Utshovঅধ্যায় 212
212.1
ভীষ্ম উবাচ
জনকো জনদেবস্তু জ্ঞাপিতঃ পরমর্ষিণা
পুনরেবানুপপ্রচ্ছ সাংপরায়ে ভবাভবৌ
212.2
ভগবন্যদিদং প্রেত্য সংজ্ঞা ভবতি কস্যচিৎ
এবং সতি কিমজ্ঞানং জ্ঞানং বা কিং করিষ্যতি
212.3
সর্বমুচ্ছেদনিষ্ঠং স্যাত্পশ্য চৈতদ্দ্বিজোত্তম
অপ্রমত্তঃ প্রমত্তো বা কিং বিশেষং করিষ্যতি
212.4
অসংসর্গো হি ভূতেষু সংসর্গো বা বিনাশিষু
কস্মৈ ক্রিয়েত কল্পেন নিশ্চয়ঃ কোঽত্র তত্ত্বতঃ
212.5
তমসা হি প্রতিচ্ছন্নং বিভ্রান্তমিব চাতুরম্
পুনঃ প্রশময়ন্বাক্যৈঃ কবিঃ পঞ্চশিখোঽব্রবীৎ
212.6
উচ্ছেদনিষ্ঠা নেহাস্তি ভাবনিষ্ঠা ন বিদ্যতে
অয়ং হ্যপি সমাহারঃ শরীরেন্দ্রিয়চেতসাম্
বর্ততে পৃথগন্যোন্যমপ্যপাশ্রিত্য কর্মসু
212.7
ধাতবঃ পঞ্চশাখোঽয়ং খং বায়ুর্জ্যোতিরম্বু ভূঃ
তে স্বভাবেন তিষ্ঠন্তি বিয়ুজ্যন্তে স্বভাবতঃ
212.8
আকাশং বায়ুরূষ্মা চ স্নেহো যচ্চাপি পার্থিবম্
এষ পঞ্চসমাহারঃ শরীরমিতি নৈকধা
জ্ঞানমূষ্মা চ বায়ুশ্চ ত্রিবিধঃ কর্মসংগ্রহঃ
212.9
ইন্দ্রিয়াণীন্দ্রিয়ার্থাশ্চ স্বভাবশ্চেতনা মনঃ
প্রাণাপানৌ বিকারশ্চ ধাতবশ্চাত্র নিঃসৃতাঃ
212.10
শ্রবণং স্পর্শনং জিহ্বা দৃষ্টির্নাসা তথৈব চ
ইন্দ্রিয়াণীতি পঞ্চৈতে চিত্তপূর্বংগমা গুণাঃ
212.11
তত্র বিজ্ঞানসংয়ুক্তা ত্রিবিধা বেদনা ধ্রুবা
সুখদুঃখেতি যামাহুরদুঃখেত্যসুখেতি চ
212.12
শব্দঃ স্পর্শশ্চ রূপং চ রসো গন্ধশ্চ মূর্ত্যথ
এতে হ্যামরণাত্পঞ্চ ষড্গুণা জ্ঞানসিদ্ধয়ে
212.13
তেষু কর্মনিসর্গশ্চ সর্বতত্ত্বার্থনিশ্চয়ঃ
তমাহুঃ পরমং শুক্রং বুদ্ধিরিত্যব্যয়ং মহৎ
212.14
ইমং গুণসমাহারমাত্মভাবেন পশ্যতঃ
অসম্যগ্দর্শনৈর্দুঃখমনন্তং নোপশাম্যতি
212.15
অনাত্মেতি চ যদ্দৃষ্টং তেনাহং ন মমেত্যপি
বর্ততে কিমধিষ্ঠানা প্রসক্তা দুঃখসংততিঃ
212.16
তত্র সম্যঙ্মনো নাম ত্যাগশাস্ত্রমনুত্তমম্
শৃণু যত্তব মোক্ষায় ভাষ্যমাণং ভবিষ্যতি
212.17
ত্যাগ এব হি সর্বেষামুক্তানামপি কর্মণাম্
নিত্যং মিথ্যাবিনীতানাং ক্লেশো দুঃখাবহো মতঃ
212.18
দ্রব্যত্যাগে তু কর্মাণি ভোগত্যাগে ব্রতান্যপি
সুখত্যাগে তপোয়োগঃ সর্বত্যাগে সমাপনা
