অধ্যায় 223

223.1

যুধিষ্ঠির উবাচ
প্রিয়ঃ সর্বস্য লোকস্য সর্বসত্ত্বাভিনন্দিতা
গুণৈঃ সর্বৈরুপেতশ্চ কো ন্বস্তি ভুবি মানবঃ

ভীষ্ম উবাচ
অত্র তে বর্তয়িষ্যামি পৃচ্ছতো ভরতর্ষভ
উগ্রসেনস্য সংবাদং নারদে কেশবস্য চ

উগ্রসেন উবাচ
পশ্য সংকল্পতে লোকো নারদস্য প্রকীর্তনে
মন্যে স গুণসংপন্নো ব্রূহি তন্মম পৃচ্ছতঃ

বাসুদেব উবাচ
কুকুরাধিপ যান্মন্যে শৃণু তান্মে বিবক্ষতঃ
নারদস্য গুণান্সাধূন্সংক্ষেপেণ নরাধিপ

ন চারিত্রনিমিত্তোঽস্যাহংকারো দেহপাতনঃ
অভিন্নশ্রুতচারিত্রস্তস্মাত্সর্বত্র পূজিতঃ

তপস্বী নারদো বাঢং বাচি নাস্য ব্যতিক্রমঃ
কামাদ্বা যদি বা লোভাত্তস্মাত্সর্বত্র পূজিতঃ

অধ্যাত্মবিধিতত্ত্বজ্ঞঃ ক্ষান্তঃ শক্তো জিতেন্দ্রিয়ঃ
ঋজুশ্চ সত্যবাদী চ তস্মাত্সর্বত্র পূজিতঃ

তেজসা যশসা বুদ্ধ্যা নয়েন বিনয়েন চ
জন্মনা তপসা বৃদ্ধস্তস্মাত্সর্বত্র পূজিতঃ

সুখশীলঃ সুসংভোগঃ সুভোজ্যঃ স্বাদরঃ শুচিঃ
সুবাক্যশ্চাপ্যনীর্ষ্যশ্চ তস্মাত্সর্বত্র পূজিতঃ

কল্যাণং কুরুতে বাঢং পাপমস্মিন্ন বিদ্যতে
ন প্রীয়তে পরানর্থৈস্তস্মাত্সর্বত্র পূজিতঃ

বেদশ্রুতিভিরাখ্যানৈরর্থানভিজিগীষতে
তিতিক্ষুরনবজ্ঞশ্চ তস্মাত্সর্বত্র পূজিতঃ

সমত্বাদ্ধি প্রিয়ো নাস্তি নাপ্রিয়শ্চ কথংচন
মনোনুকূলবাদী চ তস্মাত্সর্বত্র পূজিতঃ

বহুশ্রুতশ্চৈত্রকথঃ পণ্ডিতোঽনলসোঽশঠঃ
অদীনোঽক্রোধনোঽলুব্ধস্তস্মাত্সর্বত্র পূজিতঃ

নার্থে ন ধর্মে কামে বা ভূতপূর্বোঽস্য বিগ্রহঃ
দোষাশ্চাস্য সমুচ্ছিন্নাস্তস্মাত্সর্বত্র পূজিতঃ

দৃঢভক্তিরনিন্দ্যাত্মা শ্রুতবাননৃশংসবান্
বীতসংমোহদোষশ্চ তস্মাত্সর্বত্র পূজিতঃ

অসক্তঃ সর্বসঙ্গেষু সক্তাত্মেব চ লক্ষ্যতে
অদীর্ঘসংশয়ো বাগ্মী তস্মাত্সর্বত্র পূজিতঃ

সমাধির্নাস্য মানার্থে নাত্মানং স্তৌতি কর্হিচিৎ
অনীর্ষ্যুর্দৃঢসংভাষস্তস্মাত্সর্বত্র পূজিতঃ

লোকস্য বিবিধং বৃত্তং প্রকৃতেশ্চাপ্যকুত্সয়ন্
সংসর্গবিদ্যাকুশলস্তস্মাত্সর্বত্র পূজিতঃ

নাসূয়ত্যাগমং কংচিত্স্বং তপো নোপজীবতি
অবন্ধ্যকালো বশ্যাত্মা তস্মাত্সর্বত্র পূজিতঃ

কৃতশ্রমঃ কৃতপ্রজ্ঞো ন চ তৃপ্তঃ সমাধিতঃ
নিয়মস্থোঽপ্রমত্তশ্চ তস্মাত্সর্বত্র পূজিতঃ

সাপত্রপশ্চ যুক্তশ্চ সুনেয়ঃ শ্রেয়সে পরৈঃ
অভেত্তা পরগুহ্যানাং তস্মাত্সর্বত্র পূজিতঃ

ন হৃষ্যত্যর্থলাভেষু নালাভেষু ব্যথত্যপি
স্থিরবুদ্ধিরসক্তাত্মা তস্মাত্সর্বত্র পূজিতঃ

তং সর্বগুণসংপন্নং দক্ষং শুচিমকাতরম্
কালজ্ঞং চ নয়জ্ঞং চ কঃ প্রিয়ং ন করিষ্যতি