Utshovঅধ্যায় 221
221.1
যুধিষ্ঠির উবাচ
পূর্বরূপাণি মে রাজন্পুরুষস্য ভবিষ্যতঃ
পরাভবিষ্যতশ্চৈব ত্বং মে ব্রূহি পিতামহ
221.2
ভীষ্ম উবাচ
মন এব মনুষ্যস্য পূর্বরূপাণি শংসতি
ভবিষ্যতশ্চ ভদ্রং তে তথৈব নভবিষ্যতঃ
221.3
অত্রাপ্যুদাহরন্তীমমিতিহাসং পুরাতনম্
শ্রিয়া শক্রস্য সংবাদং তন্নিবোধ যুধিষ্ঠির
221.4
মহতস্তপসো ব্যুষ্ট্যা পশ্যঁল্লোকৌ পরাবরৌ
সামান্যমৃষিভির্গত্বা ব্রহ্মলোকনিবাসিভিঃ
221.5
ব্রহ্মৈবামিতদীপ্তৌজাঃ শান্তপাপ্মা মহাতপাঃ
বিচচার যথাকামং ত্রিষু লোকেষু নারদঃ
221.6
কদাচিত্প্রাতরুত্থায় পিস্পৃক্ষুঃ সলিলং শুচি
ধ্রুবদ্বারভবাং গঙ্গাং জগামাবততার চ
221.7
সহস্রনয়নশ্চাপি বজ্রী শম্বরপাকহা
তস্যা দেবর্ষিজুষ্টায়াস্তীরমভ্যাজগাম হ
221.8
তাবাপ্লুত্য যতাত্মানৌ কৃতজপ্যৌ সমাসতুঃ
নদ্যাঃ পুলিনমাসাদ্য সূক্ষ্মকাঞ্চনবালুকম্
221.9
পুণ্যকর্মভিরাখ্যাতা দেবর্ষিকথিতাঃ কথাঃ
চক্রতুস্তৌ কথাশীলৌ শুচিসংহৃষ্টমানসৌ
পূর্ববৃত্তব্যপেতানি কথয়ন্তৌ সমাহিতৌ
221.10
অথ ভাস্করমুদ্যন্তং রশ্মিজালপুরস্কৃতম্
পূর্ণমণ্ডলমালোক্য তাবুত্থায়োপতস্থতুঃ
221.11
অভিতস্তূদয়ন্তং তমর্কমর্কমিবাপরম্
আকাশে দদৃশে জ্যোতিরুদ্যতার্চিঃসমপ্রভম্
221.12
তয়োঃ সমীপং সংপ্রাপ্তং প্রত্যদৃশ্যত ভারত
তত্সুপর্ণার্কচরিতমাস্থিতং বৈষ্ণবং পদম্
ভাভিরপ্রতিমং ভাতি ত্রৈলোক্যমবভাসয়ৎ
221.13
দিব্যাভিরূপশোভাভিরপ্সরোভিঃ পুরস্কৃতাম্
বৃহতীমংশুমত্প্রখ্যাং বৃহদ্ভানোরিবার্চিষম্
221.14
নক্ষত্রকল্পাভরণাং তারাভক্তিসমস্রজম্
শ্রিয়ং দদৃশতুঃ পদ্মাং সাক্ষাত্পদ্মতলস্থিতাম্
221.15
সাবরুহ্য বিমানাগ্রাদঙ্গনানামনুত্তমা
অভ্যগচ্ছত্ত্রিলোকেশং শক্রং চর্ষিং চ নারদম্
221.16
নারদানুগতঃ সাক্ষান্মঘবাংস্তামুপাগমৎ
কৃতাঞ্জলিপুটো দেবীং নিবেদ্যাত্মানমাত্মনা
221.17
চক্রে চানুপমাং পূজাং তস্যাশ্চাপি স সর্ববিৎ
দেবরাজঃ শ্রিয়ং রাজন্বাক্যং চেদমুবাচ হ
221.18
কা ত্বং কেন চ কার্যেণ সংপ্রাপ্তা চারুহাসিনি
কুতশ্চাগম্যতে সুভ্রু গন্তব্যং ক্ব চ তে শুভে
221.19
শ্রীরুবাচ
পুণ্যেষু ত্রিষু লোকেষু সর্বে স্থাবরজঙ্গমাঃ
মমাত্মভাবমিচ্ছন্তো যতন্তে পরমাত্মনা
221.20
