Utshovঅধ্যায় 235
235.1
ব্যাস উবাচ
দ্বিতীয়মায়ুষো ভাগং গৃহমেধী গৃহে বসেৎ
ধর্মলব্ধৈর্যুতো দারৈরগ্নীনুত্পাদ্য সুব্রতঃ
235.2
গৃহস্থবৃত্তয়শ্চৈব চতস্রঃ কবিভিঃ স্মৃতাঃ
কুসূলধান্যঃ প্রথমঃ কুম্ভীধান্যস্ত্বনন্তরম্
235.3
অশ্বস্তনোঽথ কাপোতীমাশ্রিতো বৃত্তিমাহরেৎ
তেষাং পরঃ পরো জ্যায়ান্ধর্মতো লোকজিত্তমঃ
235.4
ষট্কর্মা বর্তয়ত্যেকস্ত্রিভিরন্যঃ প্রবর্ততে
দ্বাভ্যামেকশ্চতুর্থস্তু ব্রহ্মসত্রে ব্যবস্থিতঃ
গৃহমেধিব্রতান্যত্র মহান্তীহ প্রচক্ষতে
235.5
নাত্মার্থং পাচয়েদন্নং ন বৃথা ঘাতয়েত্পশূন্
প্রাণী বা যদি বাপ্রাণী সংস্কারং যজুষার্হতি
235.6
ন দিবা প্রস্বপেজ্জাতু ন পূর্বাপররাত্রয়োঃ
ন ভুঞ্জীতান্তরাকালে নানৃতাবাহ্বয়েত্স্ত্রিয়ম্
235.7
নাস্যানশ্নন্বসেদ্বিপ্রো গৃহে কশ্চিদপূজিতঃ
তথাস্যাতিথয়ঃ পূজ্যা হব্যকব্যবহাঃ সদা
235.8
বেদবিদ্যাব্রতস্নাতাঃ শ্রোত্রিয়া বেদপারগাঃ
স্বধর্মজীবিনো দান্তাঃ ক্রিয়াবন্তস্তপস্বিনঃ
তেষাং হব্যং চ কব্যং চাপ্যর্হণার্থং বিধীয়তে
235.9
ন খরৈঃ সংপ্রয়াতস্য স্বধর্মাজ্ঞানকস্য চ
অপবিদ্ধাগ্নিহোত্রস্য গুরোর্বালীককারিণঃ
235.10
সংবিভাগোঽত্র ভূতানাং সর্বেষামেব শিষ্যতে
তথৈবাপচমানেভ্যঃ প্রদেয়ং গৃহমেধিনা
235.11
বিঘসাশী ভবেন্নিত্যং নিত্যং চামৃতভোজনঃ
অমৃতং যজ্ঞশেষং স্যাদ্ভোজনং হবিষা সমম্
ভৃত্যশেষং তু যোঽশ্নাতি তমাহুর্বিঘসাশিনম্
235.12
স্বদারনিরতো দান্তো হ্যনসূয়ুর্জিতেন্দ্রিয়ঃ
ঋত্বিক্পুরোহিতাচার্যৈর্মাতুলাতিথিসংশ্রিতৈঃ
235.13
বৃদ্ধবালাতুরৈর্বৈদ্যৈর্জ্ঞাতিসংবন্ধিবান্ধবৈঃ
মাতাপিতৃভ্যাং জামীভির্ভ্রাত্রা পুত্রেণ ভার্যয়া
235.14
দুহিত্রা দাসবর্গেণ বিবাদং ন সমাচরেৎ
এতান্বিমুচ্য সংবাদান্সর্বপাপৈঃ প্রমুচ্যতে
235.15
এতৈর্জিতৈস্তু জয়তি সর্বাঁল্লোকান্ন সংশয়ঃ
আচার্যো ব্রহ্মলোকেশঃ প্রাজাপত্যে পিতা প্রভুঃ
235.16
অতিথিস্ত্বিন্দ্রলোকেশো দেবলোকস্য চর্ত্বিজঃ
জাময়োঽপ্সরসাং লোকে বৈশ্বদেবে তু জ্ঞাতয়ঃ
235.17
সংবন্ধিবান্ধবা দিক্ষু পৃথিব্যাং মাতৃমাতুলৌ
বৃদ্ধবালাতুরকৃশাস্ত্বাকাশে প্রভবিষ্ণবঃ
235.18
ভ্রাতা জ্যেষ্ঠঃ সমঃ পিত্রা ভার্যা পুত্রঃ স্বকা তনুঃ
ছায়া স্বা দাশবর্গস্তু দুহিতা কৃপণং পরম্
235.19
তস্মাদেতৈরধিক্ষিপ্তঃ সহেন্নিত্যমসংজ্বরঃ
গৃহধর্মরতো বিদ্বান্ধর্মনিত্যো জিতক্লমঃ
235.20
ন চার্থবদ্ধঃ কর্মাণি ধর্মং বা কংচিদাচরেৎ
গৃহস্থবৃত্তয়স্তিস্রস্তাসাং নিঃশ্রেয়সং পরম্
235.21
পরস্পরং তথৈবাহুশ্চাতুরাশ্রম্যমেব তৎ
যে চোক্তা নিয়মাস্তেষাং সর্বং কার্যং বুভূষতা
235.22
কুম্ভীধান্যৈরুঞ্ছশিলৈঃ কাপোতীং চাস্থিতৈস্তথা
যস্মিংশ্চৈতে বসন্ত্যর্হাস্তদ্রাষ্ট্রমভিবর্ধতে
235.23
দশ পূর্বান্দশ পরান্পুনাতি চ পিতামহান্
গৃহস্থবৃত্তয়স্ত্বেতা বর্তয়েদ্যো গতব্যথঃ
235.24
স চক্রচরলোকানাং সদৃশীং প্রাপ্নুয়াদ্গতিম্
যতেন্দ্রিয়াণামথ বা গতিরেষা বিধীয়তে
235.25
স্বর্গলোকো গৃহস্থানামুদারমনসাং হিতঃ
স্বর্গো বিমানসংয়ুক্তো বেদদৃষ্টঃ সুপুষ্পিতঃ
235.26
স্বর্গলোকে গৃহস্থানাং প্রতিষ্ঠা নিয়তাত্মনাম্
ব্রহ্মণা বিহিতা শ্রেণিরেষা যস্মাত্প্রমুচ্যতে
দ্বিতীয়ং ক্রমশঃ প্রাপ্য স্বর্গলোকে মহীয়তে
235.27
অতঃ পরং পরমমুদারমাশ্রমং; তৃতীয়মাহুস্ত্যজতাং কলেবরম্
বনৌকসাং গৃহপতিনামনুত্তমং; শৃণুষ্বৈতত্ক্লিষ্টশরীরকারিণাম্