Utshovঅধ্যায় 211
211.1
যুধিষ্ঠির উবাচ
কেন বৃত্তেন বৃত্তজ্ঞো জনকো মিথিলাধিপঃ
জগাম মোক্ষং ধর্মজ্ঞো ভোগানুত্সৃজ্য মানুষান্
211.2
ভীষ্ম উবাচ
অত্রাপ্যুদাহরন্তীমমিতিহাসং পুরাতনম্
যেন বৃত্তেন বৃত্তজ্ঞঃ স জগাম মহত্সুখম্
211.3
জনকো জনদেবস্তু মিথিলায়াং জনাধিপঃ
ঔর্ধ্বদেহিকধর্মাণামাসীদ্যুক্তো বিচিন্তনে
211.4
তস্য স্ম শতমাচার্যা বসন্তি সততং গৃহে
দর্শয়ন্তঃ পৃথগ্ধর্মান্নানাপাষণ্ডবাদিনঃ
211.5
স তেষাং প্রেত্যভাবে চ প্রেত্যজাতৌ বিনিশ্চয়ে
আগমস্থঃ স ভূয়িষ্ঠমাত্মতত্ত্বে ন তুষ্যতি
211.6
তত্র পঞ্চশিখো নাম কাপিলেয়ো মহামুনিঃ
পরিধাবন্মহীং কৃত্স্নাং জগাম মিথিলামপি
211.7
সর্বসংন্যাসধর্মাণাং তত্ত্বজ্ঞানবিনিশ্চয়ে
সুপর্যবসিতার্থশ্চ নির্দ্বংদ্বো নষ্টসংশয়ঃ
211.8
ঋষীণামাহুরেকং যং কামাদবসিতং নৃষু
শাশ্বতং সুখমত্যন্তমন্বিচ্ছন্স সুদুর্লভম্
211.9
যমাহুঃ কপিলং সাংখ্যাঃ পরমর্ষিং প্রজাপতিম্
স মন্যে তেন রূপেণ বিস্মাপয়তি হি স্বয়ম্
211.10
আসুরেঃ প্রথমং শিষ্যং যমাহুশ্চিরজীবিনম্
পঞ্চস্রোতসি যঃ সত্রমাস্তে বর্ষসহস্রিকম্
211.11
তং সমাসীনমাগম্য মণ্ডলং কাপিলং মহৎ
পুরুষাবস্থমব্যক্তং পরমার্থং নিবোধয়ৎ
211.12
ইষ্টিসত্রেণ সংসিদ্ধো ভূয়শ্চ তপসা মুনিঃ
ক্ষেত্রক্ষেত্রজ্ঞয়োর্ব্যক্তিং বুবুধে দেবদর্শনঃ
211.13
যত্তদেকাক্ষরং ব্রহ্ম নানারূপং প্রদৃশ্যতে
আসুরির্মণ্ডলে তস্মিন্প্রতিপেদে তদব্যয়ম্
211.14
তস্য পঞ্চশিখঃ শিষ্যো মানুষ্যা পয়সা ভৃতঃ
ব্রাহ্মণী কপিলা নাম কাচিদাসীত্কুটুম্বিনী
211.15
তস্যাঃ পুত্রত্বমাগম্য স্ত্রিয়াঃ স পিবতি স্তনৌ
ততঃ স কাপিলেয়ত্বং লেভে বুদ্ধিং চ নৈষ্ঠিকীম্
211.16
এতন্মে ভগবানাহ কাপিলেয়ায় সংভবম্
তস্য তত্কাপিলেয়ত্বং সর্ববিত্ত্বমনুত্তমম্
211.17
সামান্যং কপিলো জ্ঞাত্বা ধর্মজ্ঞানামনুত্তমম্
উপেত্য শতমাচার্যান্মোহয়ামাস হেতুভিঃ
211.18
জনকস্ত্বভিসংরক্তঃ কাপিলেয়ানুদর্শনাৎ
উত্সৃজ্য শতমাচার্যান্পৃষ্ঠতোঽনুজগাম তম্
211.19
তস্মৈ পরমকল্যায় প্রণতায় চ ধর্মতঃ
অব্রবীত্পরমং মোক্ষং যত্তত্সাংখ্যং বিধীয়তে
211.20
জাতিনির্বেদমুক্ত্বা হি কর্মনির্বেদমব্রবীৎ
কর্মনির্বেদমুক্ত্বা চ সর্বনির্বেদমব্রবীৎ
211.21
যদর্থং কর্মসংসর্গঃ কর্মণাং চ ফলোদয়ঃ
তদনাশ্বাসিকং মোঘং বিনাশি চলমধ্রুবম্
211.22
দৃশ্যমানে বিনাশে চ প্রত্যক্ষে লোকসাক্ষিকে
আগমাত্পরমস্তীতি ব্রুবন্নপি পরাজিতঃ
211.23
অনাত্মা হ্যাত্মনো মৃত্যুঃ ক্লেশো মৃত্যুর্জরাময়ঃ
আত্মানং মন্যতে মোহাত্তদসম্যক্পরং মতম্
211.24
অথ চেদেবমপ্যস্তি যল্লোকে নোপপদ্যতে
অজরোঽয়মমৃত্যুশ্চ রাজাসৌ মন্যতে তথা
211.25
অস্তি নাস্তীতি চাপ্যেতত্তস্মিন্নসতি লক্ষণে