212.19
তস্য মার্গোঽয়মদ্বৈধঃ সর্বত্যাগস্য দর্শিতঃ
বিপ্রহাণায় দুঃখস্য দুর্গতির্হ্যন্যথা ভবেৎ
212.20
পঞ্চ জ্ঞানেন্দ্রিয়াণ্যুক্ত্বা মনঃষষ্ঠানি চেতসি
মনঃষষ্ঠানি বক্ষ্যামি পঞ্চ কর্মেন্দ্রিয়াণি তু
212.21
হস্তৌ কর্মেন্দ্রিয়ং জ্ঞেয়মথ পাদৌ গতীন্দ্রিয়ম্
প্রজনানন্দয়োঃ শেফো বিসর্গে পায়ুরিন্দ্রিয়ম্
212.22
বাক্তু শব্দবিশেষার্থং গতিং পঞ্চান্বিতাং বিদুঃ
এবমেকাদশৈতানি বুদ্ধ্যা ত্ববসৃজেন্মনঃ
212.23
কর্ণৌ শব্দশ্চ চিত্তং চ ত্রয়ঃ শ্রবণসংগ্রহে
তথা স্পর্শে তথা রূপে তথৈব রসগন্ধয়োঃ
212.24
এবং পঞ্চত্রিকা হ্যেতে গুণাস্তদুপলব্ধয়ে
যেন যস্ত্রিবিধো ভাবঃ পর্যায়াত্সমুপস্থিতঃ
212.25
সাত্ত্বিকো রাজসশ্চৈব তামসশ্চৈব তে ত্রয়ঃ
ত্রিবিধা বেদনা যেষু প্রসূতা সর্বসাধনা
212.26
প্রহর্ষঃ প্রীতিরানন্দঃ সুখং সংশান্তচিত্ততা
অকুতশ্চিত্কুতশ্চিদ্বা চিত্ততঃ সাত্ত্বিকো গুণঃ
212.27
অতুষ্টিঃ পরিতাপশ্চ শোকো লোভস্তথাক্ষমা
লিঙ্গানি রজসস্তানি দৃশ্যন্তে হেত্বহেতুতঃ
212.28
অবিবেকস্তথা মোহঃ প্রমাদঃ স্বপ্নতন্দ্রিতা
কথংচিদপি বর্তন্তে বিবিধাস্তামসা গুণাঃ
212.29
তত্র যত্প্রীতিসংয়ুক্তং কায়ে মনসি বা ভবেৎ
বর্ততে সাত্ত্বিকো ভাব ইত্যপেক্ষেত তত্তথা
212.30
যত্তু সংতাপসংয়ুক্তমপ্রীতিকরমাত্মনঃ
প্রবৃত্তং রজ ইত্যেব ততস্তদভিচিন্তয়েৎ
212.31
অথ যন্মোহসংয়ুক্তং কায়ে মনসি বা ভবেৎ
অপ্রতর্ক্যমবিজ্ঞেয়ং তমস্তদুপধারয়েৎ
212.32
তদ্ধি শ্রোত্রাশ্রয়ং ভূতং শব্দঃ শ্রোত্রং সমাশ্রিতঃ
নোভয়ং শব্দবিজ্ঞানে বিজ্ঞানস্যেতরস্য বা
212.33
এবং ত্বক্চক্ষুষী জিহ্বা নাসিকা চৈব পঞ্চমী
স্পর্শে রূপে রসে গন্ধে তানি চেতো মনশ্চ তৎ
212.34
স্বকর্ময়ুগপদ্ভাবো দশস্বেতেষু তিষ্ঠতি
চিত্তমেকাদশং বিদ্ধি বুদ্ধির্দ্বাদশমী ভবেৎ
212.35
তেষাময়ুগপদ্ভাব উচ্ছেদো নাস্তি তামসঃ
আস্থিতো যুগপদ্ভাবে ব্যবহারঃ স লৌকিকঃ
212.36
ইন্দ্রিয়াণ্যবসৃজ্যাপি দৃষ্ট্বা পূর্বং শ্রুতাগমম্
চিন্তয়ন্নানুপর্যেতি ত্রিভিরেবান্বিতো গুণৈঃ
212.37
যত্তমোপহতং চিত্তমাশু সংচারমধ্রুবম্
