Utshovঅধ্যায় 231
231.1
ভীষ্ম উবাচ
ইত্যুক্তোঽভিপ্রশস্যৈতত্পরমর্ষেস্তু শাসনম্
মোক্ষধর্মার্থসংয়ুক্তমিদং প্রষ্টুং প্রচক্রমে
231.2
শুক উবাচ
প্রজাবাঞ্শ্রোত্রিয়ো যজ্বা বৃদ্ধঃ প্রজ্ঞোঽনসূয়কঃ
অনাগতমনৈতিহ্যং কথং ব্রহ্মাধিগচ্ছতি
231.3
তপসা ব্রহ্মচর্যেণ সর্বত্যাগেন মেধয়া
সাংখ্যে বা যদি বা যোগে এতত্পৃষ্টোঽভিধত্স্ব মে
231.4
মনসশ্চেন্দ্রিয়াণাং চাপ্যৈকাগ্র্যং সমবাপ্যতে
যেনোপায়েন পুরুষৈস্তচ্চ ব্যাখ্যাতুমর্হসি
231.5
ব্যাস উবাচ
নান্যত্র বিদ্যাতপসোর্নান্যত্রেন্দ্রিয়নিগ্রহাৎ
নান্যত্র সর্বসংত্যাগাত্সিদ্ধিং বিন্দতি কশ্চন
231.6
মহাভূতানি সর্বাণি পূর্বসৃষ্টিঃ স্বয়ংভুবঃ
ভূয়িষ্ঠং প্রাণভৃদ্গ্রামে নিবিষ্টানি শরীরিষু
231.7
ভূমের্দেহো জলাত্সারো জ্যোতিষশ্চক্ষুষী স্মৃতে
প্রাণাপানাশ্রয়ো বায়ুঃ খেষ্বাকাশং শরীরিণাম্
231.8
ক্রান্তে বিষ্ণুর্বলে শক্রঃ কোষ্ঠেঽগ্নির্ভুক্তমর্ছতি
কর্ণয়োঃ প্রদিশঃ শ্রোত্রে জিহ্বায়াং বাক্সরস্বতী
231.9
কর্ণৌ ত্বক্চক্ষুষী জিহ্বা নাসিকা চৈব পঞ্চমী
দর্শনানীন্দ্রিয়োক্তানি দ্বারাণ্যাহারসিদ্ধয়ে
231.10
শব্দং স্পর্শং তথা রূপং রসং গন্ধং চ পঞ্চমম্
ইন্দ্রিয়াণি পৃথক্ত্বর্থান্মনসো দর্শয়ন্ত্যুত
231.11
ইন্দ্রিয়াণি মনো যুঙ্ক্তে বশ্যান্যন্তেব বাজিনঃ
মনশ্চাপি সদা যুঙ্ক্তে ভূতাত্মা হৃদয়াশ্রিতঃ
231.12
ইন্দ্রিয়াণাং তথৈবেষাং সর্বেষামীশ্বরং মনঃ
নিয়মে চ বিসর্গে চ ভূতাত্মা মনসস্তথা
231.13
ইন্দ্রিয়াণীন্দ্রিয়ার্থাশ্চ স্বভাবশ্চেতনা মনঃ
প্রাণাপানৌ চ জীবশ্চ নিত্যং দেহেষু দেহিনাম্
231.14
আশ্রয়ো নাস্তি সত্ত্বস্য গুণশব্দো ন চেতনা
সত্ত্বং হি তেজঃ সৃজতি ন গুণান্বৈ কদাচন
231.15
এবং সপ্তদশং দেহে বৃতং ষোডশভির্গুণৈঃ
মনীষী মনসা বিপ্রঃ পশ্যত্যাত্মানমাত্মনি
231.16
ন হ্যয়ং চক্ষুষা দৃশ্যো ন চ সর্বৈরপীন্দ্রিয়ৈঃ
মনসা সংপ্রদীপ্তেন মহানাত্মা প্রকাশতে
231.17
অশব্দস্পর্শরূপং তদরসাগন্ধমব্যয়ম্
অশরীরং শরীরে স্বে নিরীক্ষেত নিরিন্দ্রিয়ম্
231.18
অব্যক্তং ব্যক্তদেহেষু মর্ত্যেষ্বমরমাশ্রিতম্
যোঽনুপশ্যতি স প্রেত্য কল্পতে ব্রহ্মভূয়সে
231.19
বিদ্যাভিজনসংপন্নে ব্রাহ্মণে গবি হস্তিনি
শুনি চৈব শ্বপাকে চ পণ্ডিতাঃ সমদর্শিনঃ
231.20
স হি সর্বেষু ভূতেষু জঙ্গমেষু ধ্রুবেষু চ
বসত্যেকো মহানাত্মা যেন সর্বমিদং ততম্
231.21
সর্বভূতেষু চাত্মানং সর্বভূতানি চাত্মনি
যদা পশ্যতি ভূতাত্মা ব্রহ্ম সংপদ্যতে তদা
231.22
যাবানাত্মনি বেদাত্মা তাবানাত্মা পরাত্মনি
য এবং সততং বেদ সোঽমৃতত্বায় কল্পতে
231.23
সর্বভূতাত্মভূতস্য সর্বভূতহিতস্য চ
দেবাপি মার্গে মুহ্যন্তি অপদস্য পদৈষিণঃ
231.24
শকুনীনামিবাকাশে জলে বারিচরস্য বা
যথা গতির্ন দৃশ্যেত তথৈব সুমহাত্মনঃ
231.25
কালঃ পচতি ভূতানি সর্বাণ্যেবাত্মনাত্মনি
যস্মিংস্তু পচ্যতে কালস্তং ন বেদেহ কশ্চন
231.26
ন তদূর্ধ্বং ন তির্যক্চ নাধো ন চ তিরঃ পুনঃ
ন মধ্যে প্রতিগৃহ্ণীতে নৈব কশ্চিত্কুতশ্চন
231.27
সর্বেঽন্তঃস্থা ইমে লোকা বাহ্যমেষাং ন কিংচন
যঃ সহস্রং সমাগচ্ছেদ্যথা বাণো গুণচ্যুতঃ
231.28
নৈবান্তং কারণস্যেয়াদ্যদ্যপি স্যান্মনোজবঃ
তস্মাত্সূক্ষ্মাত্সূক্ষ্মতরং নাস্তি স্থূলতরং ততঃ
231.29
সর্বতঃপাণিপাদান্তং সর্বতোক্ষিশিরোমুখম্
সর্বতঃশ্রুতিমল্লোকে সর্বমাবৃত্য তিষ্ঠতি
231.30
তদেবাণোরণুতরং তন্মহদ্ভ্যো মহত্তরম্
তদন্তঃ সর্বভূতানাং ধ্রুবং তিষ্ঠন্ন দৃশ্যতে
231.31
অক্ষরং চ ক্ষরং চৈব দ্বৈধীভাবোঽয়মাত্মনঃ
ক্ষরঃ সর্বেষু ভূতেষু দিব্যং হ্যমৃতমক্ষরম্
231.32
নবদ্বারং পুরং গত্বা হংসো হি নিয়তো বশী
ঈশঃ সর্বস্য ভূতস্য স্থাবরস্য চরস্য চ
231.33
হানিভঙ্গবিকল্পানাং নবানাং সংশ্রয়েণ চ
শরীরাণামজস্যাহুর্হংসত্বং পারদর্শিনঃ
231.34
হংসোক্তং চাক্ষরং চৈব কূটস্থং যত্তদক্ষরম্
তদ্বিদ্বানক্ষরং প্রাপ্য জহাতি প্রাণজন্মনী