Utshovঅধ্যায় 222
222.1
যুধিষ্ঠির উবাচ
কিংশীলঃ কিংসমাচারঃ কিংবিদ্যঃ কিংপরায়ণঃ
প্রাপ্নোতি ব্রহ্মণঃ স্থানং যত্পরং প্রকৃতের্ধ্রুবম্
222.2
ভীষ্ম উবাচ
মোক্ষধর্মেষু নিয়তো লঘ্বাহারো জিতেন্দ্রিয়ঃ
প্রাপ্নোতি ব্রহ্মণঃ স্থানং যত্পরং প্রকৃতের্ধ্রুবম্
222.3
অত্রাপ্যুদাহরন্তীমমিতিহাসং পুরাতনম্
জৈগীষব্যস্য সংবাদমসিতস্য চ ভারত
222.4
জৈগীষব্যং মহাপ্রাজ্ঞং ধর্মাণামাগতাগমম্
অক্রুধ্যন্তমহৃষ্যন্তমসিতো দেবলোঽব্রবীৎ
222.5
ন প্রীয়সে বন্দ্যমানো নিন্দ্যমানো ন কুপ্যসি
কা তে প্রজ্ঞা কুতশ্চৈষা কিং চৈতস্যাঃ পরায়ণম্
222.6
ইতি তেনানুয়ুক্তঃ স তমুবাচ মহাতপাঃ
মহদ্বাক্যমসংদিগ্ধং পুষ্কলার্থপদং শুচি
222.7
যা গতির্যা পরা নিষ্ঠা যা শান্তিঃ পুণ্যকর্মণাম্
তাং তেঽহং সংপ্রবক্ষ্যামি যন্মাং পৃচ্ছসি বৈ দ্বিজ
222.8
নিন্দত্সু চ সমো নিত্যং প্রশংসত্সু চ দেবল
নিহ্নুবন্তি চ যে তেষাং সময়ং সুকৃতং চ যে
222.9
উক্তাশ্চ ন বিবক্ষন্তি বক্তারমহিতে রতম্
প্রতিহন্তুং ন চেচ্ছন্তি হন্তারং বৈ মনীষিণঃ
222.10
নাপ্রাপ্তমনুশোচন্তি প্রাপ্তকালানি কুর্বতে
ন চাতীতানি শোচন্তি ন চৈনান্প্রতিজানতে
222.11
সংপ্রাপ্তানাং চ পূজ্যানাং কামাদর্থেষু দেবল
যথোপপত্তিং কুর্বন্তি শক্তিমন্তঃ কৃতব্রতাঃ
222.12
পক্ববিদ্যা মহাপ্রাজ্ঞা জিতক্রোধা জিতেন্দ্রিয়াঃ
মনসা কর্মণা বাচা নাপরাধ্যন্তি কস্যচিৎ
222.13
অনীর্ষবো ন চান্যোন্যং বিহিংসন্তি কদাচন
ন চ জাতূপতপ্যন্তে ধীরাঃ পরসমৃদ্ধিভিঃ
222.14
নিন্দাপ্রশংসে চাত্যর্থং ন বদন্তি পরস্য যে
ন চ নিন্দাপ্রশংসাভ্যাং বিক্রিয়ন্তে কদাচন
222.15
সর্বতশ্চ প্রশান্তা যে সর্বভূতহিতে রতাঃ
ন ক্রুধ্যন্তি ন হৃষ্যন্তি নাপরাধ্যন্তি কস্যচিৎ
বিমুচ্য হৃদয়গ্রন্থীংশ্চঙ্ক্রম্যন্তে যথাসুখম্
222.16
ন যেষাং বান্ধবাঃ সন্তি যে চান্যেষাং ন বান্ধবাঃ
অমিত্রাশ্চ ন সন্ত্যেষাং যে চামিত্রা ন কস্যচিৎ
222.17
য এবং কুর্বতে মর্ত্যাঃ সুখং জীবন্তি সর্বদা
ধর্মমেবানুবর্তন্তে ধর্মজ্ঞা দ্বিজসত্তম
যে হ্যতো বিচ্যুতা মার্গাত্তে হৃষ্যন্ত্যুদ্বিজন্তি চ
222.18
আস্থিতস্তমহং মার্গমসূয়িষ্যামি কং কথম্
নিন্দ্যমানঃ প্রশস্তো বা হৃষ্যেয়ং কেন হেতুনা
222.19
যদ্যদিচ্ছন্তি তন্মার্গমভিগচ্ছন্তি মানবাঃ
ন মে নিন্দাপ্রশংসাভ্যাং হ্রাসবৃদ্ধী ভবিষ্যতঃ
222.20
অমৃতস্যেব সংতৃপ্যেদবমানস্য তত্ত্ববিৎ
বিষস্যেবোদ্বিজেন্নিত্যং সংমানস্য বিচক্ষণঃ
222.21
অবজ্ঞাতঃ সুখং শেতে ইহ চামুত্র চোভয়োঃ
বিমুক্তঃ সর্বপাপেভ্যো যোঽবমন্তা স বধ্যতে
222.22
পরাং গতিং চ যে কেচিত্প্রার্থয়ন্তি মনীষিণঃ
এতদ্ব্রতং সমাশ্রিত্য সুখমেধন্তি তে জনাঃ
222.23
সর্বতশ্চ সমাহৃত্য ক্রতূন্সর্বাঞ্জিতেন্দ্রিয়ঃ
প্রাপ্নোতি ব্রহ্মণঃ স্থানং যত্পরং প্রকৃতের্ধ্রুবম্
222.24
নাস্য দেবা ন গন্ধর্বা ন পিশাচা ন রাক্ষসাঃ
পদমন্ববরোহন্তি প্রাপ্তস্য পরমাং গতিম্