Utshovঅধ্যায় 220
220.1
যুধিষ্ঠির উবাচ
মগ্নস্য ব্যসনে কৃচ্ছ্রে কিং শ্রেয়ঃ পুরুষস্য হি
বন্ধুনাশে মহীপাল রাজ্যনাশেঽপি বা পুনঃ
220.2
ত্বং হি নঃ পরমো বক্তা লোকেঽস্মিন্ভরতর্ষভ
এতদ্ভবন্তং পৃচ্ছামি তন্মে বক্তুমিহার্হসি
220.3
ভীষ্ম উবাচ
পুত্রদারৈঃ সুখৈশ্চৈব বিয়ুক্তস্য ধনেন চ
মগ্নস্য ব্যসনে কৃচ্ছ্রে ধৃতিঃ শ্রেয়স্করী নৃপ
220.4
ধৈর্যেণ যুক্তস্য সতঃ শরীরং ন বিশীর্যতে
আরোগ্যাচ্চ শরীরস্য স পুনর্বিন্দতে শ্রিয়ম্
220.5
যস্য রাজ্ঞো নরাস্তাত সাত্ত্বিকীং বৃত্তিমাস্থিতাঃ
তস্য স্থৈর্যং চ ধৈর্যং চ ব্যবসায়শ্চ কর্মসু
220.6
অত্রৈবোদাহরন্তীমমিতিহাসং পুরাতনম্
বলিবাসবসংবাদং পুনরেব যুধিষ্ঠির
220.7
বৃত্তে দেবাসুরে যুদ্ধে দৈত্যদানবসংক্ষয়ে
বিষ্ণুক্রান্তেষু লোকেষু দেবরাজে শতক্রতৌ
220.8
ইজ্যমানেষু দেবেষু চাতুর্বর্ণ্যে ব্যবস্থিতে
সমৃধ্যমানে ত্রৈলোক্যে প্রীতিয়ুক্তে স্বয়ংভুবি
220.9
রুদ্রৈর্বসুভিরাদিত্যৈরশ্বিভ্যামপি চর্ষিভিঃ
গন্ধর্বৈর্ভুজগেন্দ্রৈশ্চ সিদ্ধৈশ্চান্যৈর্বৃতঃ প্রভুঃ
220.10
চতুর্দন্তং সুদান্তং চ বারণেন্দ্রং শ্রিয়া বৃতম্
আরুহ্যৈরাবতং শক্রস্ত্রৈলোক্যমনুসংয়য়ৌ
220.11
স কদাচিত্সমুদ্রান্তে কস্মিংশ্চিদ্গিরিগহ্বরে
বলিং বৈরোচনিং বজ্রী দদর্শোপসসর্প চ
220.12
তমৈরাবতমূর্ধস্থং প্রেক্ষ্য দেবগণৈর্বৃতম্
সুরেন্দ্রমিন্দ্রং দৈত্যেন্দ্রো ন শুশোচ ন বিব্যথে
220.13
দৃষ্ট্বা তমবিকারস্থং তিষ্ঠন্তং নির্ভয়ং বলিম্
অধিরূঢো দ্বিপশ্রেষ্ঠমিত্যুবাচ শতক্রতুঃ
220.14
দৈত্য ন ব্যথসে শৌর্যাদথ বা বৃদ্ধসেবয়া
তপসা ভাবিতত্বাদ্বা সর্বথৈতত্সুদুষ্করম্
220.15
শত্রুভির্বশমানীতো হীনঃ স্থানাদনুত্তমাৎ
বৈরোচনে কিমাশ্রিত্য শোচিতব্যে ন শোচসি
220.16
শ্রৈষ্ঠ্যং প্রাপ্য স্বজাতীনাং ভুক্ত্বা ভোগাননুত্তমান্
হৃতস্ববলরাজ্যস্ত্বং ব্রূহি কস্মান্ন শোচসি
220.17
ঈশ্বরো হি পুরা ভূত্বা পিতৃপৈতামহে পদে
তত্ত্বমদ্য হৃতং দৃষ্ট্বা সপত্নৈঃ কিং ন শোচসি
220.18
বদ্ধশ্চ বারুণৈঃ পাশৈর্বজ্রেণ চ সমাহতঃ
হৃতদারো হৃতধনো ব্রূহি কস্মান্ন শোচসি
220.19
ভ্রষ্টশ্রীর্বিভবভ্রষ্টো যন্ন শোচসি দুষ্করম্
ত্রৈলোক্যরাজ্যনাশে হি কোঽন্যো জীবিতুমুত্সহেৎ
220.20
