Utshovঅধ্যায় 234
234.1
শুক উবাচ
ক্ষরাত্প্রভৃতি যঃ সর্গঃ সগুণানীন্দ্রিয়াণি চ
বুদ্ধ্যৈশ্বর্যাভিসর্গার্থং যদ্ধ্যানং চাত্মনঃ শুভম্
234.2
ভূয় এব তু লোকেঽস্মিন্সদ্বৃত্তিং বৃত্তিহৈতুকীম্
যয়া সন্তঃ প্রবর্তন্তে তদিচ্ছাম্যনুবর্ণিতম্
234.3
বেদে বচনমুক্তং তু কুরু কর্ম ত্যজেতি চ
কথমেতদ্বিজানীয়াং তচ্চ ব্যাখ্যাতুমর্হসি
234.4
লোকবৃত্তান্ততত্ত্বজ্ঞঃ পূতোঽহং গুরুশাসনাৎ
কৃত্বা বুদ্ধিং বিয়ুক্তাত্মা ত্যক্ষ্যাম্যাত্মানমব্যথঃ
234.5
ব্যাস উবাচ
যৈষা বৈ বিহিতা বৃত্তিঃ পুরস্তাদ্ব্রহ্মণা স্বয়ম্
এষা পূর্বতরৈঃ সদ্ভিরাচীর্ণা পরমর্ষিভিঃ
234.6
ব্রহ্মচর্যেণ বৈ লোকাঞ্জয়ন্তি পরমর্ষয়ঃ
আত্মনশ্চ হৃদি শ্রেয়স্ত্বন্বিচ্ছ মনসাত্মনি
234.7
বনে মূলফলাশী চ তপ্যন্সুবিপুলং তপঃ
পুণ্যায়তনচারী চ ভূতানামবিহিংসকঃ
234.8
বিধূমে সন্নমুসলে বানপ্রস্থপ্রতিশ্রয়ে
কালে প্রাপ্তে চরন্ভৈক্ষং কল্পতে ব্রহ্মভূয়সে
234.9
নিঃস্তুতির্নির্নমস্কারঃ পরিত্যজ্য শুভাশুভে
অরণ্যে বিচরৈকাকী যেন কেনচিদাশিতঃ
234.10
শুক উবাচ
যদিদং বেদবচনং লোকবাদে বিরুধ্যতে
প্রমাণে চাপ্রমাণে চ বিরুদ্ধে শাস্ত্রতা কুতঃ
234.11
ইত্যেতচ্ছ্রোতুমিচ্ছামি ভগবান্প্রব্রবীতু মে
কর্মণামবিরোধেন কথমেতত্প্রবর্ততে
234.12
ভীষ্ম উবাচ
ইত্যুক্তঃ প্রত্যুবাচেদং গন্ধবত্যাঃ সুতঃ সুতম্
ঋষিস্তত্পূজয়ন্বাক্যং পুত্রস্যামিততেজসঃ
234.13
গৃহস্থো ব্রহ্মচারী চ বানপ্রস্থোঽথ ভিক্ষুকঃ
যথোক্তকারিণঃ সর্বে গচ্ছন্তি পরমাং গতিম্
234.14
একো য আশ্রমানেতাননুতিষ্ঠেদ্যথাবিধি
অকামদ্বেষসংয়ুক্তঃ স পরত্র মহীয়তে
234.15
চতুষ্পদী হি নিঃশ্রেণী ব্রহ্মণ্যেষা প্রতিষ্ঠিতা
এতামাশ্রিত্য নিঃশ্রেণীং ব্রহ্মলোকে মহীয়তে
234.16
আয়ুষস্তু চতুর্ভাগং ব্রহ্মচার্যনসূয়কঃ
গুরৌ বা গুরুপুত্রে বা বসেদ্ধর্মার্থকোবিদঃ
234.17
কর্মাতিরেকেণ গুরোরধ্যেতব্যং বুভূষতা
দক্ষিণো নাপবাদী স্যাদাহূতো গুরুমাশ্রয়েৎ
234.18
জঘন্যশায়ী পূর্বং স্যাদুত্থায়ী গুরুবেশ্মনি
যচ্চ শিষ্যেণ কর্তব্যং কার্যং দাসেন বা পুনঃ
234.19
কৃতমিত্যেব তত্সর্বং কৃত্বা তিষ্ঠেত পার্শ্বতঃ
কিংকরঃ সর্বকারী চ সর্বকর্মসু কোবিদঃ
234.20
শুচির্দক্ষো গুণোপেতো ব্রূয়াদিষুরিবাত্বরঃ
চক্ষুষা গুরুমব্যগ্রো নিরীক্ষেত জিতেন্দ্রিয়ঃ
234.21
নাভুক্তবতি চাশ্নীয়াদপীতবতি নো পিবেৎ
ন তিষ্ঠতি তথাসীত নাসুপ্তে প্রস্বপেত চ
234.22
উত্তানাভ্যাং চ পাণিভ্যাং পাদাবস্য মৃদু স্পৃশেৎ
দক্ষিণং দক্ষিণেনৈব সব্যং সব্যেন পীডয়েৎ
234.23
অভিবাদ্য গুরুং ব্রূয়াদধীষ্ব ভগবন্নিতি
ইদং করিষ্যে ভগবন্নিদং চাপি কৃতং ময়া
234.24
ইতি সর্বমনুজ্ঞাপ্য নিবেদ্য গুরবে ধনম্
কুর্যাত্কৃত্বা চ তত্সর্বমাখ্যেয়ং গুরবে পুনঃ
234.25
যাংস্তু গন্ধান্রসান্বাপি ব্রহ্মচারী ন সেবতে
সেবেত তান্সমাবৃত্ত ইতি ধর্মেষু নিশ্চয়ঃ
234.26
যে কেচিদ্বিস্তরেণোক্তা নিয়মা ব্রহ্মচারিণঃ
তান্সর্বাননুগৃহ্ণীয়াদ্ভবেচ্চানপগো গুরোঃ
234.27
স এবং গুরবে প্রীতিমুপহৃত্য যথাবলম্
আশ্রমেষ্বাশ্রমেষ্বেবং শিষ্যো বর্তেত কর্মণা
234.28
বেদব্রতোপবাসেন চতুর্থে চায়ুষো গতে
গুরবে দক্ষিণাং দত্ত্বা সমাবর্তেদ্যথাবিধি
234.29
ধর্মলব্ধৈর্যুতো দারৈরগ্নীনুত্পাদ্য ধর্মতঃ
দ্বিতীয়মায়ুষো ভাগং গৃহমেধিব্রতী ভবেৎ