Utshovঅধ্যায় 228
228.1
ব্যাস উবাচ
অথ চেদ্রোচয়েদেতদ্দ্রুহ্যেত মনসা তথা
উন্মজ্জংশ্চ নিমজ্জংশ্চ জ্ঞানবান্প্লববান্ভবেৎ
228.2
প্রজ্ঞয়া নির্মিতৈর্ধীরাস্তারয়ন্ত্যবুধান্প্লবৈঃ
নাবুধাস্তারয়ন্ত্যন্যানাত্মানং বা কথংচন
228.3
ছিন্নদোষো মুনির্যোগান্যুক্তো যুঞ্জীত দ্বাদশ
দশকর্মসুখানর্থানুপায়াপায়নির্ভয়ঃ
228.4
চক্ষুরাচারবিত্প্রাজ্ঞো মনসা দর্শনেন চ
যচ্ছেদ্বাঙ্মনসী বুদ্ধ্যা য ইচ্ছেজ্জ্ঞানমুত্তমম্
জ্ঞানেন যচ্ছেদাত্মানং য ইচ্ছেচ্ছান্তিমাত্মনঃ
228.5
এতেষাং চেদনুদ্রষ্টা পুরুষোঽপি সুদারুণঃ
যদি বা সর্ববেদজ্ঞো যদি বাপ্যনৃচোঽজপঃ
228.6
যদি বা ধার্মিকো যজ্বা যদি বা পাপকৃত্তমঃ
যদি বা পুরুষব্যাঘ্রো যদি বা ক্লৈব্যধারিতা
228.7
তরত্যেব মহাদুর্গং জরামরণসাগরম্
এবং হ্যেতেন যোগেন যুঞ্জানোঽপ্যেকমন্ততঃ
অপি জিজ্ঞাসমানো হি শব্দব্রহ্মাতিবর্ততে
228.8
ধর্মোপস্থো হ্রীবরূথ উপায়াপায়কূবরঃ
অপানাক্ষঃ প্রাণয়ুগঃ প্রজ্ঞায়ুর্জীববন্ধনঃ
228.9
চেতনাবন্ধুরশ্চারুরাচারগ্রহনেমিবান্
দর্শনস্পর্শনবহো ঘ্রাণশ্রবণবাহনঃ
228.10
প্রজ্ঞানাভিঃ সর্বতন্ত্রপ্রতোদো জ্ঞানসারথিঃ
ক্ষেত্রজ্ঞাধিষ্ঠিতো ধীরঃ শ্রদ্ধাদমপুরঃসরঃ
228.11
ত্যাগবর্ত্মানুগঃ ক্ষেম্যঃ শৌচগো ধ্যানগোচরঃ
জীবয়ুক্তো রথো দিব্যো ব্রহ্মলোকে বিরাজতে
228.12
অথ সংত্বরমাণস্য রথমেতং যুয়ুক্ষতঃ
অক্ষরং গন্তুমনসো বিধিং বক্ষ্যামি শীঘ্রগম্
228.13
সপ্ত যো ধারণাঃ কৃত্স্না বাগ্যতঃ প্রতিপদ্যতে
পৃষ্ঠতঃ পার্শ্বতশ্চান্যা যাবত্যস্তাঃ প্রধারণাঃ
228.14
ক্রমশঃ পার্থিবং যচ্চ বায়ব্যং খং তথা পয়ঃ
জ্যোতিষো যত্তদৈশ্বর্যমহংকারস্য বুদ্ধিতঃ
228.15
অব্যক্তস্য তথৈশ্বর্যং ক্রমশঃ প্রতিপদ্যতে
বিক্রমাশ্চাপি যস্যৈতে তথা যুঙ্ক্তে স যোগতঃ
228.16
অথাস্য যোগয়ুক্তস্য সিদ্ধিমাত্মনি পশ্যতঃ
নির্মথ্যমানঃ সূক্ষ্মত্বাদ্রূপাণীমানি দর্শয়েৎ
228.17
শৈশিরস্তু যথা ধূমঃ সূক্ষ্মঃ সংশ্রয়তে নভঃ
তথা দেহাদ্বিমুক্তস্য পূর্বরূপং ভবত্যুত
228.18
অথ ধূমস্য বিরমে দ্বিতীয়ং রূপদর্শনম্
জলরূপমিবাকাশে তত্রৈবাত্মনি পশ্যতি
228.19
অপাং ব্যতিক্রমে চাপি বহ্নিরূপং প্রকাশতে
তস্মিন্নুপরতে চাস্য পীতবস্ত্রবদিষ্যতে
ঊর্ণারূপসবর্ণং চ তস্য রূপং প্রকাশতে
228.20
