অধ্যায় 238

238.1

ব্যাস উবাচ
প্রকৃতেস্তু বিকারা যে ক্ষেত্রজ্ঞস্তৈঃ পরিশ্রিতঃ
তে চৈনং ন প্রজানন্তি স তু জানাতি তানপি

তৈশ্চৈষ কুরুতে কার্যং মনঃষষ্ঠৈরিহেন্দ্রিয়ৈঃ
সুদান্তৈরিব সংয়ন্তা দৃঢৈঃ পরমবাজিভিঃ

ইন্দ্রিয়েভ্যঃ পরা হ্যর্থা অর্থেভ্যঃ পরমং মনঃ
মনসস্তু পরা বুদ্ধির্বুদ্ধেরাত্মা মহান্পরঃ

মহতঃ পরমব্যক্তমব্যক্তাত্পরতোঽমৃতম্
অমৃতান্ন পরং কিংচিত্সা কাষ্ঠা সা পরা গতিঃ

এবং সর্বেষু ভূতেষু গূঢোঽঽত্মা ন প্রকাশতে
দৃশ্যতে ত্বগ্র্যয়া বুদ্ধ্যা সূক্ষ্ময়া তত্ত্বদর্শিভিঃ

অন্তরাত্মনি সংলীয় মনঃষষ্ঠানি মেধয়া
ইন্দ্রিয়াণীন্দ্রিয়ার্থাংশ্চ বহু চিন্ত্যমচিন্তয়ন্

ধ্যানোপরমণং কৃত্বা বিদ্যাসংপাদিতং মনঃ
অনীশ্বরঃ প্রশান্তাত্মা ততোঽর্ছত্যমৃতং পদম্

ইন্দ্রিয়াণাং তু সর্বেষাং বশ্যাত্মা চলিতস্মৃতিঃ
আত্মনঃ সংপ্রদানেন মর্ত্যো মৃত্যুমুপাশ্নুতে

হিত্বা তু সর্বসংকল্পান্সত্ত্বে চিত্তং নিবেশয়েৎ
সত্ত্বে চিত্তং সমাবেশ্য ততঃ কালংজরো ভবেৎ

চিত্তপ্রসাদেন যতির্জহাতি হি শুভাশুভম্
প্রসন্নাত্মাত্মনি স্থিত্বা সুখমানন্ত্যমশ্নুতে

লক্ষণং তু প্রসাদস্য যথা তৃপ্তঃ সুখং স্বপেৎ
নিবাতে বা যথা দীপো দীপ্যমানো ন কম্পতে

এবং পূর্বাপরে রাত্রে যুঞ্জন্নাত্মানমাত্মনা
সত্ত্বাহারবিশুদ্ধাত্মা পশ্যত্যাত্মানমাত্মনি

রহস্যং সর্ববেদানামনৈতিহ্যমনাগমম্
আত্মপ্রত্যয়িকং শাস্ত্রমিদং পুত্রানুশাসনম্

ধর্মাখ্যানেষু সর্বেষু সত্যাখ্যানেষু যদ্বসু
দশেদমৃক্সহস্রাণি নির্মথ্যামৃতমুদ্ধৃতম্

নবনীতং যথা দধ্নঃ কাষ্ঠাদগ্নির্যথৈব চ
তথৈব বিদুষাং জ্ঞানং পুত্রহেতোঃ সমুদ্ধৃতম্
স্নাতকানামিদং শাস্ত্রং বাচ্যং পুত্রানুশাসনম্

তদিদং নাপ্রশান্তায় নাদান্তায়াতপস্বিনে
নাবেদবিদুষে বাচ্যং তথা নানুগতায় চ

নাসূয়কায়ানৃজবে ন চানির্দিষ্টকারিণে
ন তর্কশাস্ত্রদগ্ধায় তথৈব পিশুনায় চ

শ্লাঘতে শ্লাঘনীয়ায় প্রশান্তায় তপস্বিনে
ইদং প্রিয়ায় পুত্রায় শিষ্যায়ানুগতায় চ
রহস্যধর্মং বক্তব্যং নান্যস্মৈ তু কথংচন

যদ্যপ্যস্য মহীং দদ্যাদ্রত্নপূর্ণামিমাং নরঃ
ইদমেব ততঃ শ্রেয় ইতি মন্যেত তত্ত্ববিৎ

অতো গুহ্যতরার্থং তদধ্যাত্মমতিমানুষম্
যত্তন্মহর্ষিভির্দৃষ্টং বেদান্তেষু চ গীয়তে
তত্তেঽহং সংপ্রবক্ষ্যামি যন্মাং ত্বং পরিপৃচ্ছসি