Utshovঅধ্যায় 227
227.1
ব্যাস উবাচ
ত্রয়ীবিদ্যামবেক্ষেত বেদেষূক্তামথাঙ্গতঃ
ঋক্সামবর্ণাক্ষরতো যজুষোঽথর্বণস্তথা
227.2
বেদবাদেষু কুশলা হ্যধ্যাত্মকুশলাশ্চ যে
সত্ত্ববন্তো মহাভাগাঃ পশ্যন্তি প্রভবাপ্যয়ৌ
227.3
এবং ধর্মেণ বর্তেত ক্রিয়াঃ শিষ্টবদাচরেৎ
অসংরোধেন ভূতানাং বৃত্তিং লিপ্সেত বৈ দ্বিজঃ
227.4
সদ্ভ্য আগতবিজ্ঞানঃ শিষ্টঃ শাস্ত্রবিচক্ষণঃ
স্বধর্মেণ ক্রিয়া লোকে কুর্বাণঃ সত্যসংগরঃ
227.5
তিষ্ঠত্যেতেষু গৃহবান্ষট্সু কর্মসু স দ্বিজঃ
পঞ্চভিঃ সততং যজ্ঞৈঃ শ্রদ্দধানো যজেত চ
227.6
ধৃতিমানপ্রমত্তশ্চ দান্তো ধর্মবিদাত্মবান্
বীতহর্ষভয়ক্রোধো ব্রাহ্মণো নাবসীদতি
227.7
দানমধ্যয়নং যজ্ঞস্তপো হ্রীরার্জবং দমঃ
এতৈর্বর্ধয়তে তেজঃ পাপ্মানং চাপকর্ষতি
227.8
ধূতপাপ্মা তু মেধাবী লঘ্বাহারো জিতেন্দ্রিয়ঃ
কামক্রোধৌ বশে কৃত্বা নিনীষেদ্ব্রহ্মণঃ পদম্
227.9
অগ্নীংশ্চ ব্রাহ্মণাংশ্চার্চেদ্দেবতাঃ প্রণমেত চ
বর্জয়েদ্রুষতীং বাচং হিংসাং চাধর্মসংহিতাম্
227.10
এষা পূর্বতরা বৃত্তির্ব্রাহ্মণস্য বিধীয়তে
জ্ঞানাগমেন কর্মাণি কুর্বন্কর্মসু সিধ্যতি
227.11
পঞ্চেন্দ্রিয়জলাং ঘোরাং লোভকূলাং সুদুস্তরাম্
মন্যুপঙ্কামনাধৃষ্যাং নদীং তরতি বুদ্ধিমান্
227.12
কামমন্যূদ্ধতং যত্স্যান্নিত্যমত্যন্তমোহিতম্
মহতা বিধিদৃষ্টেন বলেনাপ্রতিঘাতিনা
স্বভাবস্রোতসা বৃত্তমুহ্যতে সততং জগৎ
227.13
কালোদকেন মহতা বর্ষাবর্তেন সংততম্
মাসোর্মিণর্তুবেগেন পক্ষোলপতৃণেন চ
227.14
নিমেষোন্মেষফেনেন অহোরাত্রজবেন চ
কামগ্রাহেণ ঘোরেণ বেদয়জ্ঞপ্লবেন চ
227.15
ধর্মদ্বীপেন ভূতানাং চার্থকামরবেণ চ
ঋতসোপানতীরেণ বিহিংসাতরুবাহিনা
227.16
যুগহ্রদৌঘমধ্যেন ব্রহ্মপ্রায়ভবেন চ
ধাত্রা সৃষ্টানি ভূতানি কৃষ্যন্তে যমসাদনম্
227.17
এতত্প্রজ্ঞাময়ৈর্ধীরা নিস্তরন্তি মনীষিণঃ
প্লবৈরপ্লববন্তো হি কিং করিষ্যন্ত্যচেতসঃ
227.18
উপপন্নং হি যত্প্রাজ্ঞো নিস্তরেন্নেতরো জনঃ
দূরতো গুণদোষৌ হি প্রাজ্ঞঃ সর্বত্র পশ্যতি
227.19
সংশয়াত্মা স কামাত্মা চলচিত্তোঽল্পচেতনঃ
অপ্রাজ্ঞো ন তরত্যেব যো হ্যাস্তে ন স গচ্ছতি
227.20
অপ্লবো হি মহাদোষমুহ্যমানোঽধিগচ্ছতি
কামগ্রাহগৃহীতস্য জ্ঞানমপ্যস্য ন প্লবঃ
227.21
তস্মাদুন্মজ্জনস্যার্থে প্রয়তেত বিচক্ষণঃ
এতদুন্মজ্জনং তস্য যদয়ং ব্রাহ্মণো ভবেৎ
227.22
ত্র্যবদাতে কুলে জাতস্ত্রিসংদেহস্ত্রিকর্মকৃৎ
তস্মাদুন্মজ্জনস্তিষ্ঠেন্নিস্তরেত্প্রজ্ঞয়া যথা
227.23
সংস্কৃতস্য হি দান্তস্য নিয়তস্য কৃতাত্মনঃ
প্রাজ্ঞস্যানন্তরা সিদ্ধিরিহ লোকে পরত্র চ
227.24
বর্ততে তেষু গৃহবানক্রুধ্যন্ননসূয়কঃ
পঞ্চভিঃ সততং যজ্ঞৈর্বিঘসাশী যজেত চ
227.25
সতাং বৃত্তেন বর্তেত ক্রিয়াঃ শিষ্টবদাচরেৎ
অসংরোধেন ধর্মস্য বৃত্তিং লিপ্সেদগর্হিতাম্
227.26
শ্রুতিবিজ্ঞানতত্ত্বজ্ঞঃ শিষ্টাচারো বিচক্ষণঃ
স্বধর্মেণ ক্রিয়াবাংশ্চ কর্মণা সোঽপ্যসংকরঃ
227.27
ক্রিয়াবাঞ্শ্রদ্দধানশ্চ দাতা প্রাজ্ঞোঽনসূয়কঃ
ধর্মাধর্মবিশেষজ্ঞঃ সর্বং তরতি দুস্তরম্
227.28
ধৃতিমানপ্রমত্তশ্চ দান্তো ধর্মবিদাত্মবান্
বীতহর্ষভয়ক্রোধো ব্রাহ্মণো নাবসীদতি
227.29
এষা পূর্বতরা বৃত্তির্ব্রাহ্মণস্য বিধীয়তে
জ্ঞানবিত্ত্বেন কর্মাণি কুর্বন্সর্বত্র সিধ্যতি
227.30
অধর্মং ধর্মকামো হি করোতীহাবিচক্ষণঃ
ধর্মং চাধর্মসংকাশং শোচন্নিব করোতি সঃ
227.31
ধর্মং করোমীতি করোত্যধর্ম;মধর্মকামশ্চ করোতি ধর্মম্
উভে বালঃ কর্মণী ন প্রজান;ন্স জায়তে ম্রিয়তে চাপি দেহী