Utshovঅধ্যায় 224
224.1
যুধিষ্ঠির উবাচ
আদ্যন্তং সর্বভূতানাং শ্রোতুমিচ্ছামি কৌরব
ধ্যানং কর্ম চ কালং চ তথৈবায়ুর্যুগে যুগে
224.2
লোকতত্ত্বং চ কার্ত্স্ন্যেন ভূতানামাগতিং গতিম্
সর্গশ্চ নিধনং চৈব কুত এতত্প্রবর্ততে
224.3
যদি তেঽনুগ্রহে বুদ্ধিরস্মাস্বিহ সতাং বর
এতদ্ভবন্তং পৃচ্ছামি তদ্ভবান্প্রব্রবীতু মে
224.4
পূর্বং হি কথিতং শ্রুত্বা ভৃগুভাষিতমুত্তমম্
ভরদ্বাজস্য বিপ্রর্ষেস্ততো মে বুদ্ধিরুত্তমা
224.5
জাতা পরমধর্মিষ্ঠা দিব্যসংস্থানসংস্থিতা
ততো ভূয়স্তু পৃচ্ছামি তদ্ভবান্বক্তুমর্হতি
224.6
ভীষ্ম উবাচ
অত্র তে বর্তয়িষ্যেঽহমিতিহাসং পুরাতনম্
জগৌ যদ্ভগবান্ব্যাসঃ পুত্রায় পরিপৃচ্ছতে
224.7
অধীত্য বেদানখিলান্সাঙ্গোপনিষদস্তথা
অন্বিচ্ছন্নৈষ্ঠিকং কর্ম ধর্মনৈপুণদর্শনাৎ
224.8
কৃষ্ণদ্বৈপায়নং ব্যাসং পুত্রো বৈয়াসকিঃ শুকঃ
পপ্রচ্ছ সংদেহমিমং ছিন্নধর্মার্থসংশয়ম্
224.9
ভূতগ্রামস্য কর্তারং কালজ্ঞানে চ নিশ্চয়ম্
ব্রাহ্মণস্য চ যত্কৃত্যং তদ্ভবান্বক্তুমর্হতি
224.10
তস্মৈ প্রোবাচ তত্সর্বং পিতা পুত্রায় পৃচ্ছতে
অতীতানাগতে বিদ্বান্সর্বজ্ঞঃ সর্বধর্মবিৎ
224.11
অনাদ্যন্তমজং দিব্যমজরং ধ্রুবমব্যয়ম্
অপ্রতর্ক্যমবিজ্ঞেয়ং ব্রহ্মাগ্রে সমবর্তত
224.12
কাষ্ঠা নিমেষা দশ পঞ্চ চৈব; ত্রিংশত্তু কাষ্ঠা গণয়েত্কলাং তাম্
ত্রিংশত্কলাশ্চাপি ভবেন্মুহূর্তো; ভাগঃ কলায়া দশমশ্চ যঃ স্যাৎ
224.13
ত্রিংশন্মুহূর্তশ্চ ভবেদহশ্চ; রাত্রিশ্চ সংখ্যা মুনিভিঃ প্রণীতা
মাসঃ স্মৃতো রাত্র্যহনী চ ত্রিংশ;ত্সংবত্সরো দ্বাদশমাস উক্তঃ
সংবত্সরং দ্বে অয়নে বদন্তি; সংখ্যাবিদো দক্ষিণমুত্তরং চ
224.14
অহোরাত্রে বিভজতে সূর্যো মানুষলৌকিকে
রাত্রিঃ স্বপ্নায় ভূতানাং চেষ্টায়ৈ কর্মণামহঃ
224.15
পিত্র্যে রাত্র্যহনী মাসঃ প্রবিভাগস্তয়োঃ পুনঃ
কৃষ্ণোঽহঃ কর্মচেষ্টায়াং শুক্লঃ স্বপ্নায় শর্বরী
224.16
দৈবে রাত্র্যহনী বর্ষং প্রবিভাগস্তয়োঃ পুনঃ
অহস্তত্রোদগয়নং রাত্রিঃ স্যাদ্দক্ষিণায়নম্
224.17
যে তে রাত্র্যহনী পূর্বে কীর্তিতে দৈবলৌকিকে
তয়োঃ সংখ্যায় বর্ষাগ্রং ব্রাহ্মে বক্ষ্যাম্যহঃক্ষপে
224.18
তেষাং সংবত্সরাগ্রাণি প্রবক্ষ্যাম্যনুপূর্বশঃ