এতচ্চান্যচ্চ পরুষং ব্রুবন্তং পরিভূয় তম্
শ্রুত্বা সুখমসংভ্রান্তো বলির্বৈরোচনোঽব্রবীৎ
220.21
নিগৃহীতে ময়ি ভৃশং শক্র কিং কত্থিতেন তে
বজ্রমুদ্যম্য তিষ্ঠন্তং পশ্যামি ত্বাং পুরংদর
220.22
অশক্তঃ পূর্বমাসীস্ত্বং কথংচিচ্ছক্ততাং গতঃ
কস্ত্বদন্য ইমা বাচঃ সুক্রূরা বক্তুমর্হতি
220.23
যস্তু শত্রোর্বশস্থস্য শক্তোঽপি কুরুতে দয়াম্
হস্তপ্রাপ্তস্য বীরস্য তং চৈব পুরুষং বিদুঃ
220.24
অনিশ্চয়ো হি যুদ্ধেষু দ্বয়োর্বিবদমানয়োঃ
একঃ প্রাপ্নোতি বিজয়মেকশ্চৈব পরাভবম্
220.25
মা চ তে ভূত্স্বভাবোঽয়ং ময়া দৈবতপুংগব
ঈশ্বরঃ সর্বভূতানাং বিক্রমেণ জিতো বলাৎ
220.26
নৈতদস্মত্কৃতং শক্র নৈতচ্ছক্র ত্বয়া কৃতম্
যত্ত্বমেবংগতো বজ্রিন্যদ্বাপ্যেবংগতা বয়ম্
220.27
অহমাসং যথাদ্য ত্বং ভবিতা ত্বং যথা বয়ম্
মাবমংস্থা ময়া কর্ম দুষ্কৃতং কৃতমিত্যুত
220.28
সুখদুঃখে হি পুরুষঃ পর্যায়েণাধিগচ্ছতি
পর্যায়েণাসি শক্রত্বং প্রাপ্তঃ শক্র ন কর্মণা
220.29
কালঃ কালে নয়তি মাং ত্বাং চ কালো নয়ত্যয়ম্
তেনাহং ত্বং যথা নাদ্য ত্বং চাপি ন যথা বয়ম্
220.30
ন মাতৃপিতৃশুশ্রূষা ন চ দৈবতপূজনম্
নান্যো গুণসমাচারঃ পুরুষস্য সুখাবহঃ
220.31
ন বিদ্যা ন তপো দানং ন মিত্রাণি ন বান্ধবাঃ
শক্নুবন্তি পরিত্রাতুং নরং কালেন পীডিতম্
220.32
নাগামিনমনর্থং হি প্রতিঘাতশতৈরপি
শক্নুবন্তি প্রতিব্যোঢুমৃতে বুদ্ধিবলান্নরাঃ
220.33
পর্যায়ৈর্হন্যমানানাং পরিত্রাতা ন বিদ্যতে
ইদং তু দুঃখং যচ্ছক্র কর্তাহমিতি মন্যতে
220.34
যদি কর্তা ভবেত্কর্তা ন ক্রিয়েত কদাচন
যস্মাত্তু ক্রিয়তে কর্তা তস্মাত্কর্তাপ্যনীশ্বরঃ
220.35
কালেন ত্বাহমজয়ং কালেনাহং জিতস্ত্বয়া
গন্তা গতিমতাং কালঃ কালঃ কলয়তি প্রজাঃ
220.36
ইন্দ্র প্রাকৃতয়া বুদ্ধ্যা প্রলপন্নাববুধ্যসে
কেচিত্ত্বাং বহু মন্যন্তে শ্রৈষ্ঠ্যং প্রাপ্তং স্বকর্মণা
220.37
কথমস্মদ্বিধো নাম জানঁল্লোকপ্রবৃত্তয়ঃ
কালেনাভ্যাহতঃ শোচেন্মুহ্যেদ্বাপ্যর্থসংভ্রমে
220.38
নিত্যং কালপরীতস্য মম বা মদ্বিধস্য বা
বুদ্ধির্ব্যসনমাসাদ্য ভিন্না নৌরিব সীদতি
220.39
অহং চ ত্বং চ যে চান্যে ভবিষ্যন্তি সুরাধিপাঃ
তে সর্বে শক্র যাস্যন্তি মার্গমিন্দ্রশতৈর্গতম্
220.40
