অধ্যায় 225

225.1

ব্যাস উবাচ
পৃথিব্যাং যানি ভূতানি জঙ্গমানি ধ্রুবাণি চ
তান্যেবাগ্রে প্রলীয়ন্তে ভূমিত্বমুপয়ান্তি চ

ততঃ প্রলীনে সর্বস্মিন্স্থাবরে জঙ্গমে তথা
অকাষ্ঠা নিস্তৃণা ভূমির্দৃশ্যতে কূর্মপৃষ্ঠবৎ

ভূমেরপি গুণং গন্ধমাপ আদদতে যদা
আত্তগন্ধা তদা ভূমিঃ প্রলয়ত্বায় কল্পতে

আপস্ততঃ প্রতিষ্ঠন্তি ঊর্মিমত্যো মহাস্বনাঃ
সর্বমেবেদমাপূর্য তিষ্ঠন্তি চ চরন্তি চ

অপামপি গুণাংস্তাত জ্যোতিরাদদতে যদা
আপস্তদা আত্তগুণা জ্যোতিষ্যুপরমন্তি চ

যদাদিত্যং স্থিতং মধ্যে গূহন্তি শিখিনোঽর্চিষঃ
সর্বমেবেদমর্চির্ভিঃ পূর্ণং জাজ্বল্যতে নভঃ

জ্যোতিষোঽপি গুণং রূপং বায়ুরাদদতে যদা
প্রশাম্যতি তদা জ্যোতির্বায়ুর্দোধূয়তে মহান্

ততস্তু মূলমাসাদ্য বায়ুঃ সংভবমাত্মনঃ
অধশ্চোর্ধ্বং চ তির্যক্চ দোধবীতি দিশো দশ

বায়োরপি গুণং স্পর্শমাকাশং গ্রসতে যদা
প্রশাম্যতি তদা বায়ুঃ খং তু তিষ্ঠতি নানদৎ

আকাশস্য গুণং শব্দমভিব্যক্তাত্মকং মনঃ
মনসো ব্যক্তমব্যক্তং ব্রাহ্মঃ স প্রতিসংচরঃ

তদাত্মগুণমাবিশ্য মনো গ্রসতি চন্দ্রমাঃ
মনস্যুপরতেঽধ্যাত্মা চন্দ্রমস্যবতিষ্ঠতে

তং তু কালেন মহতা সংকল্পঃ কুরুতে বশে
চিত্তং গ্রসতি সংকল্পস্তচ্চ জ্ঞানমনুত্তমম্

কালো গিরতি বিজ্ঞানং কালো বলমিতি শ্রুতিঃ
বলং কালো গ্রসতি তু তং বিদ্বান্কুরুতে বশে

আকাশস্য তদা ঘোষং তং বিদ্বান্কুরুতেঽঽত্মনি
তদব্যক্তং পরং ব্রহ্ম তচ্ছাশ্বতমনুত্তমম্
এবং সর্বাণি ভূতানি ব্রহ্মৈব প্রতিসংচরঃ

যথাবত্কীর্তিতং সম্যগেবমেতদসংশয়ম্
বোধ্যং বিদ্যাময়ং দৃষ্ট্বা যোগিভিঃ পরমাত্মভিঃ

এবং বিস্তারসংক্ষেপৌ ব্রহ্মাব্যক্তে পুনঃ পুনঃ
যুগসাহস্রয়োরাদাবহ্নো রাত্র্যাস্তথৈব চ