Utshovঅধ্যায় 237
237.1
শুক উবাচ
বর্তমানস্তথৈবাত্র বানপ্রস্থাশ্রমে যথা
যোক্তব্যোঽঽত্মা যথা শক্ত্যা পরং বৈ কাঙ্ক্ষতা পদম্
237.2
ব্যাস উবাচ
প্রাপ্য সংস্কারমেতাভ্যামাশ্রমাভ্যাং ততঃ পরম্
যত্কার্যং পরমার্থার্থং তদিহৈকমনাঃ শৃণু
237.3
কষায়ং পাচয়িত্বা তু শ্রেণিস্থানেষু চ ত্রিষু
প্রব্রজেচ্চ পরং স্থানং পরিব্রজ্যামনুত্তমাম্
237.4
তদ্ভবানেবমভ্যস্য বর্ততাং শ্রূয়তাং তথা
এক এব চরেন্নিত্যং সিদ্ধ্যর্থমসহায়বান্
237.5
একশ্চরতি যঃ পশ্যন্ন জহাতি ন হীয়তে
অনগ্নিরনিকেতঃ স্যাদ্গ্রামমন্নার্থমাশ্রয়েৎ
237.6
অশ্বস্তনবিধানঃ স্যান্মুনির্ভাবসমন্বিতঃ
লঘ্বাশী নিয়তাহারঃ সকৃদন্ননিষেবিতা
237.7
কপালং বৃক্ষমূলানি কুচেলমসহায়তা
উপেক্ষা সর্বভূতানামেতাবদ্ভিক্ষুলক্ষণম্
237.8
যস্মিন্বাচঃ প্রবিশন্তি কূপে প্রাপ্তাঃ শিলা ইব
ন বক্তারং পুনর্যান্তি স কৈবল্যাশ্রমে বসেৎ
237.9
নৈব পশ্যেন্ন শৃণুয়াদবাচ্যং জাতু কস্যচিৎ
ব্রাহ্মণানাং বিশেষেণ নৈব ব্রূয়াত্কথংচন
237.10
যদ্ব্রাহ্মণস্য কুশলং তদেব সততং বদেৎ
তূষ্ণীমাসীত নিন্দায়াং কুর্বন্ভেষজমাত্মনঃ
237.11
যেন পূর্ণমিবাকাশং ভবত্যেকেন সর্বদা
শূন্যং যেন জনাকীর্ণং তং দেবা ব্রাহ্মণং বিদুঃ
237.12
যেন কেনচিদাচ্ছন্নো যেন কেনচিদাশিতঃ
যত্রক্বচনশায়ী চ তং দেবা ব্রাহ্মণং বিদুঃ
237.13
অহেরিব গণাদ্ভীতঃ সৌহিত্যান্নরকাদিব
কুণপাদিব চ স্ত্রীভ্যস্তং দেবা ব্রাহ্মণং বিদুঃ
237.14
ন ক্রুধ্যেন্ন প্রহৃষ্যেচ্চ মানিতোঽমানিতশ্চ যঃ
সর্বভূতেষ্বভয়দস্তং দেবা ব্রাহ্মণং বিদুঃ
237.15
নাভিনন্দেত মরণং নাভিনন্দেত জীবিতম্
কালমেব প্রতীক্ষেত নিদেশং ভৃতকো যথা
237.16
অনভ্যাহতচিত্তঃ স্যাদনভ্যাহতবাক্তথা
নির্মুক্তঃ সর্বপাপেভ্যো নিরমিত্রস্য কিং ভয়ম্
237.17
অভয়ং সর্বভূতেভ্যো ভূতানামভয়ং যতঃ
তস্য দেহাদ্বিমুক্তস্য ভয়ং নাস্তি কুতশ্চন
237.18
যথা নাগপদেঽন্যানি পদানি পদগামিনাম্
সর্বাণ্যেবাপিধীয়ন্তে পদজাতানি কৌঞ্জরে
237.19
এবং সর্বমহিংসায়াং ধর্মার্থমপিধীয়তে
অমৃতঃ স নিত্যং বসতি যোঽহিংসাং প্রতিপদ্যতে
237.20
অহিংসকঃ সমঃ সত্যো ধৃতিমান্নিয়তেন্দ্রিয়ঃ
শরণ্যঃ সর্বভূতানাং গতিমাপ্নোত্যনুত্তমাম্
237.21