ত্বামপ্যেবং সুদুর্ধর্ষং জ্বলন্তং পরয়া শ্রিয়া
কালে পরিণতে কালঃ কালয়িষ্যতি মামিব
220.41
বহূনীন্দ্রসহস্রাণি দৈতেয়ানাং যুগে যুগে
অভ্যতীতানি কালেন কালো হি দুরতিক্রমঃ
220.42
ইদং তু লব্ধ্বা ত্বং স্থানমাত্মানং বহু মন্যসে
সর্বভূতভবং দেবং ব্রহ্মাণমিব শাশ্বতম্
220.43
ন চেদমচলং স্থানমনন্তং বাপি কস্যচিৎ
ত্বং তু বালিশয়া বুদ্ধ্যা মমেদমিতি মন্যসে
220.44
অবিশ্বাস্যে বিশ্বসিষি মন্যসে চাধ্রুবং ধ্রুবম্
মমেয়মিতি মোহাত্ত্বং রাজশ্রিয়মভীপ্সসি
220.45
নেয়ং তব ন চাস্মাকং ন চান্যেষাং স্থিরা মতা
অতিক্রম্য বহূনন্যাংস্ত্বয়ি তাবদিয়ং স্থিতা
220.46
কংচিত্কালমিয়ং স্থিত্বা ত্বয়ি বাসব চঞ্চলা
গৌর্নিপানমিবোত্সৃজ্য পুনরন্যং গমিষ্যতি
220.47
রাজলোকা হ্যতিক্রান্তা যান্ন সংখ্যাতুমুত্সহে
ত্বত্তো বহুতরাশ্চান্যে ভবিষ্যন্তি পুরংদর
220.48
সবৃক্ষৌষধিরত্নেয়ং সসরিত্পর্বতাকরা
তানিদানীং ন পশ্যামি যৈর্ভুক্তেয়ং পুরা মহী
220.49
পৃথুরৈলো ময়ো ভৌমো নরকঃ শম্বরস্তথা
অশ্বগ্রীবঃ পুলোমা চ স্বর্ভানুরমিতধ্বজঃ
220.50
প্রহ্রাদো নমুচির্দক্ষো বিপ্রচিত্তির্বিরোচনঃ
হ্রীনিষেধঃ সুহোত্রশ্চ ভূরিহা পুষ্পবান্বৃষঃ
220.51
সত্যেষুরৃষভো রাহুঃ কপিলাশ্বো বিরূপকঃ
বাণঃ কার্তস্বরো বহ্নির্বিশ্বদংষ্ট্রোঽথ নৈরৃতঃ
220.52
রিত্থাহুত্থৌ বীরতাম্রৌ বরাহাশ্বো রুচিঃ প্রভুঃ
বিশ্বজিত্প্রতিশৌরিশ্চ বৃষাণ্ডো বিষ্করো মধুঃ
220.53
হিরণ্যকশিপুশ্চৈব কৈটভশ্চৈব দানবঃ
দৈত্যাশ্চ কালখঞ্জাশ্চ সর্বে তে নৈরৃতৈঃ সহ
220.54
এতে চান্যে চ বহবঃ পূর্বে পূর্বতরাশ্চ যে
দৈত্যেন্দ্রা দানবেন্দ্রাশ্চ যাংশ্চান্যাননুশুশ্রুম
220.55
বহবঃ পূর্বদৈত্যেন্দ্রাঃ সংত্যজ্য পৃথিবীং গতাঃ
কালেনাভ্যাহতাঃ সর্বে কালো হি বলবত্তরঃ
220.56
সর্বৈঃ ক্রতুশতৈরিষ্টং ন ত্বমেকঃ শতক্রতুঃ
সর্বে ধর্মপরাশ্চাসন্সর্বে সততসত্রিণঃ
220.57
অন্তরিক্ষচরাঃ সর্বে সর্বেঽভিমুখয়োধিনঃ
সর্বে সংহননোপেতাঃ সর্বে পরিঘবাহবঃ
220.58
সর্বে মায়াশতধরাঃ সর্বে তে কামচারিণঃ
সর্বে সমরমাসাদ্য ন শ্রূয়ন্তে পরাজিতাঃ
220.59
সর্বে সত্যব্রতপরাঃ সর্বে কামবিহারিণঃ
সর্বে বেদব্রতপরাঃ সর্বে চাসন্বহুশ্রুতাঃ
220.60
সর্বে সংহতমৈশ্বর্যমীশ্বরাঃ প্রতিপেদিরে