করোত্যুপরমং কালে তদাহুস্তামসং সুখম্
212.38
যদ্যদাগমসংয়ুক্তং ন কৃত্স্নমুপশাম্যতি
অথ তত্রাপ্যুপাদত্তে তমো ব্যক্তমিবানৃতম্
212.39
এবমেষ প্রসংখ্যাতঃ স্বকর্মপ্রত্যয়ী গুণঃ
কথংচিদ্বর্ততে সম্যক্কেষাংচিদ্বা ন বর্ততে
212.40
এবমাহুঃ সমাহারং ক্ষেত্রমধ্যাত্মচিন্তকাঃ
স্থিতো মনসি যো ভাবঃ স বৈ ক্ষেত্রজ্ঞ উচ্যতে
212.41
এবং সতি ক উচ্ছেদঃ শাশ্বতো বা কথং ভবেৎ
স্বভাবাদ্বর্তমানেষু সর্বভূতেষু হেতুতঃ
212.42
যথার্ণবগতা নদ্যো ব্যক্তীর্জহতি নাম চ
ন চ স্বতাং নিয়চ্ছন্তি তাদৃশঃ সত্ত্বসংক্ষয়ঃ
212.43
এবং সতি কুতঃ সংজ্ঞা প্রেত্যভাবে পুনর্ভবেৎ
প্রতিসংমিশ্রিতে জীবে গৃহ্যমাণে চ মধ্যতঃ
212.44
ইমাং তু যো বেদ বিমোক্ষবুদ্ধি;মাত্মানমন্বিচ্ছতি চাপ্রমত্তঃ
ন লিপ্যতে কর্মফলৈরনিষ্টৈঃ; পত্রং বিসস্যেব জলেন সিক্তম্
212.45
দৃঢৈশ্চ পাশৈর্বহুভির্বিমুক্তঃ; প্রজানিমিত্তৈরপি দৈবতৈশ্চ
যদা হ্যসৌ সুখদুঃখে জহাতি; মুক্তস্তদাগ্র্যাং গতিমেত্যলিঙ্গঃ
শ্রুতিপ্রমাণাগমমঙ্গলৈশ্চ; শেতে জরামৃত্যুভয়াদতীতঃ
212.46
ক্ষীণে চ পুণ্যে বিগতে চ পাপে; ততোনিমিত্তে চ ফলে বিনষ্টে
অলেপমাকাশমলিঙ্গমেব;মাস্থায় পশ্যন্তি মহদ্ধ্যসক্তাঃ
212.47
যথোর্ণনাভিঃ পরিবর্তমান;স্তন্তুক্ষয়ে তিষ্ঠতি পাত্যমানঃ
তথা বিমুক্তঃ প্রজহাতি দুঃখং; বিধ্বংসতে লোষ্ট ইবাদ্রিমর্চ্ছন্
212.48
যথা রুরুঃ শৃঙ্গমথো পুরাণং; হিত্বা ত্বচং বাপ্যুরগো যথাবৎ
বিহায় গচ্ছত্যনবেক্ষমাণ;স্তথা বিমুক্তো বিজহাতি দুঃখম্
212.49
দ্রুমং যথা বাপ্যুদকে পতন্ত;মুত্সৃজ্য পক্ষী প্রপতত্যসক্তঃ
তথা হ্যসৌ সুখদুঃখে বিহায়; মুক্তঃ পরার্ধ্যাং গতিমেত্যলিঙ্গঃ
212.50
অপি চ ভবতি মৈথিলেন গীতং; নগরমুপাহিতমগ্নিনাভিবীক্ষ্য
ন খলু মম তুষোঽপি দহ্যতেঽত্র; স্বয়মিদমাহ কিল স্ম ভূমিপালঃ
212.51
ইদমমৃতপদং বিদেহরাজঃ; স্বয়মিহ পঞ্চশিখেন ভাষ্যমাণঃ
নিখিলমভিসমীক্ষ্য নিশ্চিতার্থং; পরমসুখী বিজহার বীতশোকঃ
212.52
ইমং হি যঃ পঠতি বিমোক্ষনিশ্চয়ং; ন হীয়তে সততমবেক্ষতে তথা
উপদ্রবান্নানুভবত্যদুঃখিতঃ; প্রমুচ্যতে কপিলমিবৈত্য মৈথিলঃ