Utshovঅধ্যায় 226
226.1
ব্যাস উবাচ
ভূতগ্রামে নিয়ুক্তং যত্তদেতত্কীর্তিতং ময়া
ব্রাহ্মণস্য তু যত্কৃত্যং তত্তে বক্ষ্যামি পৃচ্ছতে
226.2
জাতকর্মপ্রভৃত্যস্য কর্মণাং দক্ষিণাবতাম্
ক্রিয়া স্যাদা সমাবৃত্তেরাচার্যে বেদপারগে
226.3
অধীত্য বেদানখিলান্গুরুশুশ্রূষণে রতঃ
গুরূণামনৃণো ভূত্বা সমাবর্তেত যজ্ঞবিৎ
226.4
আচার্যেণাভ্যনুজ্ঞাতশ্চতুর্ণামেকমাশ্রমম্
আ বিমোক্ষাচ্ছরীরস্য সোঽনুতিষ্ঠেদ্যথাবিধি
226.5
প্রজাসর্গেণ দারৈশ্চ ব্রহ্মচর্যেণ বা পুনঃ
বনে গুরুসকাশে বা যতিধর্মেণ বা পুনঃ
226.6
গৃহস্থস্ত্বেব সর্বেষাং চতুর্ণাং মূলমুচ্যতে
তত্র পক্বকষায়ো হি দান্তঃ সর্বত্র সিধ্যতি
226.7
প্রজাবাঞ্শ্রোত্রিয়ো যজ্বা মুক্তো দিব্যৈস্ত্রিভিরৃণৈঃ
অথান্যানাশ্রমান্পশ্চাত্পূতো গচ্ছতি কর্মভিঃ
226.8
যত্পৃথিব্যাং পুণ্যতমং বিদ্যাস্থানং তদাবসেৎ
যতেত তস্মিন্প্রামাণ্যং গন্তুং যশসি চোত্তমে
226.9
তপসা বা সুমহতা বিদ্যানাং পারণেন বা
ইজ্যয়া বা প্রদানৈর্বা বিপ্রাণাং বর্ধতে যশঃ
226.10
যাবদস্য ভবত্যস্মিঁল্লোকে কীর্তির্যশস্করী
তাবত্পুণ্যকৃতাঁল্লোকাননন্তান্পুরুষোঽশ্নুতে
226.11
অধ্যাপয়েদধীয়ীত যাজয়েত যজেত চ
ন বৃথা প্রতিগৃহ্ণীয়ান্ন চ দদ্যাত্কথংচন
226.12
যাজ্যতঃ শিষ্যতো বাপি কন্যয়া বা ধনং মহৎ
যদ্যাগচ্ছেদ্যজেদ্দদ্যান্নৈকোঽশ্নীয়াত্কথংচন
226.13
গৃহমাবসতো হ্যস্য নান্যত্তীর্থং প্রতিগ্রহাৎ
দেবর্ষিপিতৃগুর্বর্থং বৃদ্ধাতুরবুভুক্ষতাম্
226.14
অন্তর্হিতাভিতপ্তানাং যথাশক্তি বুভূষতাম্
দ্রব্যাণামতিশক্ত্যাপি দেয়মেষাং কৃতাদপি
226.15
অর্হতামনুরূপাণাং নাদেয়ং হ্যস্তি কিংচন
উচ্চৈঃশ্রবসমপ্যশ্বং প্রাপণীয়ং সতাং বিদুঃ
226.16
অনুনীয় তথা কাব্যঃ সত্যসংধো মহাব্রতঃ
স্বৈঃ প্রাণৈর্ব্রাহ্মণপ্রাণান্পরিত্রায় দিবং গতঃ
226.17
রন্তিদেবশ্চ সাংকৃত্যো বসিষ্ঠায় মহাত্মনে
অপঃ প্রদায় শীতোষ্ণা নাকপৃষ্ঠে মহীয়তে
226.18
আত্রেয়শ্চন্দ্রদময়োরর্হতোর্বিবিধং ধনম্
দত্ত্বা লোকান্যয়ৌ ধীমাননন্তান্স মহীপতিঃ
226.19
শিবিরৌশীনরোঽঙ্গানি সুতং চ প্রিয়মৌরসম্
ব্রাহ্মণার্থমুপাকৃত্য নাকপৃষ্ঠমিতো গতঃ
226.20
