অধ্যায় 230

230.1

ব্যাস উবাচ
এষা পূর্বতরা বৃত্তির্ব্রাহ্মণস্য বিধীয়তে
জ্ঞানবানেব কর্মাণি কুর্বন্সর্বত্র সিধ্যতি

তত্র চেন্ন ভবেদেবং সংশয়ঃ কর্মনিশ্চয়ে
কিং নু কর্ম স্বভাবোঽয়ং জ্ঞানং কর্মেতি বা পুনঃ

তত্র চেহ বিবিত্সা স্যাজ্জ্ঞানং চেত্পুরুষং প্রতি
উপপত্ত্যুপলব্ধিভ্যাং বর্ণয়িষ্যামি তচ্ছৃণু

পৌরুষং কারণং কেচিদাহুঃ কর্মসু মানবাঃ
দৈবমেকে প্রশংসন্তি স্বভাবং চাপরে জনাঃ

পৌরুষং কর্ম দৈবং চ ফলবৃত্তিস্বভাবতঃ
ত্রয়মেতত্পৃথগ্ভূতমবিবেকং তু কেচন

এবমেতন্ন চাপ্যেবমুভে চাপি ন চাপ্যুভে
কর্মস্থা বিষমং ব্রূয়ুঃ সত্ত্বস্থাঃ সমদর্শিনঃ

ত্রেতায়াং দ্বাপরে চৈব কলিজাশ্চ সসংশয়াঃ
তপস্বিনঃ প্রশান্তাশ্চ সত্ত্বস্থাশ্চ কৃতে যুগে

অপৃথগ্দর্শিনঃ সর্বে ঋক্সামসু যজুঃষু চ
কামদ্বেষৌ পৃথগ্দৃষ্ট্বা তপঃ কৃত উপাসতে

তপোধর্মেণ সংয়ুক্তস্তপোনিত্যঃ সুসংশিতঃ
তেন সর্বানবাপ্নোতি কামান্যান্মনসেচ্ছতি

তপসা তদবাপ্নোতি যদ্ভূত্বা সৃজতে জগৎ
তদ্ভূতশ্চ ততঃ সর্বো ভূতানাং ভবতি প্রভুঃ

তদুক্তং বেদবাদেষু গহনং বেদদর্শিভিঃ
বেদান্তেষু পুনর্ব্যক্তং ক্রময়োগেন লক্ষ্যতে

আরম্ভয়জ্ঞাঃ ক্ষত্রস্য হবির্যজ্ঞা বিশঃ স্মৃতাঃ
পরিচারয়জ্ঞাঃ শূদ্রাশ্চ জপয়জ্ঞা দ্বিজাতয়ঃ

পরিনিষ্ঠিতকার্যো হি স্বাধ্যায়েন দ্বিজো ভবেৎ
কুর্যাদন্যন্ন বা কুর্যান্মৈত্রো ব্রাহ্মণ উচ্যতে

ত্রেতাদৌ সকলা বেদা যজ্ঞা বর্ণাশ্রমাস্তথা
সংরোধাদায়ুষস্ত্বেতে ব্যস্যন্তে দ্বাপরে যুগে

দ্বাপরে বিপ্লবং যান্তি বেদাঃ কলিয়ুগে তথা
দৃশ্যন্তে নাপি দৃশ্যন্তে কলেরন্তে পুনঃ পুনঃ

উত্সীদন্তি স্বধর্মাশ্চ তত্রাধর্মেণ পীডিতাঃ
গবাং ভূমেশ্চ যে চাপামোষধীনাং চ যে রসাঃ

অধর্মান্তর্হিতা বেদা বেদধর্মাস্তথাশ্রমাঃ
বিক্রিয়ন্তে স্বধর্মস্থাঃ স্থাবরাণি চরাণি চ

যথা সর্বাণি ভূতানি বৃষ্টির্ভৌমানি বর্ষতি
সৃজতে সর্বতোঽঙ্গানি তথা বেদা যুগে যুগে

বিসৃতং কালনানাত্বমনাদিনিধনং চ যৎ
কীর্তিতং তত্পুরস্তান্মে যতঃ সংয়ান্তি যান্তি চ

ধাতেদং প্রভবস্থানং ভূতানাং সংয়মো যমঃ
স্বভাবেন প্রবর্তন্তে দ্বংদ্বসৃষ্টানি ভূরিশঃ

সর্গঃ কালো ধৃতির্বেদাঃ কর্তা কার্যং ক্রিয়া ফলম্
এতত্তে কথিতং তাত যন্মাং ত্বং পরিপৃচ্ছসি