সাহং বৈ পঙ্কজে জাতা সূর্যরশ্মিবিবোধিতে
ভূত্যর্থং সর্বভূতানাং পদ্মা শ্রীঃ পদ্মমালিনী
221.21
অহং লক্ষ্মীরহং ভূতিঃ শ্রীশ্চাহং বলসূদন
অহং শ্রদ্ধা চ মেধা চ সন্নতির্বিজিতিঃ স্থিতিঃ
221.22
অহং ধৃতিরহং সিদ্ধিরহং ত্বিড্ভূতিরেব চ
অহং স্বাহা স্বধা চৈব সংস্তুতির্নিয়তিঃ কৃতিঃ
221.23
রাজ্ঞাং বিজয়মানানাং সেনাগ্রেষু ধ্বজেষু চ
নিবাসে ধর্মশীলানাং বিষয়েষু পুরেষু চ
221.24
জিতকাশিনি শূরে চ সংগ্রামেষ্বনিবর্তিনি
নিবসামি মনুষ্যেন্দ্রে সদৈব বলসূদন
221.25
ধর্মনিত্যে মহাবুদ্ধৌ ব্রহ্মণ্যে সত্যবাদিনি
প্রশ্রিতে দানশীলে চ সদৈব নিবসাম্যহম্
221.26
অসুরেষ্ববসং পূর্বং সত্যধর্মনিবন্ধনা
বিপরীতাংস্তু তান্বুদ্ধ্বা ত্বয়ি বাসমরোচয়ম্
221.27
শক্র উবাচ
কথংবৃত্তেষু দৈত্যেষু ত্বমবাত্সীর্বরাননে
দৃষ্ট্বা চ কিমিহাগাস্ত্বং হিত্বা দৈতেয়দানবান্
221.28
শ্রীরুবাচ
স্বধর্মমনুতিষ্ঠত্সু ধৈর্যাদচলিতেষু চ
স্বর্গমার্গাভিরামেষু সত্ত্বেষু নিরতা হ্যহম্
221.29
দানাধ্যয়নয়জ্ঞেজ্যা গুরুদৈবতপূজনম্
বিপ্রাণামতিথীনাং চ তেষাং নিত্যমবর্তত
221.30
সুসংমৃষ্টগৃহাশ্চাসঞ্জিতস্ত্রীকা হুতাগ্নয়ঃ
গুরুশুশ্রূষবো দান্তা ব্রহ্মণ্যাঃ সত্যবাদিনঃ
221.31
শ্রদ্দধানা জিতক্রোধা দানশীলানসূয়কাঃ
ভৃতপুত্রা ভৃতামাত্যা ভৃতদারা হ্যনীর্ষবঃ
221.32
অমর্ষণা ন চান্যোন্যং স্পৃহয়ন্তি কদাচন
ন চ জাতূপতপ্যন্তে ধীরাঃ পরসমৃদ্ধিভিঃ
221.33
দাতারঃ সংগৃহীতার আর্যাঃ করুণবেদিনঃ
মহাপ্রসাদা ঋজবো দৃঢভক্তা জিতেন্দ্রিয়াঃ
221.34
সংতুষ্টভৃত্যসচিবাঃ কৃতজ্ঞাঃ প্রিয়বাদিনঃ
যথার্থমানার্থকরা হ্রীনিষেধা যতব্রতাঃ
221.35
নিত্যং পর্বসু সুস্নাতাঃ স্বনুলিপ্তাঃ স্বলংকৃতাঃ
উপবাসতপঃশীলাঃ প্রতীতা ব্রহ্মবাদিনঃ
221.36
নৈনানভ্যুদিয়াত্সূর্যো ন চাপ্যাসন্প্রগেনিশাঃ
রাত্রৌ দধি চ সক্তূংশ্চ নিত্যমেব ব্যবর্জয়ন্
221.37
কাল্যং ঘৃতং চান্ববেক্ষন্প্রয়তা ব্রহ্মচারিণঃ
মঙ্গলানপি চাপশ্যন্ব্রাহ্মণাংশ্চাপ্যপূজয়ন্
221.38
সদা হি দদতাং ধর্মঃ সদা চাপ্রতিগৃহ্ণতাম্
অর্ধং চ রাত্র্যাঃ স্বপতাং দিবা চাস্বপতাং তথা
221.39
কৃপণানাথবৃদ্ধানাং দুর্বলাতুরয়োষিতাম্
