Utshovঅধ্যায় 217
217.1
ভীষ্ম উবাচ
পুনরেব তু তং শক্রঃ প্রহসন্নিদমব্রবীৎ
নিঃশ্বসন্তং যথা নাগং প্রব্যাহারায় ভারত
217.2
যত্তদ্যানসহস্রেণ জ্ঞাতিভিঃ পরিবারিতঃ
লোকান্প্রতাপয়ন্সর্বান্যাস্যস্মানবিতর্কয়ন্
217.3
দৃষ্ট্বা সুকৃপণাং চেমামবস্থামাত্মনো বলে
জ্ঞাতিমিত্রপরিত্যক্তঃ শোচস্যাহো ন শোচসি
217.4
প্রীতিং প্রাপ্যাতুলাং পূর্বং লোকাংশ্চাত্মবশে স্থিতান্
বিনিপাতমিমং চাদ্য শোচস্যাহো ন শোচসি
217.5
বলিরুবাচ
অনিত্যমুপলক্ষ্যেদং কালপর্যায়মাত্মনঃ
তস্মাচ্ছক্র ন শোচামি সর্বং হ্যেবেদমন্তবৎ
217.6
অন্তবন্ত ইমে দেহা ভূতানামমরাধিপ
তেন শক্র ন শোচামি নাপরাধাদিদং মম
217.7
জীবিতং চ শরীরং চ প্রেত্য বৈ সহ জায়তে
উভে সহ বিবর্ধেতে উভে সহ বিনশ্যতঃ
217.8
তদীদৃশমিদং ভাবমবশঃ প্রাপ্য কেবলম্
যদ্যেবমভিজানামি কা ব্যথা মে বিজানতঃ
217.9
ভূতানাং নিধনং নিষ্ঠা স্রোতসামিব সাগরঃ
নৈতত্সম্যগ্বিজানন্তো নরা মুহ্যন্তি বজ্রভৃৎ
217.10
যে ত্বেবং নাভিজানন্তি রজোমোহপরায়ণাঃ
তে কৃচ্ছ্রং প্রাপ্য সীদন্তি বুদ্ধির্যেষাং প্রণশ্যতি
217.11
বুদ্ধিলাভে হি পুরুষঃ সর্বং নুদতি কিল্বিষম্
বিপাপ্মা লভতে সত্ত্বং সত্ত্বস্থঃ সংপ্রসীদতি
217.12
ততস্তু যে নিবর্তন্তে জায়ন্তে বা পুনঃ পুনঃ
কৃপণাঃ পরিতপ্যন্তে তেঽনর্থৈঃ পরিচোদিতাঃ
217.13
অর্থসিদ্ধিমনর্থং চ জীবিতং মরণং তথা
সুখদুঃখফলং চৈব ন দ্বেষ্মি ন চ কাময়ে
217.14
হতং হন্তি হতো হ্যেব যো নরো হন্তি কংচন
উভৌ তৌ ন বিজানীতো যশ্চ হন্তি হতশ্চ যঃ
217.15
হত্বা জিত্বা চ মঘবন্যঃ কশ্চিত্পুরুষায়তে
অকর্তা হ্যেব ভবতি কর্তা ত্বেব করোতি তৎ
217.16
কো হি লোকস্য কুরুতে বিনাশপ্রভবাবুভৌ
কৃতং হি তত্কৃতেনৈব কর্তা তস্যাপি চাপরঃ
217.17
পৃথিবী বায়ুরাকাশমাপো জ্যোতিশ্চ পঞ্চমম্
এতদ্যোনীনি ভূতানি তত্র কা পরিদেবনা
217.18
মহাবিদ্যোঽল্পবিদ্যশ্চ বলবান্দুর্বলশ্চ যঃ
দর্শনীয়ো বিরূপশ্চ সুভগো দুর্ভগশ্চ যঃ
217.19
সর্বং কালঃ সমাদত্তে গম্ভীরঃ স্বেন তেজসা
তস্মিন্কালবশং প্রাপ্তে কা ব্যথা মে বিজানতঃ
217.20
দগ্ধমেবানুদহতি হতমেবানুহন্তি চ
নশ্যতে নষ্টমেবাগ্রে লব্ধব্যং লভতে নরঃ
217.21
