অধ্যায় 219

219.1

ভীষ্ম উবাচ
অত্রৈবোদাহরন্তীমমিতিহাসং পুরাতনম্
শতক্রতোশ্চ সংবাদং নমুচেশ্চ যুধিষ্ঠির

শ্রিয়া বিহীনমাসীনমক্ষোভ্যমিব সাগরম্
ভবাভবজ্ঞং ভূতানামিত্যুবাচ পুরংদরঃ

বদ্ধঃ পাশৈশ্চ্যুতঃ স্থানাদ্দ্বিষতাং বশমাগতঃ
শ্রিয়া বিহীনো নমুচে শোচস্যাহো ন শোচসি

নমুচিরুবাচ
অনবাপ্যং চ শোকেন শরীরং চোপতপ্যতে
অমিত্রাশ্চ প্রহৃষ্যন্তি নাস্তি শোকে সহায়তা

তস্মাচ্ছক্র ন শোচামি সর্বং হ্যেবেদমন্তবৎ
সংতাপাদ্ভ্রশ্যতে রূপং ধর্মশ্চৈব সুরেশ্বর

বিনীয় খলু তদ্দুঃখমাগতং বৈমনস্যজম্
ধ্যাতব্যং মনসা হৃদ্যং কল্যাণং সংবিজানতা

যথা যথা হি পুরুষঃ কল্যাণে কুরুতে মনঃ
তদৈবাস্য প্রসীদন্তি সর্বার্থা নাত্র সংশয়ঃ

একঃ শাস্তা ন দ্বিতীয়োঽস্তি শাস্তা; গর্ভে শয়ানং পুরুষং শাস্তি শাস্তা
তেনানুশিষ্টঃ প্রবণাদিবোদকং; যথা নিয়ুক্তোঽস্মি তথা বহামি

ভাবাভাবাবভিজানন্গরীয়ো; জানামি শ্রেয়ো ন তু তত্করোমি
আশাঃ সুশর্ম্যাঃ সুহৃদাং সুকুর্ব;ন্যথা নিয়ুক্তোঽস্মি তথা বহামি

যথা যথাস্য প্রাপ্তব্যং প্রাপ্নোত্যেব তথা তথা
ভবিতব্যং যথা যচ্চ ভবত্যেব তথা তথা

যত্র যত্রৈব সংয়ুঙ্ক্তে ধাতা গর্ভং পুনঃ পুনঃ
তত্র তত্রৈব বসতি ন যত্র স্বয়মিচ্ছতি

ভাবো যোঽয়মনুপ্রাপ্তো ভবিতব্যমিদং মম
ইতি যস্য সদা ভাবো ন স মুহ্যেত্কদাচন

পর্যায়ৈর্হন্যমানানামভিয়োক্তা ন বিদ্যতে
দুঃখমেতত্তু যদ্দ্বেষ্টা কর্তাহমিতি মন্যতে

ঋষীংশ্চ দেবাংশ্চ মহাসুরাংশ্চ; ত্রৈবিদ্যবৃদ্ধাংশ্চ বনে মুনীংশ্চ
কান্নাপদো নোপনমন্তি লোকে; পরাবরজ্ঞাস্তু ন সংভ্রমন্তি

ন পণ্ডিতঃ ক্রুধ্যতি নাপি সজ্জতে; ন চাপি সংসীদতি ন প্রহৃষ্যতি
ন চার্থকৃচ্ছ্রব্যসনেষু শোচতি; স্থিতঃ প্রকৃত্যা হিমবানিবাচলঃ

যমর্থসিদ্ধিঃ পরমা ন হর্ষয়ে;ত্তথৈব কালে ব্যসনং ন মোহয়েৎ
সুখং চ দুঃখং চ তথৈব মধ্যমং; নিষেবতে যঃ স ধুরংধরো নরঃ

যাং যামবস্থাং পুরুষোঽধিগচ্ছে;ত্তস্যাং রমেতাপরিতপ্যমানঃ
এবং প্রবৃদ্ধং প্রণুদেন্মনোজং; সংতাপমায়াসকরং শরীরাৎ

তত্সদঃ স পরিষত্সভাসদঃ; প্রাপ্য যো ন কুরুতে সভাভয়ম্
ধর্মতত্ত্বমবগাহ্য বুদ্ধিমা;ন্যোঽভ্যুপৈতি স পুমান্ধুরংধরঃ

প্রাজ্ঞস্য কর্মাণি দুরন্বয়ানি; ন বৈ প্রাজ্ঞো মুহ্যতি মোহকালে
স্থানাচ্চ্যুতশ্চেন্ন মুমোহ গৌতম;স্তাবত্কৃচ্ছ্রামাপদং প্রাপ্য বৃদ্ধঃ

ন মন্ত্রবলবীর্যেণ প্রজ্ঞয়া পৌরুষেণ বা
অলভ্যং লভতে মর্ত্যস্তত্র কা পরিদেবনা

যদেবমনুজাতস্য ধাতারো বিদধুঃ পুরা
তদেবানুভবিষ্যামি কিং মে মৃত্যুঃ করিষ্যতি

লব্ধব্যান্যেব লভতে গন্তব্যান্যেব গচ্ছতি
প্রাপ্তব্যান্যেব প্রাপ্নোতি দুঃখানি চ সুখানি চ

এতদ্বিদিত্বা কার্ত্স্ন্যেন যো ন মুহ্যতি মানবঃ
কুশলঃ সুখদুঃখেষু স বৈ সর্বধনেশ্বরঃ