজ্জাগরতো জিজ্ঞাসার্থমনন্তরম্
বিজ্ঞানাভিনিবেশাত্তু জাগরত্যনিশং সদা

অত্রাহ কো ন্বয়ং ভাবঃ স্বপ্নে বিষয়বানিব
প্রলীনৈরিন্দ্রিয়ৈর্দেহী বর্ততে দেহবানিব

অত্রোচ্যতে যথা হ্যেতদ্বেদ যোগেশ্বরো হরিঃ
তথৈতদুপপন্নার্থং বর্ণয়ন্তি মহর্ষয়ঃ

ইন্দ্রিয়াণাং শ্রমাত্স্বপ্নমাহুঃ সর্বগতং বুধাঃ
মনসস্তু প্রলীনত্বাত্তত্তদাহুর্নিদর্শনম্

কার্যব্যাসক্তমনসঃ সংকল্পো জাগ্রতো হ্যপি
যদ্বন্মনোরথৈশ্বর্যং স্বপ্নে তদ্বন্মনোগতম্

সংসারাণামসংখ্যানাং কামাত্মা তদবাপ্নুয়াৎ
মনস্যন্তর্হিতং সর্বং বেদ সোত্তমপূরুষঃ

গুণানামপি যদ্যত্তত্কর্ম জানাত্যুপস্থিতম্
তত্তচ্ছংসন্তি ভূতানি মনো যদ্ভাবিতং যথা

ততস্তমুপবর্তন্তে গুণা রাজসতামসাঃ
সাত্ত্বিকো বা যথায়োগমানন্তর্যফলোদয়ঃ

ততঃ পশ্যত্যসংবদ্ধান্বাতপিত্তকফোত্তরান্
রজস্তমোভবৈর্ভাবৈস্তদপ্যাহুর্দুরন্বয়ম্

প্রসন্নৈরিন্দ্রিয়ৈর্যদ্যত্সংকল্পয়তি মানসম্
তত্তত্স্বপ্নেঽপ্যুপরতে মনোদৃষ্টির্নিরীক্ষতে

ব্যাপকং সর্বভূতেষু বর্ততেঽপ্রতিঘং মনঃ
মনস্যন্তর্হিতং দ্বারং দেহমাস্থায় মানসম্

যত্তত্সদসদব্যক্তং স্বপিত্যস্মিন্নিদর্শনম্
সর্বভূতাত্মভূতস্থং তদধ্যাত্মগুণং বিদুঃ

লিপ্সেত মনসা যশ্চ সংকল্পাদৈশ্বরং গুণম্
আত্মপ্রভাবাত্তং বিদ্যাত্সর্বা হ্যাত্মনি দেবতাঃ

এবং হি তপসা যুক্তমর্কবত্তমসঃ পরম্
ত্রৈলোক্যপ্রকৃতির্দেহী তপসা তং মহেশ্বরম্

তপো হ্যধিষ্ঠিতং দেবৈস্তপোঘ্নমসুরৈস্তমঃ
এতদ্দেবাসুরৈর্গুপ্তং তদাহুর্জ্ঞানলক্ষণম্

সত্ত্বং রজস্তমশ্চেতি দেবাসুরগুণান্বিদুঃ
সত্ত্বং দেবগুণং বিদ্যাদিতরাবাসুরৌ গুণৌ

ব্রহ্ম তত্পরমং বেদ্যমমৃতং জ্যোতিরক্ষরম্
যে বিদুর্ভাবিতাত্মানস্তে যান্তি পরমাং গতিম্

হেতুমচ্ছক্যমাখ্যাতুমেতাবজ্জ্ঞানচক্ষুষা
প্রত্যাহারেণ বা শক্যমব্যক্তং ব্রহ্ম বেদিতুম্