অধ্যায় 214

214.1

যুধিষ্ঠির উবাচ
দ্বিজাতয়ো ব্রতোপেতা যদিদং ভুঞ্জতে হবিঃ
অন্নং ব্রাহ্মণকামায় কথমেতত্পিতামহ

ভীষ্ম উবাচ
অবেদোক্তব্রতোপেতা ভুঞ্জানাঃ কার্যকারিণঃ
বেদোক্তেষু চ ভুঞ্জানা ব্রতলুপ্তা যুধিষ্ঠির

যুধিষ্ঠির উবাচ
যদিদং তপ ইত্যাহুরুপবাসং পৃথগ্জনাঃ
এতত্তপো মহারাজ উতাহো কিং তপো ভবেৎ

ভীষ্ম উবাচ
মাসপক্ষোপবাসেন মন্যন্তে যত্তপো জনাঃ
আত্মতন্ত্রোপঘাতঃ স ন তপস্তত্সতাং মতম্
ত্যাগশ্চ সন্নতিশ্চৈব শিষ্যতে তপ উত্তমম্

সদোপবাসী চ ভবেদ্ব্রহ্মচারী সদৈব চ
মুনিশ্চ স্যাত্সদা বিপ্রো দৈবতং চ সদা ভজেৎ

কুটুম্বিকো ধর্মকামঃ সদাস্বপ্নশ্চ ভারত
অমাংসাশী সদা চ স্যাত্পবিত্রং চ সদা জপেৎ

অমৃতাশী সদা চ স্যান্ন চ স্যাদ্বিষভোজনঃ
বিঘসাশী সদা চ স্যাত্সদা চৈবাতিথিপ্রিয়ঃ

যুধিষ্ঠির উবাচ
কথং সদোপবাসী স্যাদ্ব্রহ্মচারী কথং ভবেৎ
বিঘসাশী কথং চ স্যাত্সদা চৈবাতিথিপ্রিয়ঃ

ভীষ্ম উবাচ
অন্তরা প্রাতরাশং চ সায়মাশং তথৈব চ
সদোপবাসী চ ভবেদ্যো ন ভুঙ্ক্তে কথংচন

ভার্যাং গচ্ছন্ব্রহ্মচারী ঋতৌ ভবতি ব্রাহ্মণঃ
ঋতবাদী সদা চ স্যাজ্জ্ঞাননিত্যশ্চ যো নরঃ

অভক্ষয়ন্বৃথামাংসমমাংসাশী ভবত্যুত
দাননিত্যঃ পবিত্রশ্চ অস্বপ্নশ্চ দিবাস্বপন্

ভৃত্যাতিথিষু যো ভুঙ্ক্তে ভুক্তবত্সু সদা স হ
অমৃতং সকলং ভুঙ্ক্ত ইতি বিদ্ধি যুধিষ্ঠির

অভুক্তবত্সু নাশ্নানঃ সততং যস্তু বৈ দ্বিজঃ
অভোজনেন তেনাস্য জিতঃ স্বর্গো ভবত্যুত

দেবতাভ্যঃ পিতৃভ্যশ্চ ভৃত্যেভ্যোঽতিথিভিঃ সহ
অবশিষ্টং তু যোঽশ্নাতি তমাহুর্বিঘসাশিনম্

তেষাং লোকা হ্যপর্যন্তাঃ সদনে ব্রহ্মণা সহ
উপস্থিতাশ্চাপ্সরোভিঃ পরিয়ান্তি দিবৌকসঃ

দেবতাভিশ্চ যে সার্ধং পিতৃভিশ্চোপভুঞ্জতে
রমন্তে পুত্রপৌত্রৈশ্চ তেষাং গতিরনুত্তমা