Utshovঅধ্যায় 218
218.1
ভীষ্ম উবাচ
শতক্রতুরথাপশ্যদ্বলের্দীপ্তাং মহাত্মনঃ
স্বরূপিণীং শরীরাদ্ধি তদা নিষ্ক্রামতীং শ্রিয়ম্
218.2
তাং দীপ্তাং প্রভয়া দৃষ্ট্বা ভগবান্পাকশাসনঃ
বিস্ময়োত্ফুল্লনয়নো বলিং পপ্রচ্ছ বাসবঃ
218.3
বলে কেয়মপক্রান্তা রোচমানা শিখণ্ডিনী
ত্বত্তঃ স্থিতা সকেয়ূরা দীপ্যমানা স্বতেজসা
218.4
বলিরুবাচ
ন হীমামাসুরীং বেদ্মি ন দৈবীং ন চ মানুষীম্
ত্বমেবৈনাং পৃচ্ছ মা বা যথেষ্টং কুরু বাসব
218.5
শক্র উবাচ
কা ত্বং বলেরপক্রান্তা রোচমানা শিখণ্ডিনী
অজানতো মমাচক্ষ্ব নামধেয়ং শুচিস্মিতে
218.6
কা ত্বং তিষ্ঠসি মায়েব দীপ্যমানা স্বতেজসা
হিত্বা দৈত্যেশ্বরং সুভ্রু তন্মমাচক্ষ্ব তত্ত্বতঃ
218.7
শ্রীরুবাচ
ন মা বিরোচনো বেদ ন মা বৈরোচনো বলিঃ
আহুর্মাং দুঃসহেত্যেবং বিধিত্সেতি চ মাং বিদুঃ
218.8
ভূতির্লক্ষ্মীতি মামাহুঃ শ্রীরিত্যেবং চ বাসব
ত্বং মাং শক্র ন জানীষে সর্বে দেবা ন মাং বিদুঃ
218.9
শক্র উবাচ
কিমিদং ত্বং মম কৃতে উতাহো বলিনঃ কৃতে
দুঃসহে বিজহাস্যেনং চিরসংবাসিনী সতী
218.10
শ্রীরুবাচ
ন ধাতা ন বিধাতা মাং বিদধাতি কথংচন
কালস্তু শক্র পর্যায়ান্মৈনং শক্রাবমন্যথাঃ
218.11
শক্র উবাচ
কথং ত্বয়া বলিস্ত্যক্তঃ কিমর্থং বা শিখণ্ডিনি
কথং চ মাং ন জহ্যাস্ত্বং তন্মে ব্রূহি শুচিস্মিতে
218.12
শ্রীরুবাচ
সত্যে স্থিতাস্মি দানে চ ব্রতে তপসি চৈব হি
পরাক্রমে চ ধর্মে চ পরাচীনস্ততো বলিঃ
218.13
ব্রহ্মণ্যোঽয়ং সদা ভূত্বা সত্যবাদী জিতেন্দ্রিয়ঃ
অভ্যসূয়দ্ব্রাহ্মণান্বৈ উচ্ছিষ্টশ্চাস্পৃশদ্ঘৃতম্
218.14
যজ্ঞশীলঃ পুরা ভূত্বা মামেব যজতেত্যয়ম্
প্রোবাচ লোকান্মূঢাত্মা কালেনোপনিপীডিতঃ
218.15
অপাকৃতা ততঃ শক্র ত্বয়ি বত্স্যামি বাসব
অপ্রমত্তেন ধার্যাস্মি তপসা বিক্রমেণ চ
218.16
শক্র উবাচ
অস্তি দেবমনুষ্যেষু সর্বভূতেষু বা পুমান্
যস্ত্বামেকো বিষহিতুং শক্নুয়াত্কমলালয়ে
218.17
শ্রীরুবাচ
নৈব দেবো ন গন্ধর্বো নাসুরো ন চ রাক্ষসঃ
যো মামেকো বিষহিতুং শক্তঃ কশ্চিত্পুরংদর
218.18
শক্র উবাচ
তিষ্ঠেথা ময়ি নিত্যং ত্বং যথা তদ্ব্রূহি মে শুভে
তত্করিষ্যামি তে বাক্যমৃতং ত্বং বক্তুমর্হসি
218.19
শ্রীরুবাচ
স্থাস্যামি নিত্যং দেবেন্দ্র যথা ত্বয়ি নিবোধ তৎ
বিধিনা বেদদৃষ্টেন চতুর্ধা বিভজস্ব মাম্
218.20
শক্র উবাচ