ন চৈশ্বর্যমদস্তেষাং ভূতপূর্বো মহাত্মনাম্
220.61
সর্বে যথার্থদাতারঃ সর্বে বিগতমত্সরাঃ
সর্বে সর্বেষু ভূতেষু যথাবত্প্রতিপেদিরে
220.62
সর্বে দাক্ষায়ণীপুত্রাঃ প্রাজাপত্যা মহাবলাঃ
জ্বলন্তঃ প্রতপন্তশ্চ কালেন প্রতিসংহৃতাঃ
220.63
ত্বং চৈবেমাং যদা ভুক্ত্বা পৃথিবীং ত্যক্ষ্যসে পুনঃ
ন শক্ষ্যসি তদা শক্র নিয়ন্তুং শোকমাত্মনঃ
220.64
মুঞ্চেচ্ছাং কামভোগেষু মুঞ্চেমং শ্রীভবং মদম্
এবং স্বরাজ্যনাশে ত্বং শোকং সংপ্রসহিষ্যসি
220.65
শোককালে শুচো মা ত্বং হর্ষকালে চ মা হৃষঃ
অতীতানাগতে হিত্বা প্রত্যুত্পন্নেন বর্তয়
220.66
মাং চেদভ্যাগতঃ কালঃ সদায়ুক্তমতন্দ্রিতম্
ক্ষমস্ব নচিরাদিন্দ্র ত্বামপ্যুপগমিষ্যতি
220.67
ত্রাসয়ন্নিব দেবেন্দ্র বাগ্ভিস্তক্ষসি মামিহ
সংয়তে ময়ি নূনং ত্বমাত্মানং বহু মন্যসে
220.68
কালঃ প্রথমমায়ান্মাং পশ্চাত্ত্বামনুধাবতি
তেন গর্জসি দেবেন্দ্র পূর্বং কালহতে ময়ি
220.69
কো হি স্থাতুমলং লোকে ক্রুদ্ধস্য মম সংয়ুগে
কালস্তু বলবান্প্রাপ্তস্তেন তিষ্ঠসি বাসব
220.70
যত্তদ্বর্ষসহস্রান্তং পূর্ণং ভবিতুমর্হতি
যথা মে সর্বগাত্রাণি নস্বস্থানি হতৌজসঃ
220.71
অহমৈন্দ্রচ্চ্যুতঃ স্থানাত্ত্বমিন্দ্রঃ প্রকৃতো দিবি
সুচিত্রে জীবলোকেঽস্মিন্নুপাস্যঃ কালপর্যয়াৎ
220.72
কিং হি কৃত্বা ত্বমিন্দ্রোঽদ্য কিং হি কৃত্বা চ্যুতা বয়ম্
কালঃ কর্তা বিকর্তা চ সর্বমন্যদকারণম্
220.73
নাশং বিনাশমৈশ্বর্যং সুখদুঃখে ভবাভবৌ
বিদ্বান্প্রাপ্যৈবমত্যর্থং ন প্রহৃষ্যেন্ন চ ব্যথেৎ
220.74
ত্বমেব হীন্দ্র বেত্থাস্মান্বেদাহং ত্বাং চ বাসব
বিকত্থসে মাং কিং বদ্ধং কালেন নিরপত্রপ
220.75
ত্বমেব হি পুরা বেত্থ যত্তদা পৌরুষং মম
সমরেষু চ বিক্রান্তং পর্যাপ্তং তন্নিদর্শনম্
220.76
আদিত্যাশ্চৈব রুদ্রাশ্চ সাধ্যাশ্চ বসুভিঃ সহ
ময়া বিনির্জিতাঃ সর্বে মরুতশ্চ শচীপতে
220.77
ত্বমেব শক্র জানাসি দেবাসুরসমাগমে
সমেতা বিবুধা ভগ্নাস্তরসা সমরে ময়া
220.78
পর্বতাশ্চাসকৃত্ক্ষিপ্তাঃ সবনাঃ সবনৌকসঃ
সটঙ্কশিখরা ঘোরাঃ সমরে মূর্ধ্নি তে ময়া
220.79
কিং নু শক্যং ময়া কর্তুং যত্কালো দুরতিক্রমঃ
ন হি ত্বাং নোত্সহে হন্তুং সবজ্রমপি মুষ্টিনা
220.80
ন তু বিক্রমকালোঽয়ং ক্ষমাকালোঽয়মাগতঃ