এবং প্রজ্ঞানতৃপ্তস্য নির্ভয়স্য মনীষিণঃ
ন মৃত্যুরতিগো ভাবঃ স মৃত্যুমধিগচ্ছতি
237.22
বিমুক্তং সর্বসঙ্গেভ্যো মুনিমাকাশবত্স্থিতম্
অস্বমেকচরং শান্তং তং দেবা ব্রাহ্মণং বিদুঃ
237.23
জীবিতং যস্য ধর্মার্থং ধর্মোঽরত্যর্থমেব চ
অহোরাত্রাশ্চ পুণ্যার্থং তং দেবা ব্রাহ্মণং বিদুঃ
237.24
নিরাশিষমনারম্ভং নির্নমস্কারমস্তুতিম্
অক্ষীণং ক্ষীণকর্মাণং তং দেবা ব্রাহ্মণং বিদুঃ
237.25
সর্বাণি ভূতানি সুখে রমন্তে; সর্বাণি দুঃখস্য ভৃশং ত্রসন্তি
তেষাং ভয়োত্পাদনজাতখেদঃ; কুর্যান্ন কর্মাণি হি শ্রদ্দধানঃ
237.26
দানং হি ভূতাভয়দক্ষিণায়াঃ; সর্বাণি দানান্যধিতিষ্ঠতীহ
তীক্ষ্ণাং তনুং যঃ প্রথমং জহাতি; সোঽনন্তমাপ্নোত্যভয়ং প্রজাভ্যঃ
237.27
উত্তান আস্যেন হবির্জুহোতি; লোকস্য নাভির্জগতঃ প্রতিষ্ঠা
তস্যাঙ্গমঙ্গানি কৃতাকৃতং চ; বৈশ্বানরঃ সর্বমেব প্রপেদে
237.28
প্রাদেশমাত্রে হৃদি নিশ্রিতং য;ত্তস্মিন্প্রাণানাত্ময়াজী জুহোতি
তস্যাগ্নিহোত্রং হুতমাত্মসংস্থং; সর্বেষু লোকেষু সদৈবতেষু
237.29
দৈবং ত্রিধাতুং ত্রিবৃতং সুপর্ণং; যে বিদ্যুরগ্র্যং পরমার্থতাং চ
তে সর্বলোকেষু মহীয়মানা; দেবাঃ সমর্থাঃ সুকৃতং ব্রজন্তি
237.30
বেদাংশ্চ বেদ্যং চ বিধিং চ কৃত্স্ন;মথো নিরুক্তং পরমার্থতাং চ
সর্বং শরীরাত্মনি যঃ প্রবেদ; তস্মৈ স্ম দেবাঃ স্পৃহয়ন্তি নিত্যম্
237.31
ভূমাবসক্তং দিবি চাপ্রমেয়ং; হিরণ্ময়ং যোঽণ্ডজমণ্ডমধ্যে
পতত্রিণং পক্ষিণমন্তরিক্ষে; যো বেদ ভোগ্যাত্মনি দীপ্তরশ্মিঃ
237.32
আবর্তমানমজরং বিবর্তনং; ষণ্ণেমিকং দ্বাদশারং সুপর্ব
যস্যেদমাস্যে পরিয়াতি বিশ্বং; তত্কালচক্রং নিহিতং গুহায়াম্
237.33
যঃ সংপ্রসাদং জগতঃ শরীরং; সর্বান্স লোকানধিগচ্ছতীহ
তস্মিন্হুতং তর্পয়তীহ দেবাং;স্তে বৈ তৃপ্তাস্তর্পয়ন্ত্যাস্যমস্য
237.34
তেজোময়ো নিত্যতনুঃ পুরাণো; লোকাননন্তানভয়ানুপৈতি
ভূতানি যস্মান্ন ত্রসন্তে কদাচি;ত্স ভূতেভ্যো ন ত্রসতে কদাচিৎ
237.35
অগর্হণীয়ো ন চ গর্হতেঽন্যা;ন্স বৈ বিপ্রঃ পরমাত্মানমীক্ষেৎ
বিনীতমোহো ব্যপনীতকল্মষো; ন চেহ নামুত্র চ যোঽর্থমৃচ্ছতি
237.36
অরোষমোহঃ সমলোষ্টকাঞ্চনঃ; প্রহীণশোকো গতসংধিবিগ্রহঃ
অপেতনিন্দাস্তুতিরপ্রিয়াপ্রিয়;শ্চরন্নুদাসীনবদেষ ভিক্ষুকঃ