Utshovঅধ্যায় 232
232.1
ব্যাস উবাচ
পৃচ্ছতস্তব সত্পুত্র যথাবদিহ তত্ত্বতঃ
সাংখ্যন্যায়েন সংয়ুক্তং যদেতত্কীর্তিতং ময়া
232.2
যোগকৃত্যং তু তে কৃত্স্নং বর্তয়িষ্যামি তচ্ছৃণু
একত্বং বুদ্ধিমনসোরিন্দ্রিয়াণাং চ সর্বশঃ
আত্মনো ধ্যায়িনস্তাত জ্ঞানমেতদনুত্তমম্
232.3
তদেতদুপশান্তেন দান্তেনাধ্যাত্মশীলিনা
আত্মারামেণ বুদ্ধেন বোদ্ধব্যং শুচিকর্মণা
232.4
যোগদোষান্সমুচ্ছিদ্য পঞ্চ যান্কবয়ো বিদুঃ
কামং ক্রোধং চ লোভং চ ভয়ং স্বপ্নং চ পঞ্চমম্
232.5
ক্রোধং শমেন জয়তি কামং সংকল্পবর্জনাৎ
সত্ত্বসংসেবনাদ্ধীরো নিদ্রামুচ্ছেত্তুমর্হতি
232.6
ধৃত্যা শিশ্নোদরং রক্ষেত্পাণিপাদং চ চক্ষুষা
চক্ষুঃ শ্রোত্রে চ মনসা মনো বাচং চ কর্মণা
232.7
অপ্রমাদাদ্ভয়ং জহ্যাল্লোভং প্রাজ্ঞোপসেবনাৎ
এবমেতান্যোগদোষাঞ্জয়েন্নিত্যমতন্দ্রিতঃ
232.8
অগ্নীংশ্চ ব্রাহ্মণাংশ্চার্চেদ্দেবতাঃ প্রণমেত চ
বর্জয়েদ্রুষিতাং বাচং হিংসায়ুক্তাং মনোনুগাম্
232.9
ব্রহ্ম তেজোময়ং শুক্রং যস্য সর্বমিদং রসঃ
একস্য ভূতং ভূতস্য দ্বয়ং স্থাবরজঙ্গমম্
232.10
ধ্যানমধ্যয়নং দানং সত্যং হ্রীরার্জবং ক্ষমা
শৌচমাহারসংশুদ্ধিরিন্দ্রিয়াণাং চ নিগ্রহঃ
232.11
এতৈর্বিবর্ধতে তেজঃ পাপ্মানং চাপকর্ষতি
সিধ্যন্তি চাস্য সর্বার্থা বিজ্ঞানং চ প্রবর্ততে
232.12
সমঃ সর্বেষু ভূতেষু লব্ধালব্ধেন বর্তয়ন্
ধুতপাপ্মা তু তেজস্বী লঘ্বাহারো জিতেন্দ্রিয়ঃ
কামক্রোধৌ বশে কৃত্বা নিনীষেদ্ব্রহ্মণঃ পদম্
232.13
মনসশ্চেন্দ্রিয়াণাং চ কৃত্বৈকাগ্র্যং সমাহিতঃ
প্রাগ্রাত্রাপররাত্রেষু ধারয়েন্মন আত্মনা
232.14
জন্তোঃ পঞ্চেন্দ্রিয়স্যাস্য যদেকং ছিদ্রমিন্দ্রিয়ম্
ততোঽস্য স্রবতি প্রজ্ঞা দৃতেঃ পাদাদিবোদকম্
232.15
মনস্তু পূর্বমাদদ্যাত্কুমীনানিব মত্স্যহা
ততঃ শ্রোত্রং ততশ্চক্ষুর্জিহ্বাং ঘ্রাণং চ যোগবিৎ
232.16
তত এতানি সংয়ম্য মনসি স্থাপয়েদ্যতিঃ
তথৈবাপোহ্য সংকল্পান্মনো হ্যাত্মনি ধারয়েৎ
232.17
পঞ্চ জ্ঞানেন সংধায় মনসি স্থাপয়েদ্যতিঃ
যদৈতান্যবতিষ্ঠন্তে মনঃষষ্ঠানি চাত্মনি