অথ শ্বেতাং গতিং গত্বা বায়ব্যং সূক্ষ্মমপ্যজঃ
অশুক্লং চেতসঃ সৌক্ষ্ম্যমব্যক্তং ব্রহ্মণোঽস্য বৈ
228.21
এতেষ্বপি হি জাতেষু ফলজাতানি মে শৃণু
জাতস্য পার্থিবৈশ্বর্যে সৃষ্টিরিষ্টা বিধীয়তে
228.22
প্রজাপতিরিবাক্ষোভ্যঃ শরীরাত্সৃজতি প্রজাঃ
অঙ্গুল্যঙ্গুষ্ঠমাত্রেণ হস্তপাদেন বা তথা
228.23
পৃথিবীং কম্পয়ত্যেকো গুণো বায়োরিতি স্মৃতঃ
আকাশভূতশ্চাকাশে সবর্ণত্বাত্প্রণশ্যতি
228.24
বর্ণতো গৃহ্যতে চাপি কামাত্পিবতি চাশয়ান্
ন চাস্য তেজসা রূপং দৃশ্যতে শাম্যতে তথা
228.25
অহংকারস্য বিজিতেঃ পঞ্চৈতে স্যুর্বশানুগাঃ
ষণ্ণামাত্মনি বুদ্ধৌ চ জিতায়াং প্রভবত্যথ
228.26
নির্দোষা প্রতিভা হ্যেনং কৃত্স্না সমভিবর্ততে
তথৈব ব্যক্তমাত্মানমব্যক্তং প্রতিপদ্যতে
228.27
যতো নিঃসরতে লোকো ভবতি ব্যক্তসংজ্ঞকঃ
তত্রাব্যক্তময়ীং ব্যাখ্যাং শৃণু ত্বং বিস্তরেণ মে
তথা ব্যক্তময়ীং চৈব সংখ্যাং পূর্বং নিবোধ মে
228.28
পঞ্চবিংশতিতত্ত্বানি তুল্যান্যুভয়তঃ সমম্
যোগে সাংখ্যেঽপি চ তথা বিশেষাংস্তত্র মে শৃণু
228.29
প্রোক্তং তদ্ব্যক্তমিত্যেব জায়তে বর্ধতে চ যৎ
জীর্যতে ম্রিয়তে চৈব চতুর্ভির্লক্ষণৈর্যুতম্
228.30
বিপরীতমতো যত্তু তদব্যক্তমুদাহৃতম্
দ্বাবাত্মানৌ চ বেদেষু সিদ্ধান্তেষ্বপ্যুদাহৃতৌ
228.31
চতুর্লক্ষণজং ত্বন্যং চতুর্বর্গং প্রচক্ষতে
ব্যক্তমব্যক্তজং চৈব তথা বুদ্ধমথেতরৎ
সত্ত্বং ক্ষেত্রজ্ঞ ইত্যেতদ্দ্বয়মপ্যনুদর্শিতম্
228.32
দ্বাবাত্মানৌ চ বেদেষু বিষয়েষু চ রজ্যতঃ
বিষয়াত্প্রতিসংহারঃ সাংখ্যানাং সিদ্ধিলক্ষণম্
228.33
নির্মমশ্চানহংকারো নির্দ্বংদ্বশ্ছিন্নসংশয়ঃ
নৈব ক্রুধ্যতি ন দ্বেষ্টি নানৃতা ভাষতে গিরঃ
228.34
আক্রুষ্টস্তাডিতশ্চৈব মৈত্রেণ ধ্যাতি নাশুভম্
বাগ্দণ্ডকর্মমনসাং ত্রয়াণাং চ নিবর্তকঃ
228.35
সমঃ সর্বেষু ভূতেষু ব্রহ্মাণমভিবর্ততে
নৈবেচ্ছতি ন চানিচ্ছো যাত্রামাত্রব্যবস্থিতঃ
228.36
অলোলুপোঽব্যথো দান্তো ন কৃতী ন নিরাকৃতিঃ
নাস্যেন্দ্রিয়মনেকাগ্রং নাতিক্ষিপ্তমনোরথঃ
অহিংস্রঃ সর্বভূতানামীদৃক্সাংখ্যো বিমুচ্যতে
228.37
অথ যোগাদ্বিমুচ্যন্তে কারণৈর্যৈর্নিবোধ মে
যোগৈশ্বর্যমতিক্রান্তো যোঽতিক্রামতি মুচ্যতে
228.38
ইত্যেষা ভাবজা বুদ্ধিঃ কথিতা তে ন সংশয়ঃ
এবং ভবতি নির্দ্বংদ্বো ব্রহ্মাণং চাধিগচ্ছতি