Utshovঅধ্যায় 216
216.1
যুধিষ্ঠির উবাচ
যয়া বুদ্ধ্যা মহীপালো ভ্রষ্টশ্রীর্বিচরেন্মহীম্
কালদণ্ডবিনিষ্পিষ্টস্তন্মে ব্রূহি পিতামহ
216.2
ভীষ্ম উবাচ
অত্রাপ্যুদাহরন্তীমমিতিহাসং পুরাতনম্
বাসবস্য চ সংবাদং বলের্বৈরোচনস্য চ
216.3
পিতামহমুপাগত্য প্রণিপত্য কৃতাঞ্জলিঃ
সর্বানেবাসুরাঞ্জিত্বা বলিং পপ্রচ্ছ বাসবঃ
216.4
যস্য স্ম দদতো বিত্তং ন কদাচন হীয়তে
তং বলিং নাধিগচ্ছামি ব্রহ্মন্নাচক্ষ্ব মে বলিম্
216.5
স এব হ্যস্তময়তে স স্ম বিদ্যোততে দিশঃ
স বর্ষতি স্ম বর্ষাণি যথাকালমতন্দ্রিতঃ
তং বলিং নাধিগচ্ছামি ব্রহ্মন্নাচক্ষ্ব মে বলিম্
216.6
স বায়ুর্বরুণশ্চৈব স রবিঃ স চ চন্দ্রমাঃ
সোঽগ্নিস্তপতি ভূতানি পৃথিবী চ ভবত্যুত
তং বলিং নাধিগচ্ছামি ব্রহ্মন্নাচক্ষ্ব মে বলিম্
216.7
ব্রহ্মোবাচ
নৈতত্তে সাধু মঘবন্যদেতদনুপৃচ্ছসি
পৃষ্টস্তু নানৃতং ব্রূয়াত্তস্মাদ্বক্ষ্যামি তে বলিম্
216.8
উষ্ট্রেষু যদি বা গোষু খরেষ্বশ্বেষু বা পুনঃ
বরিষ্ঠো ভবিতা জন্তুঃ শূন্যাগারে শচীপতে
216.9
শক্র উবাচ
যদি স্ম বলিনা ব্রহ্মঞ্শূন্যাগারে সমেয়িবান্
হন্যামেনং ন বা হন্যাং তদ্ব্রহ্মন্ননুশাধি মাম্
216.10
ব্রহ্মোবাচ
মা স্ম শক্র বলিং হিংসীর্ন বলির্বধমর্হতি
ন্যায়াংস্তু শক্র প্রষ্টব্যস্ত্বয়া বাসব কাম্যয়া
216.11
ভীষ্ম উবাচ
এবমুক্তো ভগবতা মহেন্দ্রঃ পৃথিবীং তদা
চচারৈরাবতস্কন্ধমধিরুহ্য শ্রিয়া বৃতঃ
216.12
ততো দদর্শ স বলিং খরবেষেণ সংবৃতম্
যথাখ্যাতং ভগবতা শূন্যাগারকৃতালয়ম্
216.13
শক্র উবাচ
খরয়োনিমনুপ্রাপ্তস্তুষভক্ষোঽসি দানব
ইয়ং তে যোনিরধমা শোচস্যাহো ন শোচসি
216.14
অদৃষ্টং বত পশ্যামি দ্বিষতাং বশমাগতম্
শ্রিয়া বিহীনং মিত্রৈশ্চ ভ্রষ্টবীর্যপরাক্রমম্
216.15
যত্তদ্যানসহস্রেণ জ্ঞাতিভিঃ পরিবারিতঃ
লোকান্প্রতাপয়ন্সর্বান্যাস্যস্মানবিতর্কয়ন্
216.16
ত্বন্মুখাশ্চৈব দৈতেয়া ব্যতিষ্ঠংস্তব শাসনে
অকৃষ্টপচ্যা পৃথিবী তবৈশ্বর্যে বভূব হ
ইদং চ তেঽদ্য ব্যসনং শোচস্যাহো ন শোচসি
216.17
যদাতিষ্ঠঃ সমুদ্রস্য পূর্বকূলে বিলেলিহন্
জ্ঞাতিভ্যো বিভজন্বিত্তং তদাসীত্তে মনঃ কথম্
216.18
যত্তে সহস্রসমিতা ননৃতুর্দেবয়োষিতঃ
বহূনি বর্ষপূগানি বিহারে দীপ্যতঃ শ্রিয়া
216.19
সর্বাঃ পুষ্করমালিন্যঃ সর্বাঃ কাঞ্চনসপ্রভাঃ
কথমদ্য তদা চৈব মনস্তে দানবেশ্বর
216.20
ছত্রং তবাসীত্সুমহত্সৌবর্ণং মণিভূষিতম্
ননৃতুর্যত্র গন্ধর্বাঃ ষট্সহস্রাণি সপ্তধা
216.21
যূপস্তবাসীত্সুমহান্যজতঃ সর্বকাঞ্চনঃ
যত্রাদদঃ সহস্রাণাময়ুতানি গবাং দশ
216.22
যদা তু পৃথিবীং সর্বাং যজমানোঽনুপর্যয়াঃ
শম্যাক্ষেপেণ বিধিনা তদাসীত্কিং নু তে হৃদি
216.23
ন তে পশ্যামি ভৃঙ্গারং ন ছত্রং ব্যজনং ন চ
ব্রহ্মদত্তাং চ তে মালাং ন পশ্যাম্যসুরাধিপ
216.24
বলিরুবাচ
ন ত্বং পশ্যসি ভৃঙ্গারং ন ছত্রং ব্যজনং ন চ
ব্রহ্মদত্তাং চ মে মালাং ন ত্বং দ্রক্ষ্যসি বাসব
216.25
গুহায়াং নিহিতানি ত্বং মম রত্নানি পৃচ্ছসি
যদা মে ভবিতা কালস্তদা ত্বং তানি দ্রক্ষ্যসি
216.26
ন ত্বেতদনুরূপং তে যশসো বা কুলস্য বা
সমৃদ্ধার্থোঽসমৃদ্ধার্থং যন্মাং কত্থিতুমিচ্ছসি
216.27
ন হি দুঃখেষু শোচন্তি ন প্রহৃষ্যন্তি চর্দ্ধিষু
কৃতপ্রজ্ঞা জ্ঞানতৃপ্তাঃ ক্ষান্তাঃ সন্তো মনীষিণঃ
216.28
ত্বং তু প্রাকৃতয়া বুদ্ধ্যা পুরংদর বিকত্থসে
যদাহমিব ভাবী ত্বং তদা নৈবং বদিষ্যসি