প্রসীদন্তি চ সংস্থায় তদা ব্রহ্ম প্রকাশতে
232.18
বিধূম ইব দীপ্তার্চিরাদিত্য ইব দীপ্তিমান্
বৈদ্যুতোঽগ্নিরিবাকাশে পশ্যত্যাত্মানমাত্মনা
সর্বং চ তত্র সর্বত্র ব্যাপকত্বাচ্চ দৃশ্যতে
232.19
তং পশ্যন্তি মহাত্মানো ব্রাহ্মণা যে মনীষিণঃ
ধৃতিমন্তো মহাপ্রাজ্ঞাঃ সর্বভূতহিতে রতাঃ
232.20
এবং পরিমিতং কালমাচরন্সংশিতব্রতঃ
আসীনো হি রহস্যেকো গচ্ছেদক্ষরসাত্ম্যতাম্
232.21
প্রমোহো ভ্রম আবর্তো ঘ্রাণশ্রবণদর্শনে
অদ্ভুতানি রসস্পর্শে শীতোষ্ণে মারুতাকৃতিঃ
232.22
প্রতিভামুপসর্গাংশ্চাপ্যুপসংগৃহ্য যোগতঃ
তাংস্তত্ত্ববিদনাদৃত্য স্বাত্মনৈব নিবর্তয়েৎ
232.23
কুর্যাত্পরিচয়ং যোগে ত্রৈকাল্যং নিয়তো মুনিঃ
গিরিশৃঙ্গে তথা চৈত্যে বৃক্ষাগ্রেষু চ যোজজেৎ
232.24
সংনিয়ম্যেন্দ্রিয়গ্রামং গোষ্ঠে ভাণ্ডমনা ইব
একাগ্রশ্চিন্তয়েন্নিত্যং যোগান্নোদ্বেজয়েন্মনঃ
232.25
যেনোপায়েন শক্যেত সংনিয়ন্তুং চলং মনঃ
তং তং যুক্তো নিষেবেত ন চৈব বিচলেত্ততঃ
232.26
শূন্যা গিরিগুহাশ্চৈব দেবতায়তনানি চ
শূন্যাগারাণি চৈকাগ্রো নিবাসার্থমুপক্রমেৎ
232.27
নাভিষ্বজেত্পরং বাচা কর্মণা মনসাপি বা
উপেক্ষকো যতাহারো লব্ধালব্ধে সমো ভবেৎ
232.28
যশ্চৈনমভিনন্দেত যশ্চৈনমপবাদয়েৎ
সমস্তয়োশ্চাপ্যুভয়োর্নাভিধ্যায়েচ্ছুভাশুভম্
232.29
ন প্রহৃষ্যেত লাভেষু নালাভেষু চ চিন্তয়েৎ
সমঃ সর্বেষু ভূতেষু সধর্মা মাতরিশ্বনঃ
232.30
এবং সর্বাত্মনঃ সাধোঃ সর্বত্র সমদর্শিনঃ
ষণ্মাসান্নিত্যয়ুক্তস্য শব্দব্রহ্মাতিবর্ততে
232.31
বেদনার্তাঃ প্রজা দৃষ্ট্বা সমলোষ্টাশ্মকাঞ্চনঃ
এতস্মিন্নিরতো মার্গে বিরমেন্ন বিমোহিতঃ
232.32
অপি বর্ণাবকৃষ্টস্তু নারী বা ধর্মকাঙ্ক্ষিণী
তাবপ্যেতেন মার্গেণ গচ্ছেতাং পরমাং গতিম্
232.33
অজং পুরাণমজরং সনাতনং; যদিন্দ্রিয়ৈরুপলভতে নরোঽচলঃ
অণোরণীয়ো মহতো মহত্তরং; তদাত্মনা পশ্যতি যুক্ত আত্মবান্
232.34
ইদং মহর্ষের্বচনং মহাত্মনো; যথাবদুক্তং মনসানুদৃশ্য চ
অবেক্ষ্য চেয়াত্পরমেষ্ঠিসাত্ম্যতাং; প্রয়ান্তি যাং ভূতগতিং মনীষিণঃ