Utshovঅধ্যায় 236
236.1
ভীষ্ম উবাচ
প্রোক্তা গৃহস্থবৃত্তিস্তে বিহিতা যা মনীষিণাম্
তদনন্তরমুক্তং যত্তন্নিবোধ যুধিষ্ঠির
236.2
ক্রমশস্ত্ববধূয়ৈনাং তৃতীয়াং বৃত্তিমুত্তমাম্
সংয়োগব্রতখিন্নানাং বানপ্রস্থাশ্রমৌকসাম্
236.3
শ্রূয়তাং পার্থ ভদ্রং তে সর্বলোকাশ্রয়াত্মনাম্
প্রেক্ষাপূর্বং প্রবৃত্তানাং পুণ্যদেশনিবাসিনাম্
236.4
ব্যাস উবাচ
গৃহস্থস্তু যদা পশ্যেদ্বলীপলিতমাত্মনঃ
অপত্যস্যৈব চাপত্যং বনমেব তদাশ্রয়েৎ
236.5
তৃতীয়মায়ুষো ভাগং বানপ্রস্থাশ্রমে বসেৎ
তানেবাগ্নীন্পরিচরেদ্যজমানো দিবৌকসঃ
236.6
নিয়তো নিয়তাহারঃ ষষ্ঠভক্তোঽপ্রমাদবান্
তদগ্নিহোত্রং তা গাবো যজ্ঞাঙ্গানি চ সর্বশঃ
236.7
অকৃষ্টং বৈ ব্রীহিয়বং নীবারং বিঘসানি চ
হবীংষি সংপ্রয়চ্ছেত মখেষ্বত্রাপি পঞ্চসু
236.8
বানপ্রস্থাশ্রমেঽপ্যেতাশ্চতস্রো বৃত্তয়ঃ স্মৃতাঃ
সদ্যঃপ্রক্ষালকাঃ কেচিত্কেচিন্মাসিকসংচয়াঃ
236.9
বার্ষিকং সংচয়ং কেচিত্কেচিদ্দ্বাদশবার্ষিকম্
কুর্বন্ত্যতিথিপূজার্থং যজ্ঞতন্ত্রার্থসিদ্ধয়ে
236.10
অভ্রাবকাশা বর্ষাসু হেমন্তে জলসংশ্রয়াঃ
গ্রীষ্মে চ পঞ্চতপসঃ শশ্বচ্চ মিতভোজনাঃ
236.11
ভূমৌ বিপরিবর্তন্তে তিষ্ঠেদ্বা প্রপদৈরপি
স্থানাসনৈর্বর্তয়ন্তি সবনেষ্বভিষিঞ্চতে
236.12
দন্তোলূখলিনঃ কেচিদশ্মকুট্টাস্তথাপরে
শুক্লপক্ষে পিবন্ত্যেকে যবাগূং ক্বথিতাং সকৃৎ
236.13
কৃষ্ণপক্ষে পিবন্ত্যেকে ভুঞ্জতে চ যথাক্রমম্
মূলৈরেকে ফলৈরেকে পুষ্পৈরেকে দৃঢব্রতাঃ
236.14
বর্তয়ন্তি যথান্যায়ং বৈখানসমতং শ্রিতাঃ
এতাশ্চান্যাশ্চ বিবিধা দীক্ষাস্তেষাং মনীষিণাম্
236.15
চতুর্থশ্চৌপনিষদো ধর্মঃ সাধারণঃ স্মৃতঃ
বানপ্রস্থো গৃহস্থশ্চ ততোঽন্যঃ সংপ্রবর্ততে
236.16
অস্মিন্নেব যুগে তাত বিপ্রৈঃ সর্বার্থদর্শিভিঃ
অগস্ত্যঃ সপ্ত ঋষয়ো মধুচ্ছন্দোঽঘমর্ষণঃ
236.17
সাংকৃতিঃ সুদিবা তণ্ডির্যবান্নোঽথ কৃতশ্রমঃ
অহোবীর্যস্তথা কাব্যস্তাণ্ড্যো মেধাতিথির্বুধঃ
236.18
শলো বাকশ্চ নির্বাকঃ শূন্যপালঃ কৃতশ্রমঃ
এবংধর্মসু বিদ্বাংসস্ততঃ স্বর্গমুপাগমন্
236.19
তাত প্রত্যক্ষধর্মাণস্তথা যায়াবরা গণাঃ
ঋষীণামুগ্রতপসাং ধর্মনৈপুণদর্শিনাম্
236.20
অবাচ্যাপরিমেয়াশ্চ ব্রাহ্মণা বনমাশ্রিতাঃ
বৈখানসা বালখিল্যাঃ সিকতাশ্চ তথাপরে
236.21
কর্মভিস্তে নিরানন্দা ধর্মনিত্যা জিতেন্দ্রিয়াঃ
গতাঃ প্রত্যক্ষধর্মাণস্তে সর্বে বনমাশ্রিতাঃ
অনক্ষত্রা অনাধৃষ্যা দৃশ্যন্তে জ্যোতিষাং গণাঃ
236.22
জরয়া চ পরিদ্যূনো ব্যাধিনা চ প্রপীডিতঃ
চতুর্থে চায়ুষঃ শেষে বানপ্রস্থাশ্রমং ত্যজেৎ
সদ্যস্কারাং নিরূপ্যেষ্টিং সর্ববেদসদক্ষিণাম্
236.23
আত্ময়াজী সোঽঽত্মরতিরাত্মক্রীডাত্মসংশ্রয়ঃ
আত্মন্যগ্নীন্সমারোপ্য ত্যক্ত্বা সর্বপরিগ্রহান্
236.24
সদ্যস্ক্রাংশ্চ যজেদ্যজ্ঞানিষ্টীশ্চৈবেহ সর্বদা
সদৈব যাজিনাং যজ্ঞাদাত্মনীজ্যা নিবর্ততে
236.25
ত্রীংশ্চৈবাগ্নীন্যজেত্সম্যগাত্মন্যেবাত্মমোক্ষণাৎ
প্রাণেভ্যো যজুষা পঞ্চ ষট্প্রাশ্নীয়াদকুত্সয়ন্
236.26
কেশলোমনখান্বাপ্য বানপ্রস্থো মুনিস্ততঃ
আশ্রমাদাশ্রমং সদ্যঃ পূতো গচ্ছতি কর্মভিঃ
236.27
অভয়ং সর্বভূতেভ্যো যো দত্ত্বা প্রব্রজেদ্দ্বিজঃ
লোকাস্তেজোময়াস্তস্য প্রেত্য চানন্ত্যমশ্নুতে
236.28
সুশীলবৃত্তো ব্যপনীতকল্মষো; ন চেহ নামুত্র চ কর্তুমীহতে
অরোষমোহো গতসংধিবিগ্রহো; ভবেদুদাসীনবদাত্মবিন্নরঃ
236.29
যমেষু চৈবাত্মগতেষু ন ব্যথে;ত্স্বশাস্ত্রসূত্রাহুতিমন্ত্রবিক্রমঃ
ভবেদ্যথেষ্টা গতিরাত্ময়াজিনো; ন সংশয়ো ধর্মপরে জিতেন্দ্রিয়ে
236.30
ততঃ পরং শ্রেষ্ঠমতীব সদ্গুণৈ;রধিষ্ঠিতং ত্রীনধিবৃত্তমুত্তমম্
চতুর্থমুক্তং পরমাশ্রমং শৃণু; প্রকীর্ত্যমানং পরমং পরায়ণম্