দায়ং চ সংবিভাগং চ নিত্যমেবানুমোদতাম্
221.40
বিষণ্ণং ত্রস্তমুদ্বিগ্নং ভয়ার্তং ব্যাধিপীডিতম্
হৃতস্বং ব্যসনার্তং চ নিত্যমাশ্বাসয়ন্তি তে
221.41
ধর্মমেবান্ববর্তন্ত ন হিংসন্তি পরস্পরম্
অনুকূলাশ্চ কার্যেষু গুরুবৃদ্ধোপসেবিনঃ
221.42
পিতৃদেবাতিথীংশ্চৈব যথাবত্তেঽভ্যপূজয়ন্
অবশেষাণি চাশ্নন্তি নিত্যং সত্যতপোরতাঃ
221.43
নৈকেঽশ্নন্তি সুসংপন্নং ন গচ্ছন্তি পরস্ত্রিয়ম্
সর্বভূতেষ্ববর্তন্ত যথাত্মনি দয়াং প্রতি
221.44
নৈবাকাশে ন পশুষু নায়োনৌ ন চ পর্বসু
ইন্দ্রিয়স্য বিসর্গং তেঽরোচয়ন্ত কদাচন
221.45
নিত্যং দানং তথা দাক্ষ্যমার্জবং চৈব নিত্যদা
উত্সাহশ্চানহংকারঃ পরমং সৌহৃদং ক্ষমা
221.46
সত্যং দানং তপঃ শৌচং কারুণ্যং বাগনিষ্ঠুরা
মিত্রেষু চানভিদ্রোহঃ সর্বং তেষ্বভবত্প্রভো
221.47
নিদ্রা তন্দ্রীরসংপ্রীতিরসূয়া চানবেক্ষিতা
অরতিশ্চ বিষাদশ্চ ন স্পৃহা চাবিশন্ত তান্
221.48
সাহমেবংগুণেষ্বেব দানবেষ্ববসং পুরা
প্রজাসর্গমুপাদায় নৈকং যুগবিপর্যয়ম্
221.49
ততঃ কালবিপর্যাসে তেষাং গুণবিপর্যয়াৎ
অপশ্যং বিগতং ধর্মং কামক্রোধবশাত্মনাম্
221.50
সভাসদাং তে বৃদ্ধানাং সত্যাঃ কথয়তাং কথাঃ
প্রাহসন্নভ্যসূয়ংশ্চ সর্ববৃদ্ধান্গুণাবরাঃ
221.51
যূনঃ সহসমাসীনান্বৃদ্ধানভিগতান্সতঃ
নাভ্যুত্থানাভিবাদাভ্যাং যথাপূর্বমপূজয়ন্
221.52
বর্তয়ন্ত্যেব পিতরি পুত্রাঃ প্রভবতাঽঽত্মনঃ
অমিত্রভৃত্যতাং প্রাপ্য খ্যাপয়ন্তোঽনপত্রপাঃ
221.53
তথা ধর্মাদপেতেন কর্মণা গর্হিতেন যে
মহতঃ প্রাপ্নুবন্ত্যর্থাংস্তেষ্বেষামভবত্স্পৃহা
221.54
উচ্চৈশ্চাপ্যবদন্রাত্রৌ নীচৈস্তত্রাগ্নিরজ্বলৎ
পুত্রাঃ পিতৄনভ্যবদন্ভার্যাশ্চাভ্যবদন্পতীন্
221.55
মাতরং পিতরং বৃদ্ধমাচার্যমতিথিং গুরুম্
গুরুবন্নাভ্যনন্দন্ত কুমারান্নান্বপালয়ন্
221.56
ভিক্ষাং বলিমদত্ত্বা চ স্বয়মন্নানি ভুঞ্জতে
অনিষ্ট্বা সংবিভজ্যাথ পিতৃদেবাতিথীন্গুরূন্
221.57
ন শৌচমনুরুধ্যন্ত তেষাং সূদজনাস্তথা
মনসা কর্মণা বাচা ভক্তমাসীদনাবৃতম্
221.58
বিপ্রকীর্ণানি ধান্যানি কাকমূষকভোজনম্
অপাবৃতং পয়োঽতিষ্ঠদুচ্ছিষ্টাশ্চাস্পৃশন্ঘৃতম্
221.59
কুদ্দালপাটীপিটকং প্রকীর্ণং কাংস্যভাজনম্
