Utshovঅধ্যায় 215
215.1
যুধিষ্ঠির উবাচ
যদিদং কর্ম লোকেঽস্মিঞ্শুভং বা যদি বাশুভম্
পুরুষং যোজয়ত্যেব ফলয়োগেন ভারত
215.2
কর্তা স্বিত্তস্য পুরুষ উতাহো নেতি সংশয়ঃ
এতদিচ্ছামি তত্ত্বেন ত্বত্তঃ শ্রোতুং পিতামহ
215.3
ভীষ্ম উবাচ
অত্রাপ্যুদাহরন্তীমমিতিহাসং পুরাতনম্
প্রহ্রাদস্য চ সংবাদমিন্দ্রস্য চ যুধিষ্ঠির
215.4
অসক্তং ধূতপাপ্মানং কুলে জাতং বহুশ্রুতম্
অস্তম্ভমনহংকারং সত্ত্বস্থং সময়ে রতম্
215.5
তুল্যনিন্দাস্তুতিং দান্তং শূন্যাগারনিবেশনম্
চরাচরাণাং ভূতানাং বিদিতপ্রভবাপ্যয়ম্
215.6
অক্রুধ্যন্তমহৃষ্যন্তমপ্রিয়েষু প্রিয়েষু চ
কাঞ্চনে বাথ লোষ্টে বা উভয়োঃ সমদর্শনম্
215.7
আত্মনিঃশ্রেয়সজ্ঞানে ধীরং নিশ্চিতনিশ্চয়ম্
পরাবরজ্ঞং ভূতানাং সর্বজ্ঞং সমদর্শনম্
215.8
শক্রঃ প্রহ্রাদমাসীনমেকান্তে সংয়তেন্দ্রিয়ম্
বুভুত্সমানস্তত্প্রজ্ঞামভিগম্যেদমব্রবীৎ
215.9
যৈঃ কৈশ্চিত্সংমতো লোকে গুণৈঃ স্যাত্পুরুষো নৃষু
ভবত্যনপগান্সর্বাংস্তান্গুণাঁল্লক্ষয়ামহে
215.10
অথ তে লক্ষ্যতে বুদ্ধিঃ সমা বালজনৈরিহ
আত্মানং মন্যমানঃ সঞ্শ্রেয়ঃ কিমিহ মন্যসে
215.11
বদ্ধঃ পাশৈশ্চ্যুতঃ স্থানাদ্দ্বিষতাং বশমাগতঃ
শ্রিয়া বিহীনঃ প্রহ্রাদ শোচিতব্যে ন শোচসি
215.12
প্রজ্ঞালাভাত্তু দৈতেয় উতাহো ধৃতিমত্তয়া
প্রহ্রাদ স্বস্থরূপোঽসি পশ্যন্ব্যসনমাত্মনঃ
215.13
ইতি সংচোদিতস্তেন ধীরো নিশ্চিতনিশ্চয়ঃ
উবাচ শ্লক্ষ্ণয়া বাচা স্বাং প্রজ্ঞামনুবর্ণয়ন্
215.14
প্রবৃত্তিং চ নিবৃত্তিং চ ভূতানাং যো ন বুধ্যতে
তস্য স্তম্ভো ভবেদ্বাল্যান্নাস্তি স্তম্ভোঽনুপশ্যতঃ
215.15
স্বভাবাত্সংপ্রবর্তন্তে নিবর্তন্তে তথৈব চ
সর্বে ভাবাস্তথাভাবাঃ পুরুষার্থো ন বিদ্যতে
215.16
পুরুষার্থস্য চাভাবে নাস্তি কশ্চিত্স্বকারকঃ
স্বয়ং তু কুর্বতস্তস্য জাতু মানো ভবেদিহ
215.17
যস্তু কর্তারমাত্মানং মন্যতে সাধ্বসাধুনোঃ
তস্য দোষবতী প্রজ্ঞা স্বমূর্ত্যজ্ঞেতি মে মতিঃ
215.18
যদি স্যাত্পুরুষঃ কর্তা শক্রাত্মশ্রেয়সে ধ্রুবম্
আরম্ভাস্তস্য সিধ্যেরন্ন চ জাতু পরাভবেৎ
215.19
অনিষ্টস্য হি নির্বৃত্তিরনিবৃত্তিঃ প্রিয়স্য চ