নাস্য দ্বীপঃ কুতঃ পারং নাবারঃ সংপ্রদৃশ্যতে
নান্তমস্য প্রপশ্যামি বিধের্দিব্যস্য চিন্তয়ন্
217.22
যদি মে পশ্যতঃ কালো ভূতানি ন বিনাশয়েৎ
স্যান্মে হর্ষশ্চ দর্পশ্চ ক্রোধশ্চৈব শচীপতে
217.23
তুষভক্ষং তু মাং জ্ঞাত্বা প্রবিবিক্তজনে গৃহে
বিভ্রতং গার্দভং রূপমাদিশ্য পরিগর্হসে
217.24
ইচ্ছন্নহং বিকুর্যাং হি রূপাণি বহুধাত্মনঃ
বিভীষণানি যানীক্ষ্য পলায়েথাস্ত্বমেব মে
217.25
কালঃ সর্বং সমাদত্তে কালঃ সর্বং প্রয়চ্ছতি
কালেন বিধৃতং সর্বং মা কৃথাঃ শক্র পৌরুষম্
217.26
পুরা সর্বং প্রব্যথতে ময়ি ক্রুদ্ধে পুরংদর
অবৈমি ত্বস্য লোকস্য ধর্মং শক্র সনাতনম্
217.27
ত্বমপ্যেবমপেক্ষস্ব মাত্মনা বিস্ময়ং গমঃ
প্রভবশ্চ প্রভাবশ্চ নাত্মসংস্থঃ কদাচন
217.28
কৌমারমেব তে চিত্তং তথৈবাদ্য যথা পুরা
সমবেক্ষস্ব মঘবন্বুদ্ধিং বিন্দস্ব নৈষ্ঠিকীম্
217.29
দেবা মনুষ্যাঃ পিতরো গন্ধর্বোরগরাক্ষসাঃ
আসন্সর্বে মম বশে তত্সর্বং বেত্থ বাসব
217.30
নমস্তস্যৈ দিশেঽপ্যস্তু যস্যাং বৈরোচনো বলিঃ
ইতি মামভ্যপদ্যন্ত বুদ্ধিমাত্সর্যমোহিতাঃ
217.31
নাহং তদনুশোচামি নাত্মভ্রংশং শচীপতে
এবং মে নিশ্চিতা বুদ্ধিঃ শাস্তুস্তিষ্ঠাম্যহং বশে
217.32
দৃশ্যতে হি কুলে জাতো দর্শনীয়ঃ প্রতাপবান্
দুঃখং জীবন্সহামাত্যো ভবিতব্যং হি তত্তথা
217.33
দৌষ্কুলেয়স্তথা মূঢো দুর্জাতঃ শক্র দৃশ্যতে
সুখং জীবন্সহামাত্যো ভবিতব্যং হি তত্তথা
217.34
কল্যাণী রূপসংপন্না দুর্ভগা শক্র দৃশ্যতে
অলক্ষণা বিরূপা চ সুভগা শক্র দৃশ্যতে
217.35
নৈতদস্মত্কৃতং শক্র নৈতচ্ছক্র ত্বয়া কৃতম্
যত্ত্বমেবংগতো বজ্রিন্যদ্বাপ্যেবংগতা বয়ম্
217.36
ন কর্ম তব নান্যেষাং কুতো মম শতক্রতো
ঋদ্ধির্বাপ্যথ বা নর্দ্ধিঃ পর্যায়কৃতমেব তৎ
217.37
পশ্যামি ত্বা বিরাজন্তং দেবরাজমবস্থিতম্
শ্রীমন্তং দ্যুতিমন্তং চ গর্জন্তং চ মমোপরি
217.38
এতচ্চৈবং ন চেত্কালো মামাক্রম্য স্থিতো ভবেৎ
পাতয়েয়মহং ত্বাদ্য সবজ্রমপি মুষ্টিনা
217.39
ন তু বিক্রমকালোঽয়ং ক্ষমাকালোঽয়মাগতঃ
কালঃ স্থাপয়তে সর্বং কালঃ পচতি বৈ তথা
217.40
মাং চেদভ্যাগতঃ কালো দানবেশ্বরমূর্জিতম্
গর্জন্তং প্রতপন্তং চ কমন্যং নাগমিষ্যতি
