অধ্যায় 233

233.1

শুক উবাচ
যদিদং বেদবচনং কুরু কর্ম ত্যজেতি চ
কাং দিশং বিদ্যয়া যান্তি কাং চ গচ্ছন্তি কর্মণা

এতদ্বৈ শ্রোতুমিচ্ছামি তদ্ভবান্প্রব্রবীতু মে
এতত্ত্বন্যোন্যবৈরূপ্যে বর্ততে প্রতিকূলতঃ

ভীষ্ম উবাচ
ইত্যুক্তঃ প্রত্যুবাচেদং পরাশরসুতঃ সুতম্
কর্মবিদ্যাময়াবেতৌ ব্যাখ্যাস্যামি ক্ষরাক্ষরৌ

যাং দিশং বিদ্যয়া যান্তি যাং চ গচ্ছন্তি কর্মণা
শৃণুষ্বৈকমনাঃ পুত্র গহ্বরং হ্যেতদন্তরম্

অস্তি ধর্ম ইতি প্রোক্তং নাস্তীত্যত্রৈব যো বদেৎ
তস্য পক্ষস্য সদৃশমিদং মম ভবেদথ

দ্বাবিমাবথ পন্থানৌ যত্র বেদাঃ প্রতিষ্ঠিতাঃ
প্রবৃত্তিলক্ষণো ধর্মো নিবৃত্তৌ চ সুভাষিতঃ

কর্মণা বধ্যতে জন্তুর্বিদ্যয়া তু প্রমুচ্যতে
তস্মাত্কর্ম ন কুর্বন্তি যতয়ঃ পারদর্শিনঃ

কর্মণা জায়তে প্রেত্য মূর্তিমান্ষোডশাত্মকঃ
বিদ্যয়া জায়তে নিত্যমব্যয়ো হ্যব্যয়াত্মকঃ

কর্ম ত্বেকে প্রশংসন্তি স্বল্পবুদ্ধিতরা নরাঃ
তেন তে দেহজালানি রময়ন্ত উপাসতে

যে তু বুদ্ধিং পরাং প্রাপ্তা ধর্মনৈপুণ্যদর্শিনঃ
ন তে কর্ম প্রশংসন্তি কূপং নদ্যাং পিবন্নিব

কর্মণঃ ফলমাপ্নোতি সুখদুঃখে ভবাভবৌ
বিদ্যয়া তদবাপ্নোতি যত্র গত্বা ন শোচতি

যত্র গত্বা ন ম্রিয়তে যত্র গত্বা ন জায়তে
ন জীর্যতে যত্র গত্বা যত্র গত্বা ন বর্ধতে

যত্র তদ্ব্রহ্ম পরমমব্যক্তমজরং ধ্রুবম্
অব্যাহতমনায়াসমমৃতং চাবিয়োগি চ

দ্বংদ্বৈর্যত্র ন বাধ্যন্তে মানসেন চ কর্মণা
সমাঃ সর্বত্র মৈত্রাশ্চ সর্বভূতহিতে রতাঃ

বিদ্যাময়োঽন্যঃ পুরুষস্তাত কর্মময়োঽপরঃ
বিদ্ধি চন্দ্রমসং দর্শে সূক্ষ্ময়া কলয়া স্থিতম্

তদেতদৃষিণা প্রোক্তং বিস্তরেণানুমীয়তে
নবজং শশিনং দৃষ্ট্বা বক্রং তন্তুমিবাম্বরে

একাদশবিকারাত্মা কলাসংভারসংভৃতঃ
মূর্তিমানিতি তং বিদ্ধি তাত কর্মগুণাত্মকম্

দেবো যঃ সংশ্রিতস্তস্মিন্নব্বিন্দুরিব পুষ্করে
ক্ষেত্রজ্ঞং তং বিজানীয়ান্নিত্যং ত্যাগজিতাত্মকম্

তমো রজশ্চ সত্ত্বং চ বিদ্ধি জীবগুণানিমান্
জীবমাত্মগুণং বিদ্যাদাত্মানং পরমাত্মনঃ

সচেতনং জীবগুণং বদন্তি; স চেষ্টতে চেষ্টয়তে চ সর্বম্
ততঃ পরং ক্ষেত্রবিদো বদন্তি; প্রাবর্তয়দ্যো ভুবনানি সপ্ত