প্রতর্দনঃ কাশিপতিঃ প্রদায় নয়নে স্বকে
ব্রাহ্মণায়াতুলাং কীর্তিমিহ চামুত্র চাশ্নুতে
226.21
দিব্যং মৃষ্টশলাকং তু সৌবর্ণং পরমর্দ্ধিমৎ
ছত্রং দেবাবৃধো দত্ত্বা সরাষ্ট্রোঽভ্যপতদ্দিবম্
226.22
সাংকৃতিশ্চ তথাত্রেয়ঃ শিষ্যেভ্যো ব্রহ্ম নির্গুণম্
উপদিশ্য মহাতেজা গতো লোকাননুত্তমান্
226.23
অম্বরীষো গবাং দত্ত্বা ব্রাহ্মণেভ্যঃ প্রতাপবান্
অর্বুদানি দশৈকং চ সরাষ্ট্রোঽভ্যপতদ্দিবম্
226.24
সাবিত্রী কুণ্ডলে দিব্যে শরীরং জনমেজয়ঃ
ব্রাহ্মণার্থে পরিত্যজ্য জগ্মতুর্লোকমুত্তমম্
226.25
সর্বরত্নং বৃষাদর্ভো যুবনাশ্বঃ প্রিয়াঃ স্ত্রিয়ঃ
রম্যমাবসথং চৈব দত্ত্বামুং লোকমাস্থিতঃ
226.26
নিমী রাষ্ট্রং চ বৈদেহো জামদগ্ন্যো বসুংধরাম্
ব্রাহ্মণেভ্যো দদৌ চাপি গয়শ্চোর্বীং সপত্তনাম্
226.27
অবর্ষতি চ পর্জন্যে সর্বভূতানি চাসকৃৎ
বসিষ্ঠো জীবয়ামাস প্রজাপতিরিব প্রজাঃ
226.28
করংধমস্য পুত্রস্তু মরুত্তো নৃপতিস্তথা
কন্যামঙ্গিরসে দত্ত্বা দিবমাশু জগাম হ
226.29
ব্রহ্মদত্তশ্চ পাঞ্চাল্যো রাজা বুদ্ধিমতাং বরঃ
নিধিং শঙ্খং দ্বিজাগ্র্যেভ্যো দত্ত্বা লোকানবাপ্তবান্
226.30
রাজা মিত্রসহশ্চাপি বসিষ্ঠায় মহাত্মনে
মদয়ন্তীং প্রিয়াং দত্ত্বা তয়া সহ দিবং গতঃ
226.31
সহস্রজিচ্চ রাজর্ষিঃ প্রাণানিষ্টান্মহায়শাঃ
ব্রাহ্মণার্থে পরিত্যজ্য গতো লোকাননুত্তমান্
226.32
সর্বকামৈশ্চ সংপূর্ণং দত্ত্বা বেশ্ম হিরণ্ময়ম্
মুদ্গলায় গতঃ স্বর্গং শতদ্যুম্নো মহীপতিঃ
226.33
নাম্না চ দ্যুতিমান্নাম শাল্বরাজঃ প্রতাপবান্
দত্ত্বা রাজ্যমৃচীকায় গতো লোকাননুত্তমান্
226.34
মদিরাশ্বশ্চ রাজর্ষির্দত্ত্বা কন্যাং সুমধ্যমাম্
হিরণ্যহস্তায় গতো লোকান্দেবৈরভিষ্টুতান্
226.35
লোমপাদশ্চ রাজর্ষিঃ শান্তাং দত্ত্বা সুতাং প্রভুঃ
ঋশ্যশৃঙ্গায় বিপুলৈঃ সর্বকামৈরয়ুজ্যত
226.36
দত্ত্বা শতসহস্রং তু গবাং রাজা প্রসেনজিৎ
সবত্সানাং মহাতেজা গতো লোকাননুত্তমান্
226.37
এতে চান্যে চ বহবো দানেন তপসা চ হ
মহাত্মানো গতাঃ স্বর্গং শিষ্টাত্মানো জিতেন্দ্রিয়াঃ
226.38
তেষাং প্রতিষ্ঠিতা কীর্তির্যাবত্স্থাস্যতি মেদিনী
দানয়জ্ঞপ্রজাসর্গৈরেতে হি দিবমাপ্নুবন্