কৃতে ত্রেতায়ুগে চৈব দ্বাপরে চ কলৌ তথা
224.19
চত্বার্যাহুঃ সহস্রাণি বর্ষাণাং তত্কৃতং যুগম্
তস্য তাবচ্ছতী সংধ্যা সংধ্যাংশশ্চ তথাবিধঃ
224.20
ইতরেষু সসংধ্যেষু সসংধ্যাংশেষু চ ত্রিষু
একাপায়েন সংয়ান্তি সহস্রাণি শতানি চ
224.21
এতানি শাশ্বতাঁল্লোকান্ধারয়ন্তি সনাতনান্
এতদ্ব্রহ্মবিদাং তাত বিদিতং ব্রহ্ম শাশ্বতম্
224.22
চতুষ্পাত্সকলো ধর্মঃ সত্যং চৈব কৃতে যুগে
নাধর্মেণাগমঃ কশ্চিত্পরস্তস্য প্রবর্ততে
224.23
ইতরেষ্বাগমাদ্ধর্মঃ পাদশস্ত্ববরোপ্যতে
চৌরিকানৃতমায়াভিরধর্মশ্চোপচীয়তে
224.24
অরোগাঃ সর্বসিদ্ধার্থাশ্চতুর্বর্ষশতায়ুষঃ
কৃতে ত্রেতাদিষ্বেতেষাং পাদশো হ্রসতে বয়ঃ
224.25
বেদবাদাশ্চানুয়ুগং হ্রসন্তীতি চ নঃ শ্রুতম্
আয়ূংষি চাশিষশ্চৈব বেদস্যৈব চ যত্ফলম্
224.26
অন্যে কৃতয়ুগে ধর্মাস্ত্রেতায়াং দ্বাপরেঽপরে
অন্যে কলিয়ুগে ধর্মা যথাশক্তিকৃতা ইব
224.27
তপঃ পরং কৃতয়ুগে ত্রেতায়াং জ্ঞানমুত্তমম্
দ্বাপরে যজ্ঞমেবাহুর্দানমেব কলৌ যুগে
224.28
এতাং দ্বাদশসাহস্রীং যুগাখ্যাং কবয়ো বিদুঃ
সহস্রং পরিবৃত্তং তদ্ব্রাহ্মং দিবসমুচ্যতে
224.29
রাত্রিস্তাবত্তিথী ব্রাহ্মী তদাদৌ বিশ্বমীশ্বরঃ
প্রলয়েঽধ্যাত্মমাবিশ্য সুপ্ত্বা সোঽন্তে বিবুধ্যতে
224.30
সহস্রয়ুগপর্যন্তমহর্যদ্ব্রহ্মণো বিদুঃ
রাত্রিং যুগসহস্রান্তাং তেঽহোরাত্রবিদো জনাঃ
224.31
প্রতিবুদ্ধো বিকুরুতে ব্রহ্মাক্ষয্যং ক্ষপাক্ষয়ে
সৃজতে চ মহদ্ভূতং তস্মাদ্ব্যক্তাত্মকং মনঃ
224.32
ব্রহ্ম তেজোময়ং শুক্রং যস্য সর্বমিদং জগৎ
একস্য ভূতং ভূতস্য দ্বয়ং স্থাবরজঙ্গমম্
224.33
অহর্মুখে বিবুদ্ধঃ সন্সৃজতে বিদ্যয়া জগৎ
অগ্র এব মহাভূতমাশু ব্যক্তাত্মকং মনঃ
224.34
অভিভূয়েহ চার্চিষ্মদ্ব্যসৃজত্সপ্ত মানসান্
দূরগং বহুধাগামি প্রার্থনাসংশয়াত্মকম্
224.35
মনঃ সৃষ্টিং বিকুরুতে চোদ্যমানং সিসৃক্ষয়া
আকাশং জায়তে তস্মাত্তস্য শব্দো গুণো মতঃ
224.36
আকাশাত্তু বিকুর্বাণাত্সর্বগন্ধবহঃ শুচিঃ
বলবাঞ্জায়তে বায়ুস্তস্য স্পর্শো গুণো মতঃ
224.37
বায়োরপি বিকুর্বাণাজ্জ্যোতির্ভূতং তমোনুদম্
রোচিষ্ণু জায়তে তত্র তদ্রূপগুণমুচ্যতে