অহং বৈ ত্বা নিধাস্যামি যথাশক্তি যথাবলম্
ন তু মেঽতিক্রমঃ স্যাদ্বৈ সদা লক্ষ্মি তবান্তিকে
218.21
ভূমিরেব মনুষ্যেষু ধারণী ভূতভাবিনী
সা তে পাদং তিতিক্ষেত সমর্থা হীতি মে মতিঃ
218.22
শ্রীরুবাচ
এষ মে নিহিতঃ পাদো যোঽয়ং ভূমৌ প্রতিষ্ঠিতঃ
দ্বিতীয়ং শক্র পাদং মে তস্মাত্সুনিহিতং কুরু
218.23
শক্র উবাচ
আপ এব মনুষ্যেষু দ্রবন্ত্যঃ পরিচারিকাঃ
তাস্তে পাদং তিতিক্ষন্তামলমাপস্তিতিক্ষিতুম্
218.24
শ্রীরুবাচ
এষ মে নিহিতঃ পাদো যোঽয়মপ্সু প্রতিষ্ঠিতঃ
তৃতীয়ং শক্র পাদং মে তস্মাত্সুনিহিতং কুরু
218.25
শক্র উবাচ
যস্মিন্দেবাশ্চ যজ্ঞাশ্চ যস্মিন্বেদাঃ প্রতিষ্ঠিতাঃ
তৃতীয়ং পাদমগ্নিস্তে সুধৃতং ধারয়িষ্যতি
218.26
শ্রীরুবাচ
এষ মে নিহিতঃ পাদো যোঽয়মগ্নৌ প্রতিষ্ঠিতঃ
চতুর্থং শক্র পাদং মে তস্মাত্সুনিহিতং কুরু
218.27
শক্র উবাচ
যে বৈ সন্তো মনুষ্যেষু ব্রহ্মণ্যাঃ সত্যবাদিনঃ
তে তে পাদং তিতিক্ষন্তামলং সন্তস্তিতিক্ষিতুম্
218.28
শ্রীরুবাচ
এষ মে নিহিতঃ পাদো যোঽয়ং সত্সু প্রতিষ্ঠিতঃ
এবং বিনিহিতাং শক্র ভূতেষু পরিধত্স্ব মাম্
218.29
শক্র উবাচ
ভূতানামিহ বৈ যস্ত্বা ময়া বিনিহিতাং সতীম্
উপহন্যাত্স মে দ্বিষ্যাত্তথা শৃণ্বন্তু মে বচঃ
218.30
ভীষ্ম উবাচ
ততস্ত্যক্তঃ শ্রিয়া রাজা দৈত্যানাং বলিরব্রবীৎ
যাবত্পুরস্তাত্প্রতপেত্তাবদ্বৈ দক্ষিণাং দিশম্
218.31
পশ্চিমাং তাবদেবাপি তথোদীচীং দিবাকরঃ
তথা মধ্যংদিনে সূর্যো অস্তমেতি যদা তদা
পুনর্দেবাসুরং যুদ্ধং ভাবি জেতাস্মি বস্তদা
218.32
সর্বাঁল্লোকান্যদাদিত্য একস্থস্তাপয়িষ্যতি
তদা দেবাসুরে যুদ্ধে জেতাহং ত্বাং শতক্রতো
218.33
শক্র উবাচ
ব্রহ্মণাস্মি সমাদিষ্টো ন হন্তব্যো ভবানিতি
তেন তেঽহং বলে বজ্রং ন বিমুঞ্চামি মূর্ধনি
218.34
যথেষ্টং গচ্ছ দৈত্যেন্দ্র স্বস্তি তেঽস্তু মহাসুর
আদিত্যো নাবতপিতা কদাচিন্মধ্যতঃ স্থিতঃ
218.35
স্থাপিতো হ্যস্য সময়ঃ পূর্বমেব স্বয়ংভুবা
অজস্রং পরিয়াত্যেষ সত্যেনাবতপন্প্রজাঃ
218.36
অয়নং তস্য ষণ্মাসা উত্তরং দক্ষিণং তথা
যেন সংয়াতি লোকেষু শীতোষ্ণে বিসৃজন্রবিঃ
218.37
ভীষ্ম উবাচ
এবমুক্তস্তু দৈত্যেন্দ্রো বলিরিন্দ্রেণ ভারত
জগাম দক্ষিণামাশামুদীচীং তু পুরংদরঃ
218.38
ইত্যেতদ্বলিনা গীতমনহংকারসংজ্ঞিতম্
বাক্যং শ্রুত্বা সহস্রাক্ষঃ খমেবারুরুহে তদা