দ্রব্যোপকরণং সর্বং নান্ববৈক্ষত্কুটুম্বিনী
221.60
প্রাকারাগারবিধ্বংসান্ন স্ম তে প্রতিকুর্বতে
নাদ্রিয়ন্তে পশূন্বদ্ধ্বা যবসেনোদকেন চ
221.61
বালানাং প্রেক্ষমাণানাং স্বয়ং ভক্ষানভক্ষয়ন্
তথা ভৃত্যজনং সর্বং পর্যশ্নন্তি চ দানবাঃ
221.62
পায়সং কৃসরং মাংসমপূপানথ শষ্কুলীঃ
অপাচয়ন্নাত্মনোঽর্থে বৃথামাংসান্যভক্ষয়ন্
221.63
উত্সূর্যশায়িনশ্চাসন্সর্বে চাসন্প্রগেনিশাঃ
অবর্তন্কলহাশ্চাত্র দিবারাত্রং গৃহে গৃহে
221.64
অনার্যাশ্চার্যমাসীনং পর্যুপাসন্ন তত্র হ
আশ্রমস্থান্বিকর্মস্থাঃ প্রদ্বিষন্তি পরস্পরম্
সংকরাশ্চাপ্যবর্তন্ত ন চ শৌচমবর্তত
221.65
যে চ বেদবিদো বিপ্রা বিস্পষ্টমনৃচশ্চ যে
নিরন্তরবিশেষাস্তে বহুমানাবমানয়োঃ
221.66
হাবমাভরণং বেষং গতিং স্থিতিমবেক্ষিতুম্
অসেবন্ত ভুজিষ্যা বৈ দুর্জনাচরিতং বিধিম্
221.67
স্ত্রিয়ঃ পুরুষবেষেণ পুংসঃ স্ত্রীবেষধারিণঃ
ক্রীডারতিবিহারেষু পরাং মুদমবাপ্নুবন্
221.68
প্রভবদ্ভিঃ পুরা দায়ানর্হেভ্যঃ প্রতিপাদিতান্
নাভ্যবর্তন্ত নাস্তিক্যাদ্বর্তন্তঃ সংভবেষ্বপি
221.69
মিত্রেণাভ্যর্থিতং মিত্রমর্থে সংশয়িতে ক্বচিৎ
বালকোট্যগ্রমাত্রেণ স্বার্থেনাঘ্নত তদ্বসু
221.70
পরস্বাদানরুচয়ো বিপণ্যব্যবহারিণঃ
অদৃশ্যন্তার্যবর্ণেষু শূদ্রাশ্চাপি তপোধনাঃ
221.71
অধীয়ন্তেঽব্রতাঃ কেচিদ্বৃথাব্রতমথাপরে
অশুশ্রূষুর্গুরোঃ শিষ্যঃ কশ্চিচ্ছিষ্যসখো গুরুঃ
221.72
পিতা চৈব জনিত্রী চ শ্রান্তৌ বৃত্তোত্সবাবিব
অপ্রভুত্বে স্থিতৌ বৃদ্ধাবন্নং প্রার্থয়তঃ সুতান্
221.73
তত্র বেদবিদঃ প্রাজ্ঞা গাম্ভীর্যে সাগরোপমাঃ
কৃষ্যাদিষ্বভবন্সক্তা মূর্খাঃ শ্রাদ্ধান্যভুঞ্জত
221.74
প্রাতঃ প্রাতশ্চ সুপ্রশ্নং কল্পনং প্রেষণক্রিয়াঃ
শিষ্যানুপ্রহিতাস্তস্মিন্নকুর্বন্গুরবশ্চ হ
221.75
শ্বশ্রূশ্বশুরয়োরগ্রে বধূঃ প্রেষ্যানশাসত
অন্বশাসচ্চ ভর্তারং সমাহূয়াভিজল্পতী
221.76
প্রয়ত্নেনাপি চারক্ষচ্চিত্তং পুত্রস্য বৈ পিতা
ব্যভজংশ্চাপি সংরম্ভাদ্দুঃখবাসং তথাবসন্
221.77
অগ্নিদাহেন চোরৈর্বা রাজভির্বা হৃতং ধনম্
দৃষ্ট্বা দ্বেষাত্প্রাহসন্ত সুহৃত্সংভাবিতা হ্যপি
221.78
কৃতঘ্না নাস্তিকাঃ পাপা গুরুদারাভিমর্শিনঃ
