Utshovঅধ্যায় 210
210.1
গুরুরুবাচ
ন স বেদ পরং ধর্মং যো ন বেদ চতুষ্টয়ম্
ব্যক্তাব্যক্তে চ যত্তত্ত্বং সংপ্রাপ্তং পরমর্ষিণা
210.2
ব্যক্তং মৃত্যুমুখং বিদ্যাদব্যক্তমমৃতং পদম্
প্রবৃত্তিলক্ষণং ধর্মমৃষির্নারায়ণোঽব্রবীৎ
210.3
অত্রৈবাবস্থিতং সর্বং ত্রৈলোক্যং সচরাচরম্
নিবৃত্তিলক্ষণং ধর্মমব্যক্তং ব্রহ্ম শাশ্বতম্
210.4
প্রবৃত্তিলক্ষণং ধর্মং প্রজাপতিরথাব্রবীৎ
প্রবৃত্তিঃ পুনরাবৃত্তির্নিবৃত্তিঃ পরমা গতিঃ
210.5
তাং গতিং পরমামেতি নিবৃত্তিপরমো মুনিঃ
জ্ঞানতত্ত্বপরো নিত্যং শুভাশুভনিদর্শকঃ
210.6
তদেবমেতৌ বিজ্ঞেয়াবব্যক্তপুরুষাবুভৌ
অব্যক্তপুরুষাভ্যাং তু যত্স্যাদন্যন্মহত্তরম্
210.7
তং বিশেষমবেক্ষেত বিশেষেণ বিচক্ষণঃ
অনাদ্যন্তাবুভাবেতাবলিঙ্গৌ চাপ্যুভাবপি
210.8
উভৌ নিত্যৌ সূক্ষ্মতরৌ মহদ্ভ্যশ্চ মহত্তরৌ
সামান্যমেতদুভয়োরেবং হ্যন্যদ্বিশেষণম্
210.9
প্রকৃত্যা সর্গধর্মিণ্যা তথা ত্রিবিধসত্ত্বয়া
বিপরীতমতো বিদ্যাত্ক্ষেত্রজ্ঞস্য চ লক্ষণম্
210.10
প্রকৃতেশ্চ বিকারাণাং দ্রষ্টারমগুণান্বিতম্
অগ্রাহ্যৌ পুরুষাবেতাবলিঙ্গত্বাদসংহিতৌ
210.11
সংয়োগলক্ষণোত্পত্তিঃ কর্মজা গৃহ্যতে যয়া
করণৈঃ কর্মনির্বৃত্তৈঃ কর্তা যদ্যদ্বিচেষ্টতে
কীর্ত্যতে শব্দসংজ্ঞাভিঃ কোঽহমেষোঽপ্যসাবিতি
210.12
উষ্ণীষবান্যথা বস্ত্রৈস্ত্রিভির্ভবতি সংবৃতঃ
সংবৃতোঽয়ং তথা দেহী সত্ত্বরাজসতামসৈঃ
210.13
তস্মাচ্চতুষ্টয়ং বেদ্যমেতৈর্হেতুভিরাচিতম্
যথাসংজ্ঞো হ্যয়ং সম্যগন্তকালে ন মুহ্যতি
210.14
শ্রিয়ং দিব্যামভিপ্রেপ্সুর্ব্রহ্ম বাঙ্মনসা শুচিঃ
শারীরৈর্নিয়মৈরুগ্রৈশ্চরেন্নিষ্কল্মষং তপঃ
210.15
ত্রৈলোক্যং তপসা ব্যাপ্তমন্তর্ভূতেন ভাস্বতা
সূর্যশ্চ চন্দ্রমাশ্চৈব ভাসতস্তপসা দিবি
210.16
প্রতাপস্তপসো জ্ঞানং লোকে সংশব্দিতং তপঃ
রজস্তমোঘ্নং যত্কর্ম তপসস্তত্স্বলক্ষণম্
210.17
ব্রহ্মচর্যমহিংসা চ শারীরং তপ উচ্যতে
বাঙ্মনোনিয়মঃ সাম্যং মানসং তপ উচ্যতে
210.18
বিধিজ্ঞেভ্যো দ্বিজাতিভ্যো গ্রাহ্যমন্নং বিশিষ্যতে
আহারনিয়মেনাস্য পাপ্মা নশ্যতি রাজসঃ
210.19
বৈমনস্যং চ বিষয়ে যান্ত্যস্য করণানি চ
