অধ্যায় 213

213.1

যুধিষ্ঠির উবাচ
কিং কুর্বন্সুখমাপ্নোতি কিং কুর্বন্দুঃখমাপ্নুতে
কিং কুর্বন্নির্ভয়ো লোকে সিদ্ধশ্চরতি ভারত

ভীষ্ম উবাচ
দমমেব প্রশংসন্তি বৃদ্ধাঃ শ্রুতিসমাধয়ঃ
সর্বেষামেব বর্ণানাং ব্রাহ্মণস্য বিশেষতঃ

নাদান্তস্য ক্রিয়াসিদ্ধির্যথাবদুপলভ্যতে
ক্রিয়া তপশ্চ বেদাশ্চ দমে সর্বং প্রতিষ্ঠিতম্

দমস্তেজো বর্ধয়তি পবিত্রং দম উচ্যতে
বিপাপ্মা নির্ভয়ো দান্তঃ পুরুষো বিন্দতে মহৎ

সুখং দান্তঃ প্রস্বপিতি সুখং চ প্রতিবুধ্যতে
সুখং লোকে বিপর্যেতি মনশ্চাস্য প্রসীদতি

তেজো দমেন ধ্রিয়তে ন তত্তীক্ষ্ণোঽধিগচ্ছতি
অমিত্রাংশ্চ বহূন্নিত্যং পৃথগাত্মনি পশ্যতি

ক্রব্যাদ্ভ্য ইব ভূতানামদান্তেভ্যঃ সদা ভয়ম্
তেষাং বিপ্রতিষেধার্থং রাজা সৃষ্টঃ স্বয়ংভুবা

আশ্রমেষু চ সর্বেষু দম এব বিশিষ্যতে
যচ্চ তেষু ফলং ধর্মে ভূয়ো দান্তে তদুচ্যতে

তেষাং লিঙ্গানি বক্ষ্যামি যেষাং সমুদয়ো দমঃ
অকার্পণ্যমসংরম্ভঃ সংতোষঃ শ্রদ্দধানতা

অক্রোধ আর্জবং নিত্যং নাতিবাদো ন মানিতা
গুরুপূজানসূয়া চ দয়া ভূতেষ্বপৈশুনম্

জনবাদমৃষাবাদস্তুতিনিন্দাবিবর্জনম্
সাধুকামশ্চাস্পৃহয়ন্নায়াতি প্রত্যয়ং নৃষু

অবৈরকৃত্সূপচারঃ সমো নিন্দাপ্রশংসয়োঃ
সুবৃত্তঃ শীলসংপন্নঃ প্রসন্নাত্মাত্মবান্বুধঃ
প্রাপ্য লোকে চ সত্কারং স্বর্গং বৈ প্রেত্য গচ্ছতি

সর্বভূতহিতে যুক্তো ন স্ময়াদ্দ্বেষ্টি বৈ জনম্
মহাহ্রদ ইবাক্ষোভ্য প্রজ্ঞাতৃপ্তঃ প্রসীদতি

অভয়ং সর্বভূতেভ্যঃ সর্বেষামভয়ং যতঃ
নমস্যঃ সর্বভূতানাং দান্তো ভবতি জ্ঞানবান্

ন হৃষ্যতি মহত্যর্থে ব্যসনে চ ন শোচতি
স বৈ পরিমিতপ্রজ্ঞঃ স দান্তো দ্বিজ উচ্যতে

কর্মভিঃ শ্রুতসংপন্নঃ সদ্ভিরাচরিতৈঃ শুভৈঃ
সদৈব দমসংয়ুক্তস্তস্য ভুঙ্ক্তে মহত্ফলম্

অনসূয়া ক্ষমা শান্তিঃ সংতোষঃ প্রিয়বাদিতা
সত্যং দানমনায়াসো নৈষ মার্গো দুরাত্মনাম্

কামক্রোধৌ বশে কৃত্বা ব্রহ্মচারী জিতেন্দ্রিয়ঃ
বিক্রম্য ঘোরে তপসি ব্রাহ্মণঃ সংশিতব্রতঃ
কালাকাঙ্ক্ষী চরেল্লোকান্নিরপায় ইবাত্মবান্