217.41
দ্বাদশানাং হি ভবতামাদিত্যানাং মহাত্মনাম্
তেজাংস্যেকেন সর্বেষাং দেবরাজ হৃতানি মে
217.42
অহমেবোদ্বহাম্যাপো বিসৃজামি চ বাসব
তপামি চৈব ত্রৈলোক্যং বিদ্যোতাম্যহমেব চ
217.43
সংরক্ষামি বিলুম্পামি দদাম্যহমথাদদে
সংয়চ্ছামি নিয়চ্ছামি লোকেষু প্রভুরীশ্বরঃ
217.44
তদদ্য বিনিবৃত্তং মে প্রভুত্বমমরাধিপ
কালসৈন্যাবগাঢস্য সর্বং ন প্রতিভাতি মে
217.45
নাহং কর্তা ন চৈব ত্বং নান্যঃ কর্তা শচীপতে
পর্যায়েণ হি ভুজ্যন্তে লোকাঃ শক্র যদৃচ্ছয়া
217.46
মাসার্ধমাসবেশ্মানমহোরাত্রাভিসংবৃতম্
ঋতুদ্বারং বর্ষমুখমাহুর্বেদবিদো জনাঃ
217.47
আহুঃ সর্বমিদং চিন্ত্যং জনাঃ কেচিন্মনীষয়া
অস্যাঃ পঞ্চৈব চিন্তায়াঃ পর্যেষ্যামি চ পঞ্চধা
217.48
গম্ভীরং গহনং ব্রহ্ম মহত্তোয়ার্ণবং যথা
অনাদিনিধনং চাহুরক্ষরং পরমেব চ
217.49
সত্ত্বেষু লিঙ্গমাবেশ্য নলিঙ্গমপি তত্স্বয়ম্
মন্যন্তে ধ্রুবমেবৈনং যে নরাস্তত্ত্বদর্শিনঃ
217.50
ভূতানাং তু বিপর্যাসং মন্যতে গতবানিতি
ন হ্যেতাবদ্ভবেদ্গম্যং ন যস্মাত্প্রকৃতেঃ পরঃ
217.51
গতিং হি সর্বভূতানামগত্বা ক্ব গমিষ্যসি
যো ধাবতা ন হাতব্যস্তিষ্ঠন্নপি ন হীয়তে
তমিন্দ্রিয়াণি সর্বাণি নানুপশ্যন্তি পঞ্চধা
217.52
আহুশ্চৈনং কেচিদগ্নিং কেচিদাহুঃ প্রজাপতিম্
ঋতুমাসার্ধমাসাংশ্চ দিবসাংস্তু ক্ষণাংস্তথা
217.53
পূর্বাহ্ণমপরাহ্ণং চ মধ্যাহ্নমপি চাপরে
মুহূর্তমপি চৈবাহুরেকং সন্তমনেকধা
তং কালমবজানীহি যস্য সর্বমিদং বশে
217.54
বহূনীন্দ্রসহস্রাণি সমতীতানি বাসব
বলবীর্যোপপন্নানি যথৈব ত্বং শচীপতে
217.55
ত্বামপ্যতিবলং শক্রং দেবরাজং বলোত্কটম্
প্রাপ্তে কালে মহাবীর্যঃ কালঃ সংশময়িষ্যতি
217.56
য ইদং সর্বমাদত্তে তস্মাচ্ছক্র স্থিরো ভব
ময়া ত্বয়া চ পূর্বৈশ্চ ন স শক্যোঽতিবর্তিতুম্
217.57
যামেতাং প্রাপ্য জানীষে রাজশ্রিয়মনুত্তমাম্
স্থিতা ময়ীতি তন্মিথ্যা নৈষা হ্যেকত্র তিষ্ঠতি
217.58
স্থিতা হীন্দ্রসহস্রেষু ত্বদ্বিশিষ্টতমেষ্বিয়ম্
মাং চ লোলা পরিত্যজ্য ত্বামগাদ্বিবুধাধিপ
217.59
মৈবং শক্র পুনঃ কার্ষীঃ শান্তো ভবিতুমর্হসি
ত্বামপ্যেবংগতং ত্যক্ত্বা ক্ষিপ্রমন্যং গমিষ্যতি