অভক্ষ্যভক্ষণরতা নির্মর্যাদা হতত্বিষঃ
221.79
তেষ্বেবমাদীনাচারানাচরত্সু বিপর্যয়ে
নাহং দেবেন্দ্র বত্স্যামি দানবেষ্বিতি মে মতিঃ
221.80
তাং মাং স্বয়মনুপ্রাপ্তামভিনন্দ শচীপতে
ত্বয়ার্চিতাং মাং দেবেশ পুরোধাস্যন্তি দেবতাঃ
221.81
যত্রাহং তত্র মত্কান্তা মদ্বিশিষ্টা মদর্পণাঃ
সপ্ত দেব্যো ময়াষ্টম্যো বাসং চেষ্যন্তি মেঽষ্টধা
221.82
আশা শ্রদ্ধা ধৃতিঃ কান্তির্বিজিতিঃ সন্নতিঃ ক্ষমা
অষ্টমী বৃত্তিরেতাসাং পুরোগা পাকশাসন
221.83
তাশ্চাহং চাসুরাংস্ত্যক্ত্বা যুষ্মদ্বিষয়মাগতা
ত্রিদশেষু নিবত্স্যামো ধর্মনিষ্ঠান্তরাত্মসু
221.84
ভীষ্ম উবাচ
ইত্যুক্তবচনাং দেবীমত্যর্থং তৌ ননন্দতুঃ
নারদশ্চ ত্রিলোকর্ষির্বৃত্রহন্তা চ বাসবঃ
221.85
ততোঽনলসখো বায়ুঃ প্রববৌ দেববেশ্মসু
ইষ্টগন্ধঃ সুখস্পর্শঃ সর্বেন্দ্রিয়সুখাবহঃ
221.86
শুচৌ চাভ্যর্চিতে দেশে ত্রিদশাঃ প্রায়শঃ স্থিতাঃ
লক্ষ্ম্যা সহিতমাসীনং মঘবন্তং দিদৃক্ষবঃ
221.87
ততো দিবং প্রাপ্য সহস্রলোচনঃ; শ্রিয়োপপন্নঃ সুহৃদা সুরর্ষিণা
রথেন হর্যশ্বয়ুজা সুরর্ষভঃ; সদঃ সুরাণামভিসত্কৃতো যয়ৌ
221.88
অথেঙ্গিতং বজ্রধরস্য নারদঃ; শ্রিয়াশ্চ দেব্যা মনসা বিচারয়ন্
শ্রিয়ৈ শশংসামরদৃষ্টপৌরুষঃ; শিবেন তত্রাগমনং মহর্দ্ধিমৎ
221.89
ততোঽমৃতং দ্যৌঃ প্রববর্ষ ভাস্বতী; পিতামহস্যায়তনে স্বয়ংভুবঃ
অনাহতা দুন্দুভয়শ্চ নেদিরে; তথা প্রসন্নাশ্চ দিশশ্চকাশিরে
221.90
যথর্তু সস্যেষু ববর্ষ বাসবো; ন ধর্মমার্গাদ্বিচচাল কশ্চন
অনেকরত্নাকরভূষণা চ ভূঃ; সুঘোষঘোষা ভুবনৌকসাং জয়ে
221.91
ক্রিয়াভিরামা মনুজা যশস্বিনো; বভুঃ শুভে পুণ্যকৃতাং পথি স্থিতাঃ
নরামরাঃ কিংনরয়ক্ষরাক্ষসাঃ; সমৃদ্ধিমন্তঃ সুখিনো যশস্বিনঃ
221.92
ন জাত্বকালে কুসুমং কুতঃ ফলং; পপাত বৃক্ষাত্পবনেরিতাদপি
রসপ্রদাঃ কামদুঘাশ্চ ধেনবো; ন দারুণা বাগ্বিচচার কস্যচিৎ
221.93
ইমাং সপর্যাং সহ সর্বকামদৈঃ; শ্রিয়াশ্চ শক্রপ্রমুখৈশ্চ দৈবতৈঃ
পঠন্তি যে বিপ্রসদঃ সমাগমে; সমৃদ্ধকামাঃ শ্রিয়মাপ্নুবন্তি তে
221.94
ত্বয়া কুরূণাং বর যত্প্রচোদিতং; ভবাভবস্যেহ পরং নিদর্শনম্
তদদ্য সর্বং পরিকীর্তিতং ময়া; পরীক্ষ্য তত্ত্বং পরিগন্তুমর্হসি