লক্ষ্যতে যতমানানাং পুরুষার্থস্ততঃ কুতঃ
215.20
অনিষ্টস্যাভিনির্বৃত্তিমিষ্টসংবৃত্তিমেব চ
অপ্রয়ত্নেন পশ্যামঃ কেষাংচিত্তত্স্বভাবতঃ
215.21
প্রতিরূপধরাঃ কেচিদ্দৃশ্যন্তে বুদ্ধিসত্তমাঃ
বিরূপেভ্যোঽল্পবুদ্ধিভ্যো লিপ্সমানা ধনাগমম্
215.22
স্বভাবপ্রেরিতাঃ সর্বে নিবিশন্তে গুণা যদা
শুভাশুভাস্তদা তত্র তস্য কিং মানকারণম্
215.23
স্বভাবাদেব তত্সর্বমিতি মে নিশ্চিতা মতিঃ
আত্মপ্রতিষ্ঠিতা প্রজ্ঞা মম নাস্তি ততোঽন্যথা
215.24
কর্মজং ত্বিহ মন্যেঽহং ফলয়োগং শুভাশুভম্
কর্মণাং বিষয়ং কৃত্স্নমহং বক্ষ্যামি তচ্ছৃণু
215.25
যথা বেদয়তে কশ্চিদোদনং বায়সো বদন্
এবং সর্বাণি কর্মাণি স্বভাবস্যৈব লক্ষণম্
215.26
বিকারানেব যো বেদ ন বেদ প্রকৃতিং পরাম্
তস্য স্তম্ভো ভবেদ্বাল্যান্নাস্তি স্তম্ভোঽনুপশ্যতঃ
215.27
স্বভাবভাবিনো ভাবান্সর্বানেবেহ নিশ্চয়ে
বুধ্যমানস্য দর্পো বা মানো বা কিং করিষ্যতি
215.28
বেদ ধর্মবিধিং কৃত্স্নং ভূতানাং চাপ্যনিত্যতাম্
তস্মাচ্ছক্র ন শোচামি সর্বং হ্যেবেদমন্তবৎ
215.29
নির্মমো নিরহংকারো নিরীহো মুক্তবন্ধনঃ
স্বস্থোঽব্যপেতঃ পশ্যামি ভূতানাং প্রভবাপ্যয়ৌ
215.30
কৃতপ্রজ্ঞস্য দান্তস্য বিতৃষ্ণস্য নিরাশিষঃ
নায়াসো বিদ্যতে শক্র পশ্যতো লোকবিদ্যয়া
215.31
প্রকৃতৌ চ বিকারে চ ন মে প্রীতির্ন চ দ্বিষে
দ্বেষ্টারং ন চ পশ্যামি যো মমাদ্য মমায়তে
215.32
নোর্ধ্বং নাবাঙ্ন তির্যক্চ ন ক্বচিচ্ছক্র কাময়ে
ন বিজ্ঞানে ন বিজ্ঞেয়ে নাজ্ঞানে শর্ম বিদ্যতে
215.33
শক্র উবাচ
যেনৈষা লভ্যতে প্রজ্ঞা যেন শান্তিরবাপ্যতে
প্রব্রূহি তমুপায়ং মে সম্যক্প্রহ্রাদ পৃচ্ছতে
215.34
প্রহ্রাদ উবাচ
আর্জবেনাপ্রমাদেন প্রসাদেনাত্মবত্তয়া
বৃদ্ধশুশ্রূষয়া শক্র পুরুষো লভতে মহৎ
215.35
স্বভাবাল্লভতে প্রজ্ঞাং শান্তিমেতি স্বভাবতঃ
স্বভাবাদেব তত্সর্বং যত্কিংচিদনুপশ্যসি
215.36
ভীষ্ম উবাচ
ইত্যুক্তো দৈত্যপতিনা শক্রো বিস্ময়মাগমৎ
প্রীতিমাংশ্চ তদা রাজংস্তদ্বাক্যং প্রত্যপূজয়ৎ
215.37
স তদাভ্যর্চ্য দৈত্যেন্দ্রং ত্রৈলোক্যপতিরীশ্বরঃ
অসুরেন্দ্রমুপামন্ত্র্য জগাম স্বং নিবেশনম্