Utshovঅধ্যায় 229
229.1
ব্যাস উবাচ
অথ জ্ঞানপ্লবং ধীরো গৃহীত্বা শান্তিমাস্থিতঃ
উন্মজ্জংশ্চ নিমজ্জংশ্চ জ্ঞানমেবাভিসংশ্রয়েৎ
229.2
শুক উবাচ
কিং তজ্জ্ঞানমথো বিদ্যা যয়া নিস্তরতি দ্বয়ম্
প্রবৃত্তিলক্ষণো ধর্মো নিবৃত্তিরিতি চৈব হি
229.3
ব্যাস উবাচ
যস্তু পশ্যেত্স্বভাবেন বিনা ভাবমচেতনঃ
পুষ্যতে চ পুনঃ সর্বান্প্রজ্ঞয়া মুক্তহেতুকঃ
229.4
যেষাং চৈকান্তভাবেন স্বভাবঃ কারণং মতম্
পূত্বা তৃণবুসীকাং বৈ তে লভন্তে ন কিংচন
229.5
যে চৈনং পক্ষমাশ্রিত্য বর্তয়ন্ত্যল্পচেতসঃ
স্বভাবং কারণং জ্ঞাত্বা ন শ্রেয়ঃ প্রাপ্নুবন্তি তে
229.6
স্বভাবো হি বিনাশায় মোহকর্মমনোভবঃ
নিরুক্তমেতয়োরেতত্স্বভাবপরভাবয়োঃ
229.7
কৃষ্যাদীনি হি কর্মাণি সস্যসংহরণানি চ
প্রজ্ঞাবদ্ভিঃ প্রকৢপ্তানি যানাসনগৃহাণি চ
229.8
আক্রীডানাং গৃহাণাং চ গদানামগদস্য চ
প্রজ্ঞাবন্তঃ প্রবক্তারো জ্ঞানবদ্ভিরনুষ্ঠিতাঃ
229.9
প্রজ্ঞা সংয়োজয়ত্যর্থৈঃ প্রজ্ঞা শ্রেয়োঽধিগচ্ছতি
রাজানো ভুঞ্জতে রাজ্যং প্রজ্ঞয়া তুল্যলক্ষণাঃ
229.10
পারাবর্যং তু ভূতানাং জ্ঞানেনৈবোপলভ্যতে
বিদ্যয়া তাত সৃষ্টানাং বিদ্যৈব পরমা গতিঃ
229.11
ভূতানাং জন্ম সর্বেষাং বিবিধানাং চতুর্বিধম্
জরায্বণ্ডমথোদ্ভেদং স্বেদং চাপ্যুপলক্ষয়েৎ
229.12
স্থাবরেভ্যো বিশিষ্টানি জঙ্গমান্যুপলক্ষয়েৎ
উপপন্নং হি যচ্চেষ্টা বিশিষ্যেত বিশেষ্যয়োঃ
229.13
আহুর্দ্বিবহুপাদানি জঙ্গমানি দ্বয়ানি চ
বহুপাদ্ভ্যো বিশিষ্টানি দ্বিপাদানি বহূন্যপি
229.14
দ্বিপদানি দ্বয়ান্যাহুঃ পার্থিবানীতরাণি চ
পার্থিবানি বিশিষ্টানি তানি হ্যন্নানি ভুঞ্জতে
229.15
পার্থিবানি দ্বয়ান্যাহুর্মধ্যমান্যুত্তমানি চ
মধ্যমানি বিশিষ্টানি জাতিধর্মোপধারণাৎ
229.16
মধ্যমানি দ্বয়ান্যাহুর্ধর্মজ্ঞানীতরাণি চ
ধর্মজ্ঞানি বিশিষ্টানি কার্যাকার্যোপধারণাৎ
229.17
ধর্মজ্ঞানি দ্বয়ান্যাহুর্বেদজ্ঞানীতরাণি চ
বেদজ্ঞানি বিশিষ্টানি বেদো হ্যেষু প্রতিষ্ঠিতঃ
229.18
বেদজ্ঞানি দ্বয়ান্যাহুঃ প্রবক্তৄণীতরাণি চ
প্রবক্তৄণি বিশিষ্টানি সর্বধর্মোপধারণাৎ
229.19
বিজ্ঞায়ন্তে হি যৈর্বেদাঃ সর্বধর্মক্রিয়াফলাঃ
সয়জ্ঞাঃ সখিলা বেদাঃ প্রবক্তৃভ্যো বিনিঃসৃতাঃ
229.20
প্রবক্তৄণি দ্বয়ান্যাহুরাত্মজ্ঞানীতরাণি চ
আত্মজ্ঞানি বিশিষ্টানি জন্মাজন্মোপধারণাৎ
229.21
ধর্মদ্বয়ং হি যো বেদ স সর্বঃ সর্বধর্মবিদ্
স ত্যাগী সত্যসংকল্পঃ স তু ক্ষান্তঃ স ঈশ্বরঃ
229.22
ধর্মজ্ঞানপ্রতিষ্ঠং হি তং দেবা ব্রাহ্মণং বিদুঃ
শব্দব্রহ্মণি নিষ্ণাতং পরে চ কৃতনিশ্চয়ম্
229.23
অন্তঃস্থং চ বহিষ্ঠং চ যেঽঽধিয়জ্ঞাধিদৈবতম্
জানন্তি তান্নমস্যামস্তে দেবাস্তাত তে দ্বিজাঃ
229.24
তেষু বিশ্বমিদং ভূতং সাগ্রং চ জগদাহিতম্
তেষাং মাহাত্ম্যভাবস্য সদৃশং নাস্তি কিংচন
229.25
আদিং তে নিধনং চৈব কর্ম চাতীত্য সর্বশঃ
চতুর্বিধস্য ভূতস্য সর্বস্যেশাঃ স্বয়ংভুবঃ