224.38
জ্যোতিষোঽপি বিকুর্বাণাদ্ভবন্ত্যাপো রসাত্মিকাঃ
অদ্ভ্যো গন্ধগুণা ভূমিঃ পূর্বৈষা সৃষ্টিরুচ্যতে
224.39
গুণাঃ পূর্বস্য পূর্বস্য প্রাপ্নুবন্ত্যুত্তরোত্তরম্
তেষাং যাবত্তিথং যদ্যত্তত্তত্তাবদ্গুণং স্মৃতম্
224.40
উপলভ্যাপ্সু চেদ্গন্ধং কেচিদ্ব্রূয়ুরনৈপুণাৎ
পৃথিব্যামেব তং বিদ্যাদাপো বায়ুং চ সংশ্রিতম্
224.41
এতে তু সপ্ত পুরুষা নানাবির্যাঃ পৃথক্পৃথক্
নাশক্নুবন্প্রজাঃ স্রষ্টুমসমাগম্য সর্বতঃ
224.42
তে সমেত্য মহাত্মানমন্যোন্যমভিসংশ্রিতাঃ
শরীরাশ্রয়ণং প্রাপ্তাস্ততঃ পুরুষ উচ্যতে
224.43
শ্রয়ণাচ্ছরীরং ভবতি মূর্তিমত্ষোডশাত্মকম্
তদাবিশন্তি ভূতানি মহান্তি সহ কর্মণা
224.44
সর্বভূতানি চাদায় তপসশ্চরণায় চ
আদিকর্তা মহাভূতং তমেবাহুঃ প্রজাপতিম্
224.45
স বৈ সৃজতি ভূতানি স এব পুরুষঃ পরঃ
অজো জনয়তে ব্রহ্মা দেবর্ষিপিতৃমানবান্
224.46
লোকান্নদীঃ সমুদ্রাংশ্চ দিশঃ শৈলান্বনস্পতীন্
নরকিংনররক্ষাংসি বয়ঃপশুমৃগোরগান্
অব্যয়ং চ ব্যয়ং চৈব দ্বয়ং স্থাবরজঙ্গমম্
224.47
তেষাং যে যানি কর্মাণি প্রাক্সৃষ্ট্যাং প্রতিপেদিরে
তান্যেব প্রতিপদ্যন্তে সৃজ্যমানাঃ পুনঃ পুনঃ
224.48
হিংস্রাহিংস্রে মৃদুক্রূরে ধর্মাধর্মে ঋতানৃতে
অতো যন্মন্যতে ধাতা তস্মাত্তত্তস্য রোচতে
224.49
মহাভূতেষু নানাত্বমিন্দ্রিয়ার্থেষু মূর্তিষু
বিনিয়োগং চ ভূতানাং ধাতৈব বিদধাত্যুত
224.50
কেচিত্পুরুষকারং তু প্রাহুঃ কর্মবিদো জনাঃ
দৈবমিত্যপরে বিপ্রাঃ স্বভাবং ভূতচিন্তকাঃ
224.51
পৌরুষং কর্ম দৈবং চ ফলবৃত্তিস্বভাবতঃ
ত্রয় এতেঽপৃথগ্ভূতা নবিবেকং তু কেচন
224.52
এবমেতচ্চ নৈবং চ যদ্ভূতং সৃজতে জগৎ
কর্মস্থা বিষমং ব্রূয়ুঃ সত্ত্বস্থাঃ সমদর্শিনঃ
224.53
তপো নিঃশ্রেয়সং জন্তোস্তস্য মূলং দমঃ শমঃ
তেন সর্বানবাপ্নোতি যান্কামান্মনসেচ্ছতি
224.54
তপসা তদবাপ্নোতি যদ্ভূতং সৃজতে জগৎ
স তদ্ভূতশ্চ সর্বেষাং ভূতানাং ভবতি প্রভুঃ
224.55
ঋষয়স্তপসা বেদানধ্যৈষন্ত দিবানিশম্
অনাদিনিধনা নিত্যা বাগুত্সৃষ্টা স্বয়ংভুবা
224.56
ঋষীণাং নামধেয়ানি যাশ্চ বেদেষু সৃষ্টয়ঃ
শর্বর্যন্তেষু জাতানাং তান্যেবৈভ্যো দদাতি সঃ
224.57
নামভেদস্তপঃকর্ময়জ্ঞাখ্যা লোকসিদ্ধয়ঃ