কিমধিষ্ঠায় তদ্ব্রূয়াল্লোকয়াত্রাবিনিশ্চয়ম্
211.26
প্রত্যক্ষং হ্যেতয়োর্মূলং কৃতান্তৈতিহ্যয়োরপি
প্রত্যক্ষো হ্যাগমোঽভিন্নঃ কৃতান্তো বা ন কিংচন
211.27
যত্র তত্রানুমানেঽস্তি কৃতং ভাবয়তেঽপি বা
অন্যো জীবঃ শরীরস্য নাস্তিকানাং মতে স্মৃতঃ
211.28
রেতো বটকণীকায়াং ঘৃতপাকাধিবাসনম্
জাতিস্মৃতিরয়স্কান্তঃ সূর্যকান্তোঽম্বুভক্ষণম্
211.29
প্রেত্য ভূতাত্যয়শ্চৈব দেবতাভ্যুপয়াচনম্
মৃতে কর্মনিবৃত্তিশ্চ প্রমাণমিতি নিশ্চয়ঃ
211.30
ন ত্বেতে হেতবঃ সন্তি যে কেচিন্মূর্তিসংস্থিতাঃ
অমর্ত্যস্য হি মর্ত্যেন সামান্যং নোপপদ্যতে
211.31
অবিদ্যাকর্মচেষ্টানাং কেচিদাহুঃ পুনর্ভবম্
কারণং লোভমোহৌ তু দোষাণাং চ নিষেবণম্
211.32
অবিদ্যাং ক্ষেত্রমাহুর্হি কর্ম বীজং তথা কৃতম্
তৃষ্ণাসংজননং স্নেহ এষ তেষাং পুনর্ভবঃ
211.33
তস্মিন্ব্যূঢে চ দগ্ধে চ চিত্তে মরণধর্মিণি
অন্যোঽন্যাজ্জায়তে দেহস্তমাহুঃ সত্ত্বসংক্ষয়ম্
211.34
যদা স রূপতশ্চান্যো জাতিতঃ শ্রুতিতোঽর্থতঃ
কথমস্মিন্স ইত্যেব সংবন্ধঃ স্যাদসংহিতঃ
211.35
এবং সতি চ কা প্রীতির্দানবিদ্যাতপোবলৈঃ
যদন্যাচরিতং কর্ম সর্বমন্যঃ প্রপদ্যতে
211.36
যদা হ্যয়মিহৈবান্যৈঃ প্রাকৃতৈর্দুঃখিতো ভবেৎ
সুখিতৈর্দুঃখিতৈর্বাপি দৃশ্যোঽপ্যস্য বিনির্ণয়ঃ
211.37
তথা হি মুসলৈর্হন্যুঃ শরীরং তত্পুনর্ভবেৎ
পৃথগ্জ্ঞানং যদন্যচ্চ যেনৈতন্নোপলভ্যতে
211.38
ঋতুঃ সংবত্সরস্তিথ্যঃ শীতোষ্ণে চ প্রিয়াপ্রিয়ে
যথাতীতানি পশ্যন্তি তাদৃশঃ সত্ত্বসংক্ষয়ঃ
211.39
জরয়া হি পরীতস্য মৃত্যুনা বা বিনাশিনা
দুর্বলং দুর্বলং পূর্বং গৃহস্যেব বিনশ্যতি
211.40
ইন্দ্রিয়াণি মনো বায়ুঃ শোণিতং মাংসমস্থি চ
আনুপূর্ব্যা বিনশ্যন্তি স্বং ধাতুমুপয়ান্তি চ
211.41
লোকয়াত্রাবিধানং চ দানধর্মফলাগমঃ
যদর্থং বেদশব্দাশ্চ ব্যবহারাশ্চ লৌকিকাঃ
211.42
ইতি সম্যঙ্মনস্যেতে বহবঃ সন্তি হেতবঃ
এতদস্তীদমস্তীতি ন কিংচিত্প্রতিপদ্যতে
211.43
তেষাং বিমৃশতামেবং তত্তত্সমভিধাবতাম্
ক্বচিন্নিবিশতে বুদ্ধিস্তত্র জীর্যতি বৃক্ষবৎ
211.44
এবমর্থৈরনর্থৈশ্চ দুঃখিতাঃ সর্বজন্তবঃ
আগমৈরপকৃষ্যন্তে হস্তিপৈর্হস্তিনো যথা
211.45
অর্থাংস্তথাত্যন্তসুখাবহাংশ্চ; লিপ্সন্ত এতে বহবো বিশুল্কাঃ
মহত্তরং দুঃখমভিপ্রপন্না; হিত্বামিষং মৃত্যুবশং প্রয়ান্তি
211.46
বিনাশিনো হ্যধ্রুবজীবিতস্য; কিং বন্ধুভির্মিত্রপরিগ্রহৈশ্চ
বিহায় যো গচ্ছতি সর্বমেব; ক্ষণেন গত্বা ন নিবর্ততে চ
211.47
ভূব্যোমতোয়ানলবায়বো হি; সদা শরীরং পরিপালয়ন্তি
ইতীদমালক্ষ্য কুতো রতির্ভবে;দ্বিনাশিনো হ্যস্য ন শর্ম বিদ্যতে
211.48
ইদমনুপধি বাক্যমচ্ছলং; পরমনিরাময়মাত্মসাক্ষিকম্
নরপতিরভিবীক্ষ্য বিস্মিতঃ; পুনরনুয়োক্তুমিদং প্রচক্রমে