তস্মাত্তন্মাত্রমাদদ্যাদ্যাবদত্র প্রয়োজনম্
210.20
অন্তকালে বয়োত্কর্ষাচ্ছনৈঃ কুর্যাদনাতুরঃ
এবং যুক্তেন মনসা জ্ঞানং তদুপপদ্যতে
210.21
রজসা চাপ্যয়ং দেহী দেহবাঞ্শব্দবচ্চরেৎ
কার্যৈরব্যাহতমতির্বৈরাগ্যাত্প্রকৃতৌ স্থিতঃ
আ দেহাদপ্রমাদাচ্চ দেহান্তাদ্বিপ্রমুচ্যতে
210.22
হেতুয়ুক্তঃ সদোত্সর্গো ভূতানাং প্রলয়স্তথা
পরপ্রত্যয়সর্গে তু নিয়তং নাতিবর্ততে
210.23
ভবান্তপ্রভবপ্রজ্ঞা আসতে যে বিপর্যয়ম্
ধৃত্যা দেহান্ধারয়ন্তো বুদ্ধিসংক্ষিপ্তমানসাঃ
স্থানেভ্যো ধ্বংসমানাশ্চ সূক্ষ্মত্বাত্তানুপাসতে
210.24
যথাগমং চ তত্সর্বং বুদ্ধ্যা তন্নৈব বুধ্যতে
দেহান্তং কশ্চিদন্বাস্তে ভাবিতাত্মা নিরাশ্রয়ঃ
যুক্তো ধারণয়া কশ্চিত্সত্তাং কেচিদুপাসতে
210.25
অভ্যস্যন্তি পরং দেবং বিদ্যুত্সংশব্দিতাক্ষরম্
অন্তকালে হ্যুপাসন্নাস্তপসা দগ্ধকিল্বিষাঃ
210.26
সর্ব এতে মহাত্মানো গচ্ছন্তি পরমাং গতিম্
সূক্ষ্মং বিশেষণং তেষামবেক্ষেচ্ছাস্ত্রচক্ষুষা
210.27
দেহং তু পরমং বিদ্যাদ্বিমুক্তমপরিগ্রহম্
অন্তরিক্ষাদন্যতরং ধারণাসক্তমানসম্
210.28
মর্ত্যলোকাদ্বিমুচ্যন্তে বিদ্যাসংয়ুক্তমানসাঃ
ব্রহ্মভূতা বিরজসস্ততো যান্তি পরাং গতিম্
210.29
কষায়বর্জিতং জ্ঞানং যেষামুত্পদ্যতেঽচলম্
তে যান্তি পরমাঁল্লোকান্বিশুধ্যন্তো যথাবলম্
210.30
ভগবন্তমজং দিব্যং বিষ্ণুমব্যক্তসংজ্ঞিতম্
ভাবেন যান্তি শুদ্ধা যে জ্ঞানতৃপ্তা নিরাশিষঃ
210.31
জ্ঞাত্বাত্মস্থং হরিং চৈব নিবর্তন্তে ন তেঽব্যয়াঃ
প্রাপ্য তত্পরমং স্থানং মোদন্তেঽক্ষরমব্যয়ম্
210.32
এতাবদেতদ্বিজ্ঞানমেতদস্তি চ নাস্তি চ
তৃষ্ণাবদ্ধং জগত্সর্বং চক্রবত্পরিবর্ততে
210.33
বিসতন্তুর্যথৈবায়মন্তঃস্থঃ সর্বতো বিসে
তৃষ্ণাতন্তুরনাদ্যন্তস্তথা দেহগতঃ সদা
210.34
সূচ্যা সূত্রং যথা বস্ত্রে সংসারয়তি বায়কঃ
তদ্বত্সংসারসূত্রং হি তৃষ্ণাসূচ্যা নিবধ্যতে
210.35
বিকারং প্রকৃতিং চৈব পুরুষং চ সনাতনম্
যো যথাবদ্বিজানাতি স বিতৃষ্ণো বিমুচ্যতে
210.36
প্রকাশং ভগবানেতদৃষির্নারায়ণোঽমৃতম্
ভূতানামনুকম্পার্থং জগাদ জগতো হিতম্