আত্মসিদ্ধিস্তু বেদেষু প্রোচ্যতে দশভিঃ ক্রমৈঃ
224.58
যদুক্তং বেদবাদেষু গহনং বেদদৃষ্টিভিঃ
তদন্তেষু যথায়ুক্তং ক্রময়োগেন লক্ষ্যতে
224.59
কর্মজোঽয়ং পৃথগ্ভাবো দ্বংদ্বয়ুক্তো বিয়োগিনঃ
আত্মসিদ্ধিস্তু বিজ্ঞাতা জহাতি প্রায়শো বলম্
224.60
দ্বে ব্রহ্মণী বেদিতব্যে শব্দব্রহ্ম পরং চ যৎ
শব্দব্রহ্মণি নিষ্ণাতঃ পরং ব্রহ্মাধিগচ্ছতি
224.61
আরম্ভয়জ্ঞাঃ ক্ষত্রস্য হবির্যজ্ঞা বিশস্তথা
পরিচারয়জ্ঞাঃ শূদ্রাস্তু তপোয়জ্ঞা দ্বিজাতয়ঃ
224.62
ত্রেতায়ুগে বিধিস্ত্বেষাং যজ্ঞানাং ন কৃতে যুগে
দ্বাপরে বিপ্লবং যান্তি যজ্ঞাঃ কলিয়ুগে তথা
224.63
অপৃথগ্ধর্মিণো মর্ত্যা ঋক্সামানি যজূংষি চ
কাম্যাং পুষ্টিং পৃথগ্দৃষ্ট্বা তপোভিস্তপ এব চ
224.64
ত্রেতায়াং তু সমস্তাস্তে প্রাদুরাসন্মহাবলাঃ
সংয়ন্তারঃ স্থাবরাণাং জঙ্গমানাং চ সর্বশঃ
224.65
ত্রেতায়াং সংহতা হ্যেতে যজ্ঞা বর্ণাস্তথৈব চ
সংরোধাদায়ুষস্ত্বেতে ব্যস্যন্তে দ্বাপরে যুগে
224.66
দৃশ্যন্তে নাপি দৃশ্যন্তে বেদাঃ কলিয়ুগেঽখিলাঃ
উত্সীদন্তে সয়জ্ঞাশ্চ কেবলা ধর্মসেতবঃ
224.67
কৃতে যুগে যস্তু ধর্মো ব্রাহ্মণেষু প্রদৃশ্যতে
আত্মবত্সু তপোবত্সু শ্রুতবত্সু প্রতিষ্ঠিতঃ
224.68
অধর্মব্রতসংয়োগং যথাধর্মং যুগে যুগে
বিক্রিয়ন্তে স্বধর্মস্থা বেদবাদা যথায়ুগম্
224.69
যথা বিশ্বানি ভূতানি বৃষ্ট্যা ভূয়াংসি প্রাবৃষি
সৃজ্যন্তে জঙ্গমস্থানি তথা ধর্মা যুগে যুগে
224.70
যথর্তুষ্বৃতুলিঙ্গানি নানারূপাণি পর্যয়ে
দৃশ্যন্তে তানি তান্যেব তথা ব্রহ্মাহরাত্রিষু
224.71
বিহিতং কালনানাত্বমনাদিনিধনং তথা
কীর্তিতং যত্পুরস্তাত্তে তত্সূতে চাত্তি চ প্রজাঃ
224.72
দধাতি প্রভবে স্থানং ভূতানাং সংয়মো যমঃ
স্বভাবেনৈব বর্তন্তে দ্বংদ্বয়ুক্তানি ভূরিশঃ
224.73
সর্গঃ কালঃ ক্রিয়া বেদাঃ কর্তা কার্যং ক্রিয়া ফলম্
প্রোক্তং তে পুত্র সর্বং বৈ যন্মাং ত্বং পরিপৃচ্ছসি
224.74
প্রত্যাহারং তু বক্ষ্যামি শর্বর্যাদৌ গতেঽহনি
যথেদং কুরুতেঽধ্যাত্মং সুসূক্ষ্মং বিশ্বমীশ্বরঃ
224.75
দিবি সূর্যাস্তথা সপ্ত দহন্তি শিখিনোঽর্চিষা
সর্বমেতত্তদার্চির্ভিঃ পূর্ণং জাজ্বল্যতে জগৎ