তেন ত্বা মর্ষয়ে শক্র দুর্মর্ষণতরস্ত্বয়া
220.81
ত্বং মা পরিণতে কালে পরীতং কালবহ্নিনা
নিয়তং কালপাশেন বদ্ধং শক্র বিকত্থসে
220.82
অয়ং স পুরুষঃ শ্যামো লোকস্য দুরতিক্রমঃ
বদ্ধ্বা তিষ্ঠতি মাং রৌদ্রঃ পশুং রশনয়া যথা
220.83
লাভালাভৌ সুখং দুঃখং কামক্রোধৌ ভবাভবৌ
বধো বন্ধঃ প্রমোক্ষশ্চ সর্বং কালেন লভ্যতে
220.84
নাহং কর্তা ন কর্তা ত্বং কর্তা যস্তু সদা প্রভুঃ
সোঽয়ং পচতি কালো মাং বৃক্ষে ফলমিবাগতম্
220.85
যান্যেব পুরুষঃ কুর্বন্সুখৈঃ কালেন যুজ্যতে
পুনস্তান্যেব কুর্বাণো দুঃখৈঃ কালেন যুজ্যতে
220.86
ন চ কালেন কালজ্ঞঃ স্পৃষ্টঃ শোচিতুমর্হতি
তেন শক্র ন শোচামি নাস্তি শোকে সহায়তা
220.87
যদা হি শোচতাং শোকো ব্যসনং নাপকর্ষতি
সামর্থ্যং শোচতো নাস্তি নাদ্য শোচাম্যহং ততঃ
220.88
এবমুক্তঃ সহস্রাক্ষো ভগবান্পাকশাসনঃ
প্রতিসংহৃত্য সংরম্ভমিত্যুবাচ শতক্রতুঃ
220.89
সবজ্রমুদ্যতং বাহুং দৃষ্ট্বা পাশাংশ্চ বারুণান্
কস্যেহ ন ব্যথেদ্বুদ্ধির্মৃত্যোরপি জিঘাংসতঃ
220.90
সা তে ন ব্যথতে বুদ্ধিরচলা তত্ত্বদর্শিনী
ব্রুবন্ন ব্যথসে স ত্বং বাক্যং সত্যপরাক্রম
220.91
কো হি বিশ্বাসমর্থেষু শরীরে বা শরীরভৃৎ
কর্তুমুত্সহতে লোকে দৃষ্ট্বা সংপ্রস্থিতং জগৎ
220.92
অহমপ্যেবমেবৈনং লোকং জানাম্যশাশ্বতম্
কালাগ্নাবাহিতং ঘোরে গুহ্যে সততগেঽক্ষরে
220.93
ন চাত্র পরিহারোঽস্তি কালস্পৃষ্টস্য কস্যচিৎ
সূক্ষ্মাণাং মহতাং চৈব ভূতানাং পরিপচ্যতাম্
220.94
অনীশস্যাপ্রমত্তস্য ভূতানি পচতঃ সদা
অনিবৃত্তস্য কালস্য ক্ষয়ং প্রাপ্তো ন মুচ্যতে
220.95
অপ্রমত্তঃ প্রমত্তেষু কালো জাগর্তি দেহিষু
প্রয়ত্নেনাপ্যতিক্রান্তো দৃষ্টপূর্বো ন কেনচিৎ
220.96
পুরাণঃ শাশ্বতো ধর্মঃ সর্বপ্রাণভৃতাং সমঃ
কালো ন পরিহার্যশ্চ ন চাস্যাস্তি ব্যতিক্রমঃ
220.97
অহোরাত্রাংশ্চ মাসাংশ্চ ক্ষণান্কাষ্ঠাঃ কলা লবান্
সংপিণ্ডয়তি নঃ কালো বৃদ্ধিং বার্ধুষিকো যথা
220.98
ইদমদ্য করিষ্যামি শ্বঃ কর্তাস্মীতি বাদিনম্
কালো হরতি সংপ্রাপ্তো নদীবেগ ইবোডুপম্
220.99
ইদানীং তাবদেবাসৌ ময়া দৃষ্টঃ কথং মৃতঃ
ইতি কালেন হ্রিয়তাং প্রলাপঃ শ্রূয়তে নৃণাম্
220.100
নশ্যন্ত্যর্থাস্তথা ভোগাঃ স্থানমৈশ্বর্যমেব চ
অনিত্যমধ্রুবং সর্বং ব্যবসায়ো হি দুষ্করঃ
উচ্ছ্রায়া বিনিপাতান্তা ভাবোঽভাবস্থ এব চ
220.101
সা তে ন ব্যথতে বুদ্ধিরচলা তত্ত্বদর্শিনী
অহমাসং পুরা চেতি মনসাপি ন বুধ্যসে
220.102
কালেনাক্রম্য লোকেঽস্মিন্পচ্যমানে বলীয়সা
অজ্যেষ্ঠমকনিষ্ঠং চ ক্ষিপ্যমাণো ন বুধ্যসে
220.103
ঈর্ষ্যাভিমানলোভেষু কামক্রোধভয়েষু চ
স্পৃহামোহাভিমানেষু লোকঃ সক্তো বিমুহ্যতি
220.104
ভবাংস্তু ভাবতত্ত্বজ্ঞো বিদ্বাঞ্জ্ঞানতপোন্বিতঃ
কালং পশ্যতি সুব্যক্তং পাণাবামলকং যথা
220.105
কালচারিত্রতত্ত্বজ্ঞঃ সর্বশাস্ত্রবিশারদঃ
বৈরোচনে কৃতাত্মাসি স্পৃহণীয়ো বিজানতাম্
220.106
সর্বলোকো হ্যয়ং মন্যে বুদ্ধ্যা পরিগতস্ত্বয়া
বিহরন্সর্বতোমুক্তো ন ক্বচিত্পরিষজ্জসে
220.107
রজশ্চ হি তমশ্চ ত্বা স্পৃশতো ন জিতেন্দ্রিয়ম্
নিষ্প্রীতিং নষ্টসংতাপং ত্বমাত্মানমুপাসসে
220.108
সুহৃদং সর্বভূতানাং নির্বৈরং শান্তমানসম্
দৃষ্ট্বা ত্বাং মম সংজাতা ত্বয্যনুক্রোশিনী মতিঃ
220.109
নাহমেতাদৃশং বুদ্ধং হন্তুমিচ্ছামি বন্ধনে
আনৃশংস্যং পরো ধর্মো অনুক্রোশস্তথা ত্বয়ি
220.110
মোক্ষ্যন্তে বারুণাঃ পাশাস্তবেমে কালপর্যয়াৎ
প্রজানামপচারেণ স্বস্তি তেঽস্তু মহাসুর
220.111
যদা শ্বশ্রূং স্নুষা বৃদ্ধাং পরিচারেণ যোক্ষ্যতে
পুত্রশ্চ পিতরং মোহাত্প্রেষয়িষ্যতি কর্মসু
220.112
ব্রাহ্মণৈঃ কারয়িষ্যন্তি বৃষলাঃ পাদধাবনম্
শূদ্রাশ্চ ব্রাহ্মণীং ভার্যামুপয়াস্যন্তি নির্ভয়াঃ
220.113
বিয়োনিষু চ বীজানি মোক্ষ্যন্তে পুরুষা যদা
সংকরং কাংস্যভাণ্ডৈশ্চ বলিং চাপি কুপাত্রকৈঃ
220.114
চাতুর্বর্ণ্যং যদা কৃত্স্নমুন্মর্যাদং ভবিষ্যতি
একৈকস্তে তদা পাশঃ ক্রমশঃ প্রতিমোক্ষ্যতে
220.115
অস্মত্তস্তে ভয়ং নাস্তি সময়ং প্রতিপালয়
সুখী ভব নিরাবাধঃ স্বস্থচেতা নিরাময়ঃ
220.116
তমেবমুক্ত্বা ভগবাঞ্শতক্রতুঃ; প্রতিপ্রয়াতো গজরাজবাহনঃ
বিজিত্য সর্বানসুরান্সুরাধিপো; ননন্দ হর্ষেণ বভূব চৈকরাট্
220.117
মহর্ষয়স্তুষ্টুবুরঞ্জসা চ তং; বৃষাকপিং সর্বচরাচরেশ্বরম্
হিমাপহো হব্যমুদাবহংস্ত্বরং;স্তথামৃতং চার্পিতমীশ্বরায় হ
220.118
দ্বিজোত্তমৈঃ সর্বগতৈরভিষ্টুতো; বিদীপ্ততেজা গতমন্যুরীশ্বরঃ
প্রশান্তচেতা মুদিতঃ স্বমালয়ং; ত্রিবিষ্টপং প্রাপ্য